කාන්තාවක් දැරණියගල ප‍්‍රාදේශීය සභාපතිගේ නාසය කපයි

227

දැරණියගල ප‍්‍රාදේශීය සභාවේ සභාපති ලක්ෂ්මන් රාජකරුණා (එජාප) මහතාට දැරණියගල දෙල්ඔළුව ප‍්‍රදේශයේදී කාන්තාවක විසින් දැලිපිහි ප‍්‍රහාරයක් එල්ල කර ඇතැයි දැරණියගල පොලිසිය කියයි. එම ප‍්‍රහාරයෙන් සභාපතිවරයාගේ නාසයට තුවාල සිදුවී ඇති අතර සභාපතිවරයා රෝහල්ගතව ප‍්‍රතිකාර ලබාගෙන පිටව  ගොස් ඇත.

සභාපතිවරයා කිසියම් අවශ්‍යතාවයකට දැරණියගල දෙල්ඔළුව ප‍්‍රදේශයට ගොස් ආපසු එමින් සිටියදී වෙළෙඳසලක් අසල සිය රථය නැවතූ අවස්ථාවේදී  ආවේගශීලී ලෙස දැලිපිහියක් රැගෙන කඩාවැදුණු කාන්තාවක් විසින් එයින් පහර දීමට උත්සාහ කිරීමේ දී සභාපතිවරයා එය වැළැක්වීමට උත්සාහ ගැනීමත් සමගම සභාපතිවරයාගේ නාසය කැපී ඇතැයි පොලිසිය කියයි.

සැකකාර කාන්තාව ද රෝහල්ගත වී ඇති අතර ඇය සභාපතිවරයා සමග සමීප සබඳතා පවත්වන තැනැත්තියක් බවට පොලිස් විමර්ශනවලදී අනාවරණය වී ඇත.

සභාපතිවරයා සහ මෙම කාන්තාව අතර නිරතුරුවම ගැටුම් පවතින බවත් ඒ සම්බන්ධයෙන් දැරණියගල පොලිසියට පැමිණිලි  ගණනාවක් සටහන්ව ඇතැයි ද උසස් පොලිස් නිලධාරියකු පැවැසීය.

මේ පිළිබඳ දැරණියගල ප‍්‍රාදේශීය සභාපති ලක්‍ෂ්මන් රාජකරුණා මහතාගෙන් විමසීමේදී ‘‘අයියෝ පොඩි සිද්ධියක් නම් වුණා?. මම දැන් ඉන්නේ මගේ ෂෙඞ් එකේ යැයි” පවසා දුරකථනය විසන්ධි කළේය.

දැරණියගල පොලිසියේ ස්ථානාධිපති ප‍්‍රධාන පොලිස් පරීක්ෂක වසන්ත අලහකෝන් මහතාගේ උපදෙස් මත සුළු පැමිණිලි අංශය පරීක්ෂණ පවත්වයි.

කැස්බෑව – ජයසිංහ

advertistmentadvertistment
advertistmentadvertistment