ආණ්ඩුව වසරක ශේෂ පත‍්‍රයෙන් මෙරටට ඉතුරු කර ඇත්තේ අසාර්ථකත්වය සහ අමානුෂිකත්වය පමණයි…. සජිත්ගෙන් විශේෂ ප‍්‍රකාශයක්

87

ආණ්ඩුව තමන්ගේ, වසරක ශේෂ පත‍්‍රය මෙරටට ඉතුරු කොට ඇත්තේ අසාර්ථකත්වය, නොහැකියාව මෙන්ම අනෙක් පැත්තෙන් අමානුෂිකත්වය, දුෂ්ටත්වය සහ අශිෂ්ටත්වය බව විපක්ෂ නායක සහ සමගි ජන බලවේගයේ නායක සජිත් පේ‍්‍රමදාස මහතා විශේෂ ප‍්‍රකාශයක් කරමින් ස`දහන් කරයි.

 එම ප‍්‍රකාශය මෙසේය.

 ජනතාවට අත්‍යවශ්‍ය පාරිභෝගික ද්‍රව්‍ය වන ගෑස් සහ කිරිපිටිවල බරපතළ හිඟයක් මේ වනවිට රටපුරා මතුව තිබේ. ගෑස් ලබා ගැනීම සඳහා විශාල පෝලිම් මේ වනවිට වෙළෙඳසල් ආශ‍්‍රිතව දැක ගන්නට ලැබෙන අතර කිරිපිටි ලබා ගැනීමට තත්ත්වය ද එසේමය.

 ආණ්ඩුව තමන්ගේ, වසරක ශේෂ පත‍්‍රයෙන් මෙරටට ඉතුරු කොට ඇත්තේ අසාර්ථකත්වය නොහැකියාව මෙන්ම අනෙක් පැත්තෙන් අමානුෂිකත්වය, දුෂ්ටත්වය සහ අශිෂ්ටත්වයයි.

 කොරෝනා ව්‍යසනයෙන් අන්ත පීඩාවට පත්වෙමින් දැඩි දුෂ්කර ජීවිත ගතකරන ජනතාවට ආහාර ටිකක් පිසගැනීමට අවශ්‍ය ගෑස් පවා මේ වනවිට අහිමිව ඇති අතර, මේ වන විට කිරිපිටි අති සුඛෝපභෝගී භාණ්ඩයක් බවට පත් කිරීමට ආණ්ඩුව කටයුතු කොට ඇත. දරුවකුට කිරිපිටි ටිකක් සොයා ගැනීමට නොහැකි තත්ත්වයක් උද්ගතව තිබේ.

 විශේෂයෙන්ම ගෑස් සමාගම් පවසන්නේ අලාභ ලබමින් ගෑස් ව්‍යාපාරය කළ නොහැකි බව වන අතර ඔවුන්ට සහනාධාර ලබාදී එම අලාභය ප‍්‍රතිපූර්ණය කිරීමට ආණ්ඩුවට මුදල් නැත. ආණ්ඩුව මුදල් අහිමි කර ගත්තේ පැමිණි වහාම අත්තනෝමතික ලෙස ධනවතුන්ට බදු සහන ලබා දෙමිනි. එයින් රුපියල් බිලියන 600ක් අහිමි විය.

 සියලූ පාරිභෝගික භාණ්ඩවල මිල ගණන් මේ වනවිට දරාගන්නට නොහැකි තරම් ඉහළ ගොස් ඇති අතර ආණ්ඩුවට ඒ පිළිබඳව කිසිදු තැකීමක් නැත.

 මේ වන විටත් රට පුරා ඉන්ධන සංචිතවල බරපතළ හිඟයක් පවතින අතර තෙල් ආනයනය කිරීමට ඇති බරපතළ ගැටලූව විසඳා නොගතහොත් ඒකාන්ත වශයෙන්ම බරපතළ ඉන්ධන හිඟයකට ද ලංකාව මුහුණ දෙනු ඇත.

 ශ‍්‍රී ලාංකික වැඩිහිටියකුට සිය වැටුපෙන් සියයට හැටහයක් ආහාර වෙනුවෙන් වැයකිරීමට සිදුවන බව එක්සත් රාජධානිය ‘ගෝලීය ජීවන වියදම් දත්ත පද්ධතිය’ අනාවරණය කර ඇති අතර ආහාර වියදම දරා ගැනීමේ හැකියාව අතින් ලොව දුප්පත්ම රටවල් අතර පස් වැනි ස්ථානයට අපේ රට තල්ලූ වී ඇත. මේ අතර කොරෝනා ව්‍යසනයෙහි උච්චස්ථානයට ශ‍්‍රී ලංකාව ළඟා වෙමින් සිටින අතර ආණ්ඩුව අතින් එහි පාලනය අතිශය අසාර්ථක ලෙස ගිලිහී ගොස් තිබේ.

 ආණ්ඩුව ක‍්‍රමානුකූලව සහ ඉතා සාර්ථක ලෙස සිදුකරමින් සිටින එකම කාර්යය වන්නේ මුළු මහත් රටත් එහි ජනතාවත් මහා ව්‍යසනයක දොරටුව වෙත තල්ලූ කිරීම පමණි.

 රටේ තත්ත්වය මොහොතින් මොහොත බරපතළ ව්‍යසනකාරී තත්ත්වයක් කරා ඇදෙමින් පවතින අතර මහා අභිෂේකයකින් පසුව පත්කළ නව මුදල් අමාත්‍යවරයා යටතේත් සිදුවන්නේ මෙතෙක් සිදු වූ සුපුරුදු ක‍්‍රියාපිළිවෙත පමණි. වෙනසකට ඇත්තේ විනාශය වෙනදාටත් වඩා උග‍්‍ර වීමය.

 රට මුහුණ දී සිටින වත්මන් බරපතළ තත්ත්වය පිළිබඳව සියලූ පක්ෂ එකතු වී සාකච්ඡුා කොට කඩිනම් තීන්දුවක්

 ගැනීම අත්‍යවශ්‍ය වුවත් මේ දක්වා ආණ්ඩුවට ඒ පිළිබඳව කිසිදු උනන්දුවක් නැත. එයින් ගම්‍ය වන්නේ අන් කිසිවක් නොව ආණ්ඩුවේ හිතුවක්කාරී මනෝභාවය පමණි.

 ඔවුන් සෙල්ලම් කරමින් සිටින්නේ මේ රටේ අහිංසක ජනජීවිත සමග බව මායිම් නොකරන අතර මෙයින් සිදුවන අතිශය කනගාටුදායක ප‍්‍රතිඵලයට වන්දි ගෙවන්නට වන්නේ රටේ අහිංසක ජනතාවටය.


අකිත පෙරේරා

advertistmentadvertistment
advertistmentadvertistment