සර්වපාක්‍ෂික රජයකට යෝජනා අද පක්‍ෂවලට – ජනපති කියයි

87

සර්ව පාක්‍ෂික ආණ්ඩුවක් සඳහා දේශපාලන පක්‍ෂ සමඟ දින ගණනාවක් සිදුකළ සාකච්ඡාවලදී ඒ ඒ පක්‍ෂ ඉදිරිපත් කළ යෝජනා අද (08 දා) සහභාගි වූ සියලු පක්‍ෂවලට පොදුවේ ලබාදෙන බව ජනාධිපති රනිල් වික්‍රමසිංහ මහතා පැවසීය.

සර්ව පාක්‍ෂික ආණ්ඩුවක් පිහිටුවීම සඳහා පාර්ලිමේන්තුවේ ස්වාධීන පක්‍ෂ 11 නායකයන් සහ 43 වන සේනාංකය සමඟ පසුගිය සිකුරාදා (05 දා) ජනාධිපති කාර්යාලයේ පැවැති සාකච්ඡාවලදී ජනාධිපතිවරයා මේ බව සඳහන් කළේය.

ජනතා විමුක්ති පෙරමුණ, ජාතික ජන බලවේගය සහ තවත් දෙමළ දේශපාලන පක්‍ෂ කිහිපයක් සමඟ පමණක් ඉදිරියේදී සාකච්ඡා කිරීමට ඉතිරිව ඇති බව පෙන්වා දුන් රනිල් වික්‍රමසිංහ මහතා ජනතා අපේක්‍ෂා වෙනුවෙන් දේශපාලන මතවාද පසෙකලා සර්ව පාක්‍ෂික ආණ්ඩුකරණයට සැමගේ උද්යෝගය පැසසීමට ද ලක්කළේය.

19 වැනි ආණ්ඩුක්‍රම ව්‍යවස්ථා සංශෝධනය නැවත ගෙනඒම සම්බන්ධයෙන් ජනාධිපතිවරයාගේ ස්ථාවරය සමඟ 43 වන සේනාංකය සුභවාදීව කටයුතු කරන බවත් රාජ්‍ය ආයතන සඳහා ප්‍රධානීන් පත් කිරීමේදී දේශපාලන පක්‍ෂ ක්‍රමය අමතක කොට වෘත්තිකයන් පත්කිරීමේ අවශ්‍යතාව දැඩිව පවතින බවත් 43 වන සේනාංකයේ පාර්ලිමේන්තු මන්ත්‍රී චම්පික රණවක මහතා කියා සිටියේය.

දේශපාලන ප්‍රතිසංස්කරණවලින් පමණක් රටක් ගොඩනැඟිය නොහැකි බව කියා සිටි චම්පික රණවක මහතා, වෘත්තීය නිපුණතාව සහිත පුද්ගලයන්ගේ දායකත්වය ඊට ප්‍රධාන සාධකයක් කරගත යුතු බව ද පැවසීය. අධ්‍යාපන ප්‍රතිසංස්කරණවලදී අනාගත ලෝකය දෙස බලා විෂය නිර්දේශ සැකසිය යුතු බව ද ඒ මහතා පැවසීය.

රට ගොඩනඟන පොදු වැඩපිළිවෙළක් සකස් කිරීමෙන් පියවරෙන් පියවර ඉදිරියට යා හැකි බව පාර්ලිමේන්තු මන්ත්‍රී වාසුදේව නානායක්කාර මහතා සඳහන් කළේය.

සියලු දේශපාලන පක්‍ෂවල අනන්‍යතාව සර්ව පාක්‍ෂික ආණ්ඩුකරණ සාකච්ඡාවේදී ආරක්‍ෂා විය යුතු බව පෙන්වා දුන් පාර්ලිමේන්තු මන්ත්‍රී උදය ගම්මන්පිල මහතා, පදනම් ලේඛනයක් සහිතව සාකච්ඡා ඉදිරියට යෑමෙන් සර්ව පාක්‍ෂික ආණ්ඩුව පිළිබඳ අපේක්‍ෂා සාර්ථක කර ගැනීමට ඉවහල් කරගත හැකි බව කීය.

හිටපු ජනාධිපති ගෝඨාභය රාජපක්‍ෂ මහතා සමඟ ද සිය කණ්ඩායම සර්ව පාක්‍ෂික ආණ්ඩුවක් සඳහා පොදු වැඩපිළිවෙළක් සාකච්ඡා කළ බවත්, දේශපාලන පක්‍ෂ ප්‍රතිපත්තිවලට එකඟ විය නොහැකි වුවත් පොදු සම්මුතියකට එකඟ වැඩපිළිවෙළක් අවශ්‍ය බවත් පාර්ලිමේන්තු මන්ත්‍රී මොහොමඩ් මුසම්මිල් මහතා පැවසීය.

අග්‍රාමාත්‍ය දිනේෂ් ගුණවර්ධන, පාර්ලිමේන්තු මන්ත්‍රීවරුන් වන මහාචාර්ය තිස්ස විතාරණ, අසංග නවරත්න, ප්‍රේමනාත් සී. දොලවත්ත, හිටපු මන්ත්‍රී කරු පරණවිතාන, ජනාධිපති ලේකම් සමන් ඒකනායක, ජනාධිපති අතිරේක ලේකම් නීතිඥ චමින්ද කුලරත්න යන මහත්වරු මෙම සාකච්ඡාවට එක්ව සිටියහ.

චමින්ද සිල්වා

advertistmentadvertistment
advertistmentadvertistment