ඡන්දය කල්දැමීමේ ආණ්ඩුවේ සියලු ප්‍රයත්න පරාජය කරනවා – ජවිපෙ නායක අනුර කුමාර දිසානායක
ඡන්දය කල්දැමීම සඳහා ආණ්ඩු දරණ සියලු ප්‍රයත්න පරාජය කර ජාතික ජන බලවේගය මැතිවරණයට තරඟ වදින බවත් එහිදී සුවිශේෂී ජයග්‍රහණයක් අනිවාර්යයෙන්ම අත්පත් කර ගන්නා බවත් ජාතික ජන බලවේගයේ සහ ජනතා විමුක්ති පෙරමුණේ නායක අනුර කුමාර දිසානායක මහතා ඊයේ (08දා) කියාසිටියේය.
එම ජයග්‍රහණය ලංකා ඉතිහාසයේ විශාලම දේශපාලන හැරවුම සිදුවන සුවිශේෂීම පරිවර්තනය සිදුවන මැතිවරණය බවට පත් වෙනු ඇති බවත් ඒ වෙනුවෙන් සියලු දෙනාට පෙළගැසෙන ලෙස ඉල්ලා සිටින බවත් හෙතෙම කීවේය.
දිසානායක මහතා එම අදහස් පළ කළේ පැලවත්ත බත්තරමුල්ලේ පිහිටි එම පක්ෂ ප්‍රධාන කාර්්‍යාලයේ පැවැති මාධ්‍ය හමුවකදීය. මෙහිදී වැඩිදුරටත් අදහස් දැක්වූ ඒමහතා මෙසේද කීවේය.
මැතිවරණ කොමිසම මැතිවරණයක් පැවැත්වීමට සූදානම් බව ප්‍රකාශ කර තිබුණට රනිල් වික්‍රමසිංහ සහ පොහොට්ටුවේ කණ්ඩායම මැතිවරණ කල්දැමීමට විවිධ උත්සහයන් ගනිමින් ඉන්නවා. පසුගියදා
මැතිවරණ කොමිසමේ නිලධාරීන් ජනාධිපතිවරයා විසින් ඔහුගේ කාර්යාලයට කැඳවා තිබුණා. ජනාධිපති කියන්නේ එජාප නායකයා. ස්වාධීන මැතිවරණ කොමිසම නාමයෝජනා ගැනීමට දින නියම කර තිබියදී එක් පක්ෂ නායකයෙක් විසින් කොමිසම කැඳවා කරමින් තිබෙන්නේ අනියම් බලපෑමක්. ඔහු එජාප නායකයා පමණක් නෙවෙයි පාර්ලිමේන්තුව විසින් තෝරාගත් ජනාධිපතිවරයා. අනෙක් පක්ෂ සිල්ලම කොමිසම හමුවීමට කොමිසමේ කාර්යාලයට යන විට රනිල් පමණක් කොමිසම තමන්ගේ කාර්යාලයට කැඳවා තිබෙනවා. මෙයින් පෙන්නුම් කරන්නේ සාධාරණ මැතිවරණයක් පැවැත්වීමට ඉඩ නොදීමත් මැතිවරණයක් නොපැවැත්වීමට කරන බලපෑමත් බව සැකයක් නැහැ. රනිල් වික්‍රමසිංහ උත්සහ කරමින් ඉන්නේ අපේ රටේ ජනතා කැමැත්තට ඉඩ නොදී බලහත්කාරයෙන් පාලන බලය අල්ලාගෙන ඉන්න නම් එය විශාල ගැටුමක් ඇතිවීමට හේතුවක් වෙයි. එනිසා ආණ්ඩුව මැතිවරණය වැළැක්වීමට සිදුකරන සියලු දේ
පරාජය කරන්න ජාතික ජන බලවේගය කටයුතු කරනවා. ඒ නිසා අපි ජනතාවට කියනවා නියමිත පරිදි මෙම මැතිවරණය පවත්වන්න. ඒ සඳහා මැතිහත්වීම අපි ලබාදෙනවා.
මේ මැතිවරණය ඉතාම තීරණාත්මක මැතිවරණයක්. ගමේ මැතිවරණයක් කියලා මෙය සලකන්නේ. නමුත් මේ පළාත්පාලන මැතිවරණය පැමිණ තිබෙන්නේ රටේ ඉතාමත් තීරණාත්මක මොහොතකයි. අපේ රටේ ජනතාවගේ විශලා නැගිටීමක් සිදුවුණා. හිටපු පාලකයින් පන්නා දැම්මා. නමුත් හිටපු ජනාධිපති වෙනුවට නොහිතපු කෙනෙක් ජනාධිපති වෙලා. කැබිනට් එක වෙනුවට විකෘති කැබිනට් එකක් පත්වෙලා. අගමැති වෙනුවට කිස`ිදු තේරුමක් නැති කෙනෙක් අගමැති වෙලා. ඒ නිසා ජනතා මතය දැන් නිරූපනය වෙන්නේ නැහැ. ඒ නිසා ජනතාවගේ ඇත්ත කැමැත්ත පිළිබිඹු කරන ඡන්දයක් බවට මේ ඡන්දය පැවැත්වෙනවා. ජාතික ජන බලවේගය උතුරු නැගෙනහිර ඇතුළු පළාත්පාලන ආයතන 340ක් වෙනුවෙන් තරඟ වදින බවට මේ වෙනකොටත් මැතිවරණ කොමිසමට දැනුම් දීලා තිබෙනවා. ජනාතාවගේ අපේක්ෂාවන් ඉටු කළ හැකි ශක්තිමත් කණ්ඩායමක් ඉදිරිපත් කරනවා. ඒ වගේම අපි ගම සමඟ විශාල දේශපාලන වැඩකොටසක් සිදු කළා. එය සාර්ථක වෙලා තිබෙනවා.
අපේ රට දීර්ඝ කාලයක් ගෙන ගිය දේශපාලන ආර්ථික වැඩපිළිවෙළ වෙනස් විය යුතු බවට ජනතාවගේ අපේක්ෂාවක් තිබෙනවා. ඒ වෙනස්වීම ජාතික ජන බලවේගය නියෝජනය කරනවා. මේ රටේ පුරවැසියන්ගෙන් ඉල්ලා සිටිනවා මේ රට ගොඩනැගීම වෙනුවෙන් අපේක්ෂාවක් තිබෙනවා නම් ඒ සඳහා ජාතික ජන බලවේගය තෝරාගන්න කියලා. මේ මැතිවරණ සටන ජාතික සටනක් බවට පත් කරන්න අපි සූදානම්. මේ පළාත්පාලන මැතිවරණය එතැනින් නතර වෙන්නේ නැහැ. මේ මැතිවරණයෙන් පසුව ජනාධිපතිගේ තරමත් ආණ්ඩුවේ තරමත් ඔවුන්ට මැනගත හැකියි. ආණ්ඩුවටවත් ජනාධිපතිවරයාටවත් ජනවරමක් නැහැ. මේ මැතිවරණ ප්‍රතිඵලයෙන් ඒක සනාථ වෙනවා. ඉන්පසු ආණ්ඩුව පවත්වාගෙන යෑමේ අර්බුදයක් එනවා. ඒ නිසා අලුත් ආණ්ඩුවක් ගොඩනගාගැනීමේ අවස්ථාවක් නිර්මාණය වෙනවා. ජාතික ජන බලවේගය මේ මැතිවරණයේදී පළාත්පාලන ආයතන සැලකිය යුතු ප්‍රමාණයක් ජයග්‍රහණය ලබලා මහ ආණ්ඩුව ගොඩ නැගීමත් ඒ බලය මගින් ජනාධිපතිවරයාගේ බලය සූන්‍ය කිරීම දක්වාත් මේ දේශපලාන සටන සැලසුම් කර තිබෙනවා.
ඒ වගේම රනිල් වික්‍රමසිංහ දැන් අලුත් නාටකයක් ආරම්භ කරලා තිබෙනවා. ඒ තමයි ඡන්ද තියන්න සල්ලි නැහැ කියන කතාව. ඒක අපබ්‍රංශ කතාවක්. පාලකයා ඕනෑම වෙලාවක භාණ්ඩාගාරය හිස් කරලා රටේ ආර්ථිකය විනාශ කරලා ඡන්ද තියන්න මුදල් නැහැ කියලා කියන්න පුළුවන්. අපි කියන්නේ රට විනාශ කරපු, භාණ්ඩාගාරය හිස් කරපු මේ පාලකයින් පන්නා දමන්න අනිවාර්යෙන් ඡන්ද තියන්න ඕනෑ කියලයි. රටක ආර්ථිකය වට්ටපු අයට භාණ්ඩාගාරය හිස් කරපු පාලකයින්ට ඡන්ද තියන්න මුදල් නැහැ කියලා පාලනය දිගටම ගෙනියන්න ඉඩ දෙන්න ඕනැද? රෝහලට බෙහෙත් ටික දෙන්න බැරි නිසා, දරුවන්ට ආහාර වේලක් දීගන්න බැරි නිසා, තරුණ තරුණියන්ට රැකියාවක් දෙන්න බැරි නිසා, ව්‍යාපාර කඩාවට්ටපු නිසා නිෂ්පාදකයින් විශාල ව්‍යසනයකට පත්කරපු නිසා, ධීවර ගොවි ජනතාවගේ ආදායම් මාර්ග අහුරපු නිසා මේ ආර්ථිකය කඩාවට්ටපු පාලකයින් පලවාහරින්න තමයි ඡන්දය ඕනෑ. ජනතාවගේ මතය ප්‍රකාශ කළ යුත්තේ ඒ නිසා. ඡන්දය කල්දැමීම සඳහා ආණ්ඩු දරණ සියලු ප්‍රයත්න පරාජය කරලා ජාතික ජන බලවේගය මේ මැතිවරණයට තරඟ වදිනවා. ඒ වගේම සුවිශේෂී ජයග්‍රහණයක් අත්පත් කර ගන්නවා. එම ජයග්‍රහණය ලංකා ඉතිහාසයේ විශාලම දේශපාලන හැරවුම සිදුවන සුවිශේෂීම පරිවර්තනය සිදුවන මැතිවරණය බවට පත්වේවි. ඒ වෙනුවෙන් සියලු දෙනාට පෙළගැසෙන ලෙස අපි ඉල්ලනවා.
සිරිමන්ත රත්නසේකර
