නිවසක් සෑදීමට ඉඩමක් මිලදී ගැනීමේ සිට නිවස සාදා පදිංචි වීම දක්වා කිරීම දක්වා සියලු වාස්තු විද්‍යාත්මක කරුණු ඇතුළත්, ඔබේ නිවසේ වාස්තු ඔබටම පරීක්ෂා කර කර ගත හැකි වන සේ සරලව සැකසූ ලිපි පෙළක් අද සිට සතිපතා පළ වේ. මේ එහි පළමු වැන්නයි.
නිවසක් සෑදීමට ඉඩමක් තෝරා ගැනීමේදී ප්‍රථමයෙන්ම එහි පාරිසරික සාධක හා නීතිමය නිරවුල් භාවය සලකා බැලිය යුතුය. අනතුරුව වාස්තු විද්‍යානුකූලව පූර්වාචාරීන් විසින් පෙන්වා දී ඇති කරුණු පිළිබඳව සැලකිලිමත් විය යුතුය. එහිදී ඉඩමේ පෘෂ්ඨය පිළිබඳව අවධානය යොමු කළ යුතුය. විශ්වයෙන් ගලා එන ශක්ති කදම්බයන් පෘථිවි තලය තුළට උරා ගනු ලබන්නේත්, පරාවර්තනය කරනු ලබන්නේත් පෘෂ්ඨයේ ස්වභාවයට සාපේක්ෂව බැවින් ඉඩම තුළ රැඳෙන විසිරෙන සහ පරාවර්තනය කරනු ලබන ශක්ති කදම්බයන් තුළින් ශුභ ඵල මෙන්ම අශුභ ඵලද උදා කරයි.
සුබ පල උදාකරන පෘථිවි පෘෂ්ඨ
භද්‍රාසන භූමිය
මේවා ආසනයක් බඳු පෙනුමකින් යුක්ත මැද සතරැස්ව, උස්ව පිහිටි භූමි වේ. එබඳු භූමිවල ඉදිකරන නිවස රජ මාලිගාවක තත්ත්වයට පත්වන බවත් ගෙහිමියා සියලු සැප සම්පතින් ආඪ්‍යව දූ දරු සම්පත් ලබමින් ගෞරවයෙන් ජීවත් වන බවත් වාස්තු විද්‍යාවේ දැක්වේ.
ශිඛාකාර භූමිය.
වට ප්‍රදේශය උස්ව, මැද බේසමක හැඩය ගන්නා මෙබඳු භූමි නිවාස ඉදිකිරීමට සුදුසු වන ජය භූමියක් ලෙස දැක්වෙන අතර සතුරු කරදරවලින් තොර ව සැපසේ ජීවත් විය හැකිය.
ජලතලාකාර භූමිය
ජල තලාවක් සේ සම මට්ටමින් යුතු මෙබඳු භූමියක ඉදි කරන ලද නිවසක වාසය කරන නිවැසියන්ට දීර්ඝායුෂ මෙන්ම රාජ සම්මාන හිමිවේ.
ගංගාකාර භූමිය
ඉදිරි කොටස පුළුල්ව ද, පසු කොටස පටුව ද ක්‍රමානුකූලව බෑවුම් වී ඇති මෙම භූමියේ ඉදි කරන ලද නිවසක වාසය ධනලාභ හිමි වීමට හේතු වෙයි මෙබඳු වූ භූමි වලට දේවාශිර්වාදය හිමි වේ.
තුර්වාකාර භූමිය
මෙබඳු භූමි සතර දෙසින් ක්‍රමානුකූලව බෑවුම් වී, මැද කොටස සමතලාව පිහිටා ඇත කාන්තාවන්ට වඩා සුබදායක වන අතර ගෘහ ජිවිතය සතුටින් ගත කළ හැකි වේ.
වරහාකාර භූමිය
පසුපස සිට ඉදිරිපසට ක්‍රමයෙන් බෑවුම් වී ඇති මෙබඳු භූමිද සුබපල දෙයි. නීරෝගිමත් බව හා ආයුෂ මෙබඳු භූමි වල වාසය කිරීමෙන් ලැබේ.
චතුර්කෝණ භූමිය
මැද උස් ව, සිව් දෙසට ක්‍රමයෙන් බෑවුම් වන මෙම භූමිය කෙටි කාලයක් ජීවත් වීමට සුදුසු වුවත් පරම්පරා කිහිපයකට වාසය කිරීමට සුබ නොවේ.
අසුබ ඵල උදා කරන පෘථිවි පෘෂ්ඨ
කුම්භකාර භූමිය
කළයක හැඩය ගන්නා මෙබඳු භූමිවල වාසය කරන නිවැසියන්ගේ ශරීර සෞඛ්‍ය දුර්වල වීම, නිතර අඬදබර ඇති වීම වැනි අසුබතා යෙදේ.
කුර්ම පෘෂ්ඨ භූමිය
සතර දිසාවට බෑවුම විහිදෙන මෙම භූමි වලට අණවින, කොඩිවින අමනුෂ්‍ය දෝෂ ආදිය ඉතා ඉක්මනින් බලපාන බැවින් පදිංචියට නුසුදුසු ලෙස සැළකේ.
සිංහාකාර භූමිය
ඉදිරිපස ක්‍රමානුකූලවද පිටුපස දැඩි ලෙසද බෑවුම් වන සේ පිහිටි මෙබඳු භූමි මුල් කාලයේ සුබපල දුන්නත් පසුකාලීනව පිරිහීම ඇති කරන බැවින් පදිංචියට යෝග්‍ය නොවේ.
වාසයට සුදුසු සුබ භූමි තෝරා ගැනීමේදී ඉඩම බෑවුම් වන දිසාව ගැනද සැලකිලිමත් විය යුතුය. මෙහිදී පොළොව මතට වැටෙන දිය පහර ගලා එන දිශාවන් අනුව බෑවුම තීරණය කළ යුතුය. උතුරු දිසාවට බෑවුම් වන භූමි පදිංචියට ඉතා සුදුසු ය. එම නිවාස දිනෙන් දින දියුණුවට පත්වන අතර සැප සම්පත් ලබා දෙන වාසනාවන්ත භූමි වේ.
දකුණට බෑවුම් වන භූමි හදිසි අනතුරු, අපල උපද්‍රව වලට නිතර ලක් වන අතර බටහිරට බෑවුම් වන නිවාස වල වාසය කරන්නන්ට නිතර ශෝක ජනක සිදුවීම් වලට මුහුණ පෑමට සිදුවේ. දූ දරුවන්ට ද සුබ නැත. ගිනිකොණට බෑවුම් වන භූමි වල නිතර අඬදබර, කරදර ගිනි භය ආදී ඇති වන අතර වයඹ දෙසට බෑවුම් වන භූමි සමපල උදා කරයි. මේ අනුව පදිංචියට වඩාත් සුදුසු වන්නේ උතුරට, ඊසානට සහ නැගෙනහිරට බෑවුම් වන භූමි වේ.
ජ්‍යොතිෂවේදී හා වාස්තු විද්‍යා
උපදේශක, විදුහල්පති,
දේශබන්දු, දේශමාන්‍ය ආචාර්ය
කපිල ඉන්ද්‍රික ගුණදාස
මාලිබොඩ, දැරණියගල.
074 1838000
