මධ්‍යම පළාත් පාසල් ක්‍රීඩා නෙට්බෝල් තරගාවලියේ අවුරුදු 16 න් පහළ ශූරතාව දිනා ගැනීමට මහනුවර හිල්වුඩ් විදුහල නියෝජනය කළ ක්‍රීඩීකාවෝ සමත් වූහ. කටුගස්තොට ශාන්ත අන්තෝනි බාලිකා විද්‍යාලයීය ක්‍රීඩාංගණයේ දී ක්‍රියාත්මක කෙරුණු මෙවර තරගාවලියේ අනුශූරතාව මහනුවර මහාමායා බාලිකා විදුහලට හිමිවන අතර වාරයේ දී තෙවැනි ස්ථානය තහවුරු කර ගැනීමට මහනුවර යහපත් එඬේරාගේ කන්‍යාරාමයට හැකි විය.
අවසන් පූර්ව වටයේ දී හිල්වුඩ් විදුහල හමුවේ කූඹියන්ගොඩ සුජාතා බාලිකා විදුහල ද මහනුවර මහාමායා බාලිකා විදුහල හමුවේ මහනුවර යහපත් එඬේරාගේ කන්‍යාරාමය ද පරාජය ලැබීය.
අධ්‍යාපන අමාත්‍යංශයේ මෙහෙයවීමෙන් ඉදිරියේදී ක්‍රියාත්මක කිරීමට නියමිත 38 වැනි සමස්ත ලංකා පාසල් ක්‍රීඩා උළෙලට සුදුස්සන් තෝරා ගැනීමේ අරමුණ ඇතිව මෙම තරගාවලිය ක්‍රියාත්මක කෙරුණි.
අනුරුද්ධ හේරත් බණ්ඩාර
