මන්නාරම ප්‍රදේශයේ සුළං විදුලි බලාගාරයක් ඉදිකිරීමට ඉන්දියාවේ අදානි සමාගමට ලබාදීමට අමාත්‍ය මණ්ඩලය ගෙන ඇති තීරණය බලරහිත කරන ලෙස ඉල්ලා ගොනු කර ඇති මූලික අයිතිවාසිකම් පෙත්සම් පහ විභාගයට ගැනීමට ශ්‍රේෂ්ඨාධිකරණය ඊයේ (02දා) අවසර ලබා දුන්නේය.
වනජීවී හා ස්වභාව සම්පත් ආරක්‍ෂක සංගමය, පරිසර යුක්ති කේන්ද්‍රය ඇතුළු පාර්ශ්ව පහක් ගොනු කර තිබූ එම පෙත්සම එස්. තුරෙයිරාජා, ඒ. එච්. එම්. ඩී. නවාස් සහ ශිරාන් ගුණරත්න යන ත්‍රිපුද්ගල විනිසුරු මඩුල්ල හමුවේදී කැඳවිණි.
මධ්‍යම ආසියානු පියාසර මාර්ගයේ දකුණු දෙසින් පිහිටි ගමනාන්තයක් වන ශ්‍රී ලකාවේ මන්නාරම ප්‍රදේශය සංක්‍රමික පක්‍ෂීන් සඳහා වැදගත් කේන්ද්‍රස්ථානයක් බවත් මිලියනයක පමණ පක්‍ෂීන් සීත සෘතුව ගෙවීමට එම භූමියට පැමිණෙන බවත් පෙත්සම්කරුවන් සිය පෙත්සම් මගින් ශ්‍රේෂ්ඨාධිකරණයට කියා තිබිණි.
මෙම සුළං විදුලි ව්‍යාපෘතිය සඳහා මන්නාරම කණ්ඩතිව් දූපත් ප්‍රදේශය තෝරාගෙන ඇත්තේ දේශපාලනික හා අනෙකුත් අවශේෂ බාහිර කරුණු මත බවත් ඒ සඳහා විද්‍යාත්මක හෝ පාරිසරික ඇගයීම් සිදු කර නොමැති බවත් සිය පෙත්සම් මගින් අධිකරණයට කියා තිබූ
පෙත්සම්කරුවන් එබැවින් අමාත්‍ය මණ්ඩලයේ තීරණය බලරහිත කරනා ලෙසත් ඉල්ලා තිබිණි. පෙත්සම ලබන ඔක්තෝබර් 14 වැනිදා යළි කැඳවීමට නියමිතය.
ජනාධිපති නීතිඥ සංජීව ජයවර්ධන මහතා පෙත්සම්කරුවන් වෙනුවෙන් පෙනී සිටියේය. අදානි සමාගම වෙනුවෙන් ජනාධිපති නීතිඥ රොමේෂ් ද සිල්වා මහතා පෙනී සිටියේය. නියෝජ්‍ය සොලිසිටර් ජනරාල් ආචාර්ය අවන්ති පෙරේරා මහත්මිය නීතිපතිවරයා නියෝජනය කළාය.
ඒ. ජේ. ඒ. අබේනායක
