වවුනියාව නෙළුම්කුලම පොලිස් වසමේ කලෛමහල් විද්‍යාලය අසල පෙරේදා (10දා) සවස දෙපාර්ශ්වයක් අතර ඇති වූ ආරවුලක් අතරතුර එක් පුද්ගලයකු මාර්ගයට විසිවී ධාවනය වූ වාහනයකට ගැටී සිදුවූ අනතුරකින් මියගොස් ඇත.
පුද්ගලයන් තිදෙනකු මාර්ගය ආසන්නයේ ආරවුලක් ඇතිකර ගෙන එකිනෙකා පොරබදිමින් සිටියදී එක් පුද්ගලයකු විසිවී ගොස් මාර්ගයේ ගමන් කළ වාහනයක ගැටීමෙන් අනතුර සිදුවී ඇත. අනතුරින් තුවාල ලැබූ පුද්ගලයා වවුනියාව රෝහලට ඇතුළත් කර ප්‍රතිකාර ලබමින් සිටියදී මියගොස් ඇතැයි පොලිසිය පවසයි. නෙරියකුලම් ප්‍රදේශයේ පදිංචි 30 හැවිරිදි අයකු මෙසේ මියගොස් තිබේ.
සිද්ධිය සම්බන්ධයෙන් වවුනියා පොලිසිය මගින් පුද්ගලයන් දෙදෙනකු අත්අඩංගුවට ගෙන ඇති අතර අනතුර සිදුකළ වාහනය හා එහි රියැදුරු පලාගොස් ඇත. එම වාහනය සහ රියැදුරු අත්අඩංගුවට ගැනීමට වවුනියාව පොලිසිය වැඩිදුර විමර්ශන ආරම්භ කර තිබුණි.
චමින්ද සිල්වා
