ජාත්‍යන්තර ක්‍රිකට් කවුන්සිලය (I.C.C.) මගින් සංවිධානය කරන ලෝක ටෙස්ට් ශූරතා තරගාවලිය (World Test Championship) – 2025 යටතේ ශ්‍රී ලංකාව සහ නවසීලන්තය අතර පැවැත්වීමට නියමිත ටෙස්ට් තරග දෙකක් සඳහා නවසීලන්ත ටෙස්ට් ක්‍රිකට් කණ්ඩායම පෙරේදා (14දා) පස්වරුවේ කටුනායක ගුවන්තොටුපළ වෙත පැමිණියහ.
මෙම ටෙස්ට් තරග දෙකම ගාල්ල ජාත්‍යන්තර ක්‍රිකට් ක්‍රීඩාංගණයේදී පැවැත්වීමට නියමිතය. මොවුන් සහභාගි වන පළමු තරගය එළඹෙන 18දා ආරම්භවීමට නියමිත අතර 21 වැනිදා පැවැත්වීමට නියමිත ජනාධිපතිවරණය නිසා එදින නිවාඩු දිනයක් ලෙස ප්‍රකාශයට පත් කර තිබේ. දෙවන තරගය එළඹෙන 26දා ආරම්භ කිරීමට සැලසුම් කර තිබේ.
නවසීලන්ත ටෙස්ට් ක්‍රිකට් කණ්ඩායම ඉන්දියාවේ නවදිල්ලි නුවර සිට ඉන්දීය ගුවන් සේවයේ ඒ.අයි.- 281 දරන ගුවන් යානයෙන් කටුනායක ගුවන්තොටුපළ වෙත පැමිණ තිබුණි.
ඔවුන් පිළිගැනීම සඳහා ශ්‍රී ලංකා ක්‍රිකට් ආයතනයේ නිලධාරීහු පිරිසක් කටුනායක ගුවන්තොටුපළ වෙත පැමිණ සිටියහ.
කටුනායක ටී. කේ. ජී. කපිල
