පළාත් මට්ටමින් ආර්ථිකය හදන්න ‘13’ බලය ඇති – ජනපති යාපනයේදී කියයි

81

පළාත් මට්ටමින් ශක්තිමත් ආර්ථිකයක් ගොඩනැඟීමට ආණ්ඩුක්‍රම ව්‍යවස්ථාවේ 13 වැනි සංශෝධනය මගින් සලසා ඇති බලතල ප්‍රමාණවත් බවත්, ඒ සඳහා මධ්‍යම රජයේ මැදිහත්වීම් සිදු නොකරන බවත් ජනාධිපති රනිල් වික්‍රමසිංහ මහතා පැවසීය. එසේම බලය බෙදීම හුදු දේශපාලන සංකල්පයක් නොව, ආර්ථිකය යථාර්ථයක් විය යුතු බව ද ජනාධිපතිවරයා සඳහන් කළේය.

පළාත් මට්ටමින් ස්වාධීන ආර්ථිකයන් නිර්මාණය කර ගැනීම පිළිබඳ ජපානය, කොරියාව, එක්සත් රාජධානිය සහ ප්‍රංශය වැනි රටවලින් ඉගෙන ගන්නා ලෙස ඉල්ලා සිටින්නේ යැයි ද කී ජනාධිපතිවරයා 13 වැනි සංශෝධනය මගින් ලබා දී ඇති බලතල තම පළාතේ සංවර්ධනය සඳහා සක්‍රීයව භාවිත කරන ලෙස සියලු පළාත්වල මහජන නියෝජිතයන්ගෙන් ඉල්ලා සිටින්නේ යැයි ද කීවේය.

ජනාධිපති රනිල් වික්‍රමසිංහ මහතා මේ බව සඳහන් කර සිටියේ යාපනය දිස්ත්‍රික්කයේ වෘත්තීයවේදීන් සමග ඉකුත් 04 වැනිදා පැවති හමුවකදීය.

සියලු ක්ෂේත්‍ර නියෝජනය කරමින් වෘත්තීයවේදීහු මීට එක්ව සිටියහ. රටේ ආර්ථිකය ශක්තිමත් කිරීමට අදාළව ඔවුන් ඉදිරිපත් කළ යෝජනා සහ මතු කළ ප්‍රශ්නවලට ජනාධිපතිවරයා පිළිතුරු දුන්නේය. ඔවුන් සමඟ සුහද පිළිසඳරකට ද ජනාධිපතිවරයා එක් විය.

2024 – 2025 ශ්‍රී ලංකා ආර්ථිකය ස්ථාවර කෙරෙන වසර දෙකක් බව මෙහිදී පැවසූ ජනාධිපතිවරයා මෙරට ආර්ථික ප්‍රතිපත්තිවල උපායමාර්ගික වෙනසකම් සිදු කරන බව ද කීවේය.

මෙහිදී අදහස් දැක්වූ ජනාධිපති රනිල් වික්‍රමසිංහ මහතා වැඩිදුරටත් මෙසේද පැවසීය.

අප රජයේ ආදායම ඉහළ නංවාගත යුතුව තිබෙනවා. අපට මෙම වසරේදී දළ ජාතික නිෂ්පාදනයෙන් 12%ක ආදායමක් ලබා ගැනීමට සිදු වෙනවා. එය අවසන් කිරීමට තිබෙන්නේ 15%ක ඉලක්කයකින්.

ඒ නිසයි අපට මෙම වසරේදී වැට් බද්ද වැඩි කිරීමට සිදු වුණේ. ප්‍රමාණවත් ආදායමක් ලැබෙන ආර්ථිකයක් රටට තිබිය යුතුයි. ඒ වගේ අපි අයවැය සඳහා මුදල් වෙන් කළ යුතුයි. සංවර්ධනයට මුදල් වෙන්කළ යුතුයි. ඒ වගේම අපේ අවශ්‍යතා වෙනුවෙන් මුදල් වෙන් කළ යුතුයි.

විශාලම ගැටලුව වන්නේ අපේ ආදායමෙන් වැඩි ප්‍රමාණයක් ණය පොලී ගෙවීම සඳහා වියදම් කිරීමට සිදුවීමයි. මේ පිළිබඳ අප සියලු දෙනාම වගකිව යුතුයි. මොකද අවශ්‍යතාවන් තෘප්තිමත් කිරීම සඳහා රජයන් තමන්ගේ හැකියාවන් ඉක්මවා වියදම් කළා. මේවා නිවැරදි කරගෙන අප ඉදිරියට යා යුතුයි. ඒ නිසා අපිට අලුත් ආර්ථිකයක් අවශ්‍යයි. අපි සැලසුම් සහගතව රට තුළ එම ආර්ථිකය ගොඩනගමින් සිටිනවා.

එය රැකියා උත්පාදනය කරන ආර්ථිකයක් වගේම විදේශ විනිමය අතිරික්තයක් ලබා දෙන, අතිරික්ත ආදායමක් ලබා දෙන ආර්ථිකයක් විය යුතුයි. එහිදී අපනයන පදනම් කරගත් කෘෂි ආර්ථිකයක් පිළිබඳ අප විශ්වාස තබා තිබෙනවා.

උතුරු පළාත සුවිශේෂී ආර්ථික කේන්ද්‍රස්ථානයක් ලෙස ගොඩනැගීමට හැකියාව තිබෙනවා. ඒ වගේම පුනර්ජනනීය බලශක්ති කේන්ද්‍රස්ථානයක් ලෙස උතුර ගොඩනැඟිය හැකියි. උතුරු පළාත සංවර්ධනයට අවශ්‍ය සියලු සම්පත් එහි තිබෙනවා. උතුර පමණක් නොව රටේම සංවර්ධනයට එය දායක කරගත හැකියි.

ඒ සඳහා දැනටමත් ප්‍රමාණවත් තරම් බලය බෙදීමක් සිදුව තිබෙනවා. 13 වන සංශෝධනය හරහා ලැබී තිබෙන බලතල එම කටයුතු සඳහා ප්‍රමාණවත් කියා අප සිතනවා.

කොළඹින් මුදල් එනතුරු බලා නොසිට සියලු දෙනා එක්ව මෙම වැඩපිළිවෙළ ක්‍රියාත්මක කරන ලෙස මම ඉල්ලා සිටිනවා.

ජපානය කෙරෙහි අවධානය යොමු කළහොත් ජපානය ෆෙඩරල් රාජ්‍යයක් නෙවෙයි. නමුත් එහි සියලු පළාත් සංවර්ධනය වී තිබෙනවා. ඒ වගේම කොරියාව, එක්සත් රාජධානිය, ස්කොට්ලන්තය එම දියුණුව ලබාගෙන තිබෙනවා. ඒසේ නම් ඇයි අපට රටක් ලෙස අපේම ආර්ථිකයක් ගොඩනඟාගත නොහැකි.

බලය බෙදීම ගැන කතා කරනවා වගේම, එම බලතල තම පළාත්වල දියුණුවටත්, රටේ දියුණුවටත් යොදා ගත යුතුයි. අපි දේශපාලනික වශයෙන් බලය බෙදීම පිළිබඳ කතා කරනවා. නීතියෙන් මෙම සියලු බලතල ලබා දිය හැකිය. නමුත් ඔබගේ පළාත දියුණු කිරීමට අවශ්‍ය තරම් මුදල් නැති නම් එහි ඇති වටිනාකම කුමක්ද කියා අප විමසා බැලිය යුතුයි.

බලය බෙදීම පිළිබඳ අපට විවිධ අදහස් ප්‍රකාශ කළ හැකියි. නමුත් අද වන විට තමන්ගේ වියදම තමන්ට ම සලසා ගැනීමට හැකියාවක් තිබෙන්නේ බස්නාහිර පළාතට පමණයි. ඒ අනුව අනෙක් සියලුම පළාත් බස්නාහිර පළාතට සම්බන්ධ වෙනවා. එසේනම් තමන්ගේ පළාත දියුණු කිරීමට තම පළාත් තුළින්ම ශක්තිමත් විය යුතුයි.

මේ අතර ඉන්දියාවේ තමිල්නාඩු ප්‍රාන්තයේ “’Zee Tamil” නාලිකාව විසින් සංවිධානය කළ “little champs 2023” රියැලිටි තරගයේ කිරුළ හිමිකරගත් කිල්මීෂා උදයශීලන් දියණිය, සිය පවුලේ සාමාජිකයන් සමග මෙහිදී ජනාධිපති රනිල් වික්‍රමසිංහ මහතා හමු විය.

14 හැවිරිදි කිල්මීෂා උදයශීලන් දියණිය යාපනය ප්‍රදේශයේ පදිංචිකාරියක වන අතර ශ්‍රී ලාංකික දැරියක ඉන්දීය රියැලිටි තරගයක ජය හිමිකරගත් පළමු අවස්ථාව ද මෙය වේ.

කිල්මීෂා උදයශීලන් දියණිය රටට ලබාදුන් කීර්තිය අගයමින් ඇය වෙත සුබපැතුම් පළ කළ ජනාධිපතිවරයා ඇයගේ ඉදිරි අධ්‍යාපන මෙන්ම සංගීත දිවිය ද සාර්ථක කර ගැනීමට සිය ආශිර්වාදය පළ කළේය.

කිල්මීෂා උදයශීලන් දියණිය මෙහිදී ජනාධිපතිවරයා ඉදිරියේ ගීතයක් ද ගායනා කළාය.

ඇමැති ඩග්ලස් දේවානන්දා, පාර්ලිමේන්තු මන්ත්‍රීවරුන් වන වජිර අබේවර්ධන, අංගජන් රාමනාදන්, උතුරු පළාත් ආණ්ඩුකාර පී. එස්. එම්. චාල්ස්, ජනාධිපති ලේකම් සමන් ඒකනායක යන මහත්ම මහත්මින් ඇතුළු පිරිසක් ද මෙම අවස්ථාවට එක්ව සිටියහ.

advertistmentadvertistment
advertistmentadvertistment