ඇෆ්ඝනිස්තාන ක්රිකට් කණ්ඩායම ශ්රී ලංකාවේ ටෙස්ට් තරගයකට, එක් දින සීමිත ඕවර් 50 තරග 03 කට සහ විස්සයි විස්ස තරග 03 කට සහභාගී වීම සඳහා පෙරේදා (30 වැනිදා) රාත්රී දිවයින වෙත පැමිණියේය.
ක්රීඩකයෝ, පුහුණුකරුවෝ සහ නිලධාරීහු ඇතුළු 28 දෙනෙක් මෙම කණ්ඩායමට ඇතුළත් වී සිටියහ.
මෙම තරගාවලියේ ටෙස්ට් තරගය හෙට 02 දින සිට 06 දින දක්වා කොළඹ සිංහල ක්රීඩා සමාජ පිටියේ පැවැත්වීමට නියමිත අතර එම තරගය නොමිලේ නැරඹීමට අවස්ථාව සලසා දී තිබේ.
එක් දින සීමිත ඕවර් 50 ක්රිකට් තරග 03 මහනුවර, පල්ලෙකැලේ ජාත්යන්තර ක්රිකට් ක්රීඩා පිටියේ දී පෙබරවාරි මස 09, 11 සහ 14 යන දිනවලදී පැවැත්වීමට නියමිතය.
විස්සයි විස්ස ක්රිකට් තරග 03 දඹුල්ල ජාත්යන්තර ක්රිකට් පිටියේ දී පෙබරවාරි මස 17, 19 සහ 21 යන දිනවල පැවැත්වීමට සැලසුම් කර තිබේ.
මෙම කණ්ඩායම පිළිගැනීම සඳහා ශ්රී ලංකා ක්රිකට් ආයතනයේ නිලධාරීහු පිරිසක් ද කටුනායක ගුවන් තොටුපොළ වෙත පැමිණ සිටියහ.
කටුනායක ටී.කේ.ජී. කපිල
