විදේශ ගතවීමට ගිය අජාන් බ්‍රහ්මවංශෝ හිමියන්ට පසුගිය දිනෙක කටුනායක ගුවන්තොටුපොළේදී විඳීමට සිදු වූ අපහසුතාව ගැන උන්වහන්සේගෙන් විෂය භාර අමාත්‍යවරයා ලෙස තමන් සමාව අයැද සිටින බව වරාය, නාවික හා ගුවන් සේවා අමාත්‍ය නිමල් සිරිපාල ද සිල්වා මහතා පාර්ලිමේන්තුවේදී ඊයේ (06දා) පැවසීය.
තමා යටතේ පවතින ආයතනයකින් යම් වැරැද්දක් සිදුවී ඇත්නම් එය පිළිගෙන ඉදිරියේදී එවැනි සිදුවීම් ඇති නොවීමට වගබලා ගැනීම වගකීමක් බවද ඔහු සඳහන් කළේය. මේ සම්බන්ධයෙන් පරීක්ෂණයක් පවත්වන ලෙස ජනාධිපති රනිල් වික්‍රමසිංහ මහතා ඉල්ලීමක් කළ බවත් ඒ පරීක්ෂණය සඳහා ශ්‍රී ලංකා ගුවන් සේවා අධිකාරිය පත් කර ඇති බවත් අමාත්‍යවරයා කීවේය.
එම පරීක්ෂණයේදී අතපසුවීම සිදු වූයේ කාගේ අතින්දැයි දැනගත හැකි බවද ඇමැතිවරයා පැවසීය. නිමල් සිරිපාල ද සිල්වා මහතා එහිදී මෙසේද කීය.
අද රටේ කොහේ හරි සිද්ධියක් වුණාම මාධ්‍ය කරන්නේ ඒකට දේශපාලනඥයෙක් පටලවාගන්න එක. එදා අගමැතිතුමා ගියේ වෙනම පර්යන්තයකින්. එතුමා ඒ පැත්තට ආවේවත් නෑ. මම හිටියේ වෙන පර්යන්තයක. මුලින්ම අගමැතිතුමාට මඩ ගැහුවා. පස්සේ මට මඩ ගැහුවා. මේ නිසා තමයි මාධ්‍ය නියාමන පනතක් මේ රටට අවශ්‍ය වෙන්නේ. මාධ්‍ය වල්බූරු විදිහට හැසිරෙන කොට වැඩ කරන්නේ කොහොමද? අපේ වැරදි පෙන්වලා දෙන්න. ඒත් ප්‍රවෘත්ති හදන්න එපා. තියෙන ප්‍රවෘත්තිය විකාශනය කරන්න. මේ සිද්ධියේදී සමහර මාධ්‍ය ආයතන වගකීමෙන් තොරව කටයුතු කළා. රටට ඇති වෙච්ච අපකීර්තියට ඒ මාධ්‍ය ආයතන වගකියන්න ඕනෑ.
මහජන ආරක්ෂක අමාත්‍ය ටිරාන් අලස් මහතා:
ඔය සිද්ධිය වෙච්ච වෙලාවේ එස්ටීඑෆ් ප්‍රභූ ආරක්ෂකයින් ගුවන් තොටුපොළ ඇතුළේ හිටියේ නෑ. ඔවුන් ආයුධ සමග ඇතුළට ගිහින් හිටියේ නෑ. ඔවුන් හිටියේ එළියේ. ප්‍රභූවරයකු සමග පැමිණි ආරක්ෂකයන් ඉඳලා තියෙන්නේ එළියේ. උන්වහන්සේට පිටත් වීමට බාධා වෙලා තියෙන්නෙ ඒ හේතුව නොවෙයි. උන්වහන්සේ කලින් ඇවිල්ලා ඉඳගෙන හිටියා. නමුත් නිලධාරීන් ප්ලේන් එකට ගෙනියන්න පරක්කු වුණා. අන්තිමේදී ප්ලේන් එක ගිහිල්ලා. ඒකයි වෙලා තියෙන්නේ. එහෙම වෙලා තියෙන්නෙ ආරක්ෂක අංශ නිලධාරීන් පිරිසක් නිසා නොවෙයි.
අකිත පෙරේරා, රනිල් ධර්මසේන
