අද දහවල් කොටුව දුම්රිය පොළ ඉදිරිපිට පැවැත්වීමට නියමිත විරෝධතාවයට සහභාගි වන්නන්ට ජනාධිපති මන්දීරය ජනාධිපති ලේකම් කාර්යාලය සහ මුදල් අමාත්‍යාංශයට ඇතුළුවීම වළක්වාලමින් කොටුව මහෙස්ත්‍රාත්වරයා අද පෙරවරුවේ නියෝගයක් නිකුත් කර ඇත.
අදාළ විරෝධතාවය සම්බන්ධයෙන් කොටුව පොලීසිය බී වාර්තාවක් යොමු කරමින් සිදුකළ ඉල්ලීම සැලකිල්ලට ගනිමින් මෙම නියෝගය නිකුත් කර ඇත.
විරෝධතාවයට සහභාගි වන්නන්ට පෙළපාලියකින් ගොස් එම ස්ථානයන්ට ඇතුළුවීම රාජ්‍ය දේපළවලට හානි කිරීම සහ රජයේ නිලධාරින්ගේ රාජකාරිවලට බාධා කිරීම තහනම් කිරීමටද මහෙස්ත්‍රාත්වරයා නියෝග කර තිබේ.
මෙහි වගඋත්තරකරුවන් ලෙස නම්කර සිටින වසන්ත සමරසිංහ, බන්දුල සමන් කුමාර, රවී කුමුදේශ් සහ උදේනි දිසානායක යන අය ඉදිරියේ කියවා භාර දෙන ලෙසද නීති විරෝධි අන්දමින් කටයුතු කරන්නේ නම් පොලිස් ආඥා පනත මංමාවත් පනත ඇතුළු පනත්වල වගන්ති ප්‍රකාරව කටයුතු කරන ලෙසද මහෙස්ත්‍රාත්වරයා පොලීසියට දැනුම් දී ඇත.
