නීති විරෝධි වත්කම් විමර්ශන කොට්ඨාශයට ලද තොරතුරක් මත පුත්තලම පොලිස් විශේෂ කාර්ය බලකා කඳවුරු නිලධාරින් විසින් සිදුකළ මෙහෙයුමකදී රුපියල් කෝටි හයකට අධික වටිනාකමකින් යුත් කේරළ ගංජා තොගයක් හා එක් සැකකරුවෙකු රාජාංගනය යාය 14 ප්‍රදේශයේදී අත්අඩංගුවට ගෙන තිබේ.
පුත්තලම පොලිස් විශේෂ කාර්ය බලකා කඳවුරු නිලධාරීන් එම නිවස වටලා සිදුකළ සෝදිසි කිරීමේදී නිවසේ ආරක්ෂිත යකඩ ගබඩාවක් තුළ සඟවා තිබූ කේරළ ගංජා කිලෝ 202 ක ප්‍රමාණයක් මෙසේ සොයා ගැනීමට හැකි වී ඇත.
සැකකාර ත්‍රීරෝද රථ රියදුරා වැඩිමහල් සොයුරා සමග එක්ව මෙම ජාවාරම දිර්ඝ කාලයක සිට පවත්වාගෙන ගොස් ඇති බවත් එයින් විශාල මුදලක් උපයාගෙන යාන වාහන සහ විවිධ කටයුතු වලට ආයෝජනය කර ඇති බව විමර්ශනවලදී අනාවරණය වෙමින් පවතින බව සඳහන් වේ.
වැටලීම් අතරතුරදී පලා ගිය ප්‍රධාන සැකකරු අත් අඩංගුවට ගැනීමට විමර්ශන ආරම්භ කර ඇත.
අමරනන්ද විජේසේකර – මහවැව
