ඔබේ රිය අනතුර සැබෑවක් නොවේ… පරණ සෙල්ලමක් අලුත් වෙලා සල්ලි ගන්නේ මෙහෙමයි…
ඔබත් යතුරු පැදියක්, වාහනයක් හිමි අයෙක්ද? නැතහොත් රියදුරෙක්ද? එසේ නම් කොළඹ නගරය ආශ‍්‍රිත ප‍්‍රදේශවලදී ප‍්‍රවේසම්වන්න. කොළඹ ගැටකපන්නන්ගේ පැරණි වැඩක් අලූත් මුහුණුවරකින් යළිත් කරළියට පැමිණ ඇත. එම කතාව සැකෙවින් මෙසේය.
පසුගිය මස 28 වැනි දින පොලිස් නිලධාරියෙක් තම මෝටර් රථයෙන් පෞද්ගලික ගමනක් ගියේය. වසර ගණනක සිට ඔහු කොළඹ රථවාහන අංශයට අනුයුක්තව සේවය කරන නිලධාරියෙකි. දෙමටගොඩ පසුකර ඛෙත්තාරාම මාර්ගය දෙසට ඔහු මෝටර් රථය ධාවනය කළේය. ඔහුට එලෙස ධාවනය කිරීමට හැකිවූයේ සුළු දුරකි. කොහේදෝ සිටි පැමිණි පුද්ගලයකු මෝටර් රථයේ වම්පස ප‍්‍රදේශයේ වැදුණි. වහාම ඔහු තිරිංග තදකර මෝටර් රථය නතර කර ගත්තේය.
තප්පර කිහිපයක් ඇතුළත සිදුවූයේ කුමක්ද කියා ඔහුට සිතා ගැනීමටවත් නොහැකි විය. එහෙත් ක්ෂණිකවම ඔහුගේ සිතට මෙවැනි සිතුවිලි කිහිපයක් ගලාගෙන ආවේය.
”මෙහෙම අනතුරක් කොහොමවත් සිදු වෙන්න බැහැ. වේගයෙන් ආවෙත් නැහැ. ඉදිරිපස පාර මාරු වෙන්න වත් කවුරුත් හිටියේත් නැහැ. කොහොමද මගේ කාර් එකේ මෙහෙම මිනිහෙක් වැදුනේ. කමක් නෑහැ මුලින්ම ලෙඩාට මොකද කියල බලන්න ඕනා.”
පොලිස් නිලධාරියකු වුවත් එක්වරම සිදු වූ අනතුරින් ඇති වූ කම්පනයත් සමග ඔහු මෝටර් රථයෙන් එළියට පිවිස වැටී සිටි පුද්ගලයා ළඟට පැමිණියේය. ඔහු ළඟට පැමිණෙනවාත් සමගම වැටී සිටි පුද්ගලයා මෙලෙස බෙරිහන් දුන්නේය.
”අම්මෝ ඉවසන්න බැහැ. මගේ තුනටියයි අතයි හොඳටම රිදෙනවා. නැගිට ගන්නවත් බැහැ. බලන්න සර් ඔයා කරපු අපරාදය. මම කුලී වැඩක් හොයාගෙන යන ගමන් හිටියේ. සර්ලා වගේ අපිට සල්ලි නැහැ. එදා වේල හොයාගෙන තමයි දරු පවුල නඩත්තු කරන්නේ.”
”හරි දැන් කෑ ගහන්න එපා. මම දැනගෙන කරපු දෙයක් නොවෙයි. ඉස්සෙල්ලා බෙහෙත් ටිකක් ගන්න යමු.”
පොලිස් නිලධාරියා එලෙස පවසනවාත් සමග එම ස්ථානයට තවත් කිහිපදෙනෙකු පැමිණියේය. එලෙස පැමිණි පුද්ගලයෝ මෙලෙස පැවසූහ.
”බලන්න සර් මේ අහිංසකයාට කරලා තියෙන අපරාධය. වාහන එලවන්නේ මෙහෙමද. පේනවා නේද මේ මනුස්සයාට කොච්චර අමාරුද කියලා. සර්ලාට සල්ලි තියෙනවා. ඒත් මේ අහිංසක මනුස්සයට කාගෙ සරණක් ද?. කුලී වැඩ කරලා තමයි පවුල නඩත්තු කරන්නේ.”
”මාස ගාණක් දැන් ඇඳට වෙලා ඉන්න වෙයි. සර්ලා මොනවා හරි කියලා පැනලා යයි. ඊට පස්සේ මේ මනුස්සයයි දරු පවුලයි ඉන්න ඕනා බඩගින්නේ.”
”වැරදි කරලා බේරෙන්නත් හදන්න එපා. ඒක නිසා මේ ලෙඩාට බෙහෙත් ගන්නයි සතියක් දෙකක් ජීවත් වෙන්නයි සල්ලි ටිකක් දීලා මේක ගොඩින් බේර ගෙන යන්න. පොලිසි ගියත් කරදර ගොඩයිනේ. ඊට වඩා වරද කරලා තියෙන්නේ සර්.”
”අපි ලෙඩා ගැන බලාගන්නම්. හොස්පිට්ල් එක්කන් ගිහිල්ලා බෙහෙත් අරන් දෙන්නම්. සල්ලි ටික විතරක් දීලා සර්ගෙ ගමන යන්න. අපරාදේ පොලිසි ගිහින් චාටර් වෙන්න ඕනෙත් නැහැනේ. සර්ම දන්නවනේ වරද ඔයාගේ අතේ කියලා.”
ඒ අතර වැටී සිටි පුද්ගලයා තුනටිය සහ අතපය රිදෙන බව පවසමින් නොනවත්වාම විලාප දුන්නේය. ඒ විලාපය ට අනුව වටවී සිටි පිරිස අතරින් කිහිප දෙනෙක් තව තවත් එම පොලිස් නිලධාරියාට දොස් නැගූහ.
වසර ගණනක් කොළඹ නගරය ආශ‍්‍රිතව රථවාහන රාජකාරියේ යෙදී සිටින එම පොලිස් නිලධාරියාට සිදුවූයේ කුමක්ද කියා පසුව වැටහුණි. ඒ සමගම ඔහු මෙලෙස පැවසුවේය.
”උඹලා හිතන්නෙ මම හරකෙක් කියලද?. උඹලා එකතුවෙලා ලස්සනට ගහන ගේම මම දන්නේ නැහැ කියලා හිතුවාද. මමත් ටිකක් බලන් හිටියේ උඹලගෙ හැසිරීම ගැන තමයි. යකෝ මම අවුරුදු පහළොවක ඉඳන් රාජකාරි කරන්නේ කොළඹ. තවමත් එහෙම තමයි. උඹලට වඩා හොඳ අයියලා එක්ක මම හැප්පිලා තියනවා. උඹලට බැහැ මාව තම්බන්න. කෝ මේ තුනටිය කැඩිච්ච එකා. වරෙන් මම හොඳ කරලා දෙන්නම්.”
තර්ජනාත්මක ස්වරූපයෙන් එලෙස පැවසූ පොලිස් නිලධාරියා වැටී සිටි පුද්ගලයා අසලට පැමිණියේ ඔහු අත්අඩංගුවට ගැනීමටයි. එහෙත් ඔහුට එසේ කිරීමට නොහැකි විය. වැඬේ වැරදුණු බව දැනගත් වැටී සිටි පුද්ගලයා එම ස්ථානයෙන් පැන දිව්වේය. ඒ සමගම ඔහු වෙනුවෙන් පෙනී සිටි පුද්ගලයින්ද හෙමින් සීරුවේ එම ස්ථානයෙන් මාරු වූහ.
අත්දැකීම් සහිත පොලිස් නිලධාරියකු නිසා එදින එම ගැටකපන්නන් ගෙන් ඔහු බේරුණි. එහෙත් එම ගැටකපන්නන්ට හසු වූ පිරිස කොපමණදැයි යන්න අපට කිව නොහැකිය. විශේෂයෙන්ම ඔවුන්ගේ ප‍්‍රධාන ඉලක්කය බවට පත්වන්නේ කාන්තා පාර්ශ්වයයි. යළිත් කලක සිට එවැනි වංචනිකයන් කොළඹ අවට ප‍්‍රදේශවල බහුලව දක්නට ලැබේ.
බලහත්කාරයෙන් රථවාහනවල ගැටී අනතුරක් වූ බවට හඟවමින් එහි රියදුරන් බියකර වංචා සහගත ලෙස මුදල් ලබා ගන්නා මෙවැනි පුද්ගලයන් පිළිබඳව අපි වැඩිදුරටත් සොයා බැලූවෙමු. එහිදී එම වංචනිකයන් පිළිබඳ තොරතුරු රැසක් අනාවරණය කර ගැනීමට අපට හැකි විය.
මොහොමඞ් රිස්වාන් මාළිගාවත්ත ප‍්‍රදේශයේ පදිංචි පුද්ගලයෙකි. ත‍්‍රී රෝද රථ රියදුරෙකි. ඔහු මෙම වංචනිකයන් පිළිබඳව අදහස් දැක්වූයේ මෙලෙසින්ය.
”මගේ වයස අවුරුදු 54 යි. මම දන්න කාලෙ ඉඳන් කළේ මේ රස්සාව. කොළඹ හැම තැනකම මම කරක් ගහල තියෙනවා. ඒ වගේම වෙන ඕන දෙයක් මම දන්නවා. වාහනවල බලෙන් හැප්පිලා සල්ලි ගන්න අය ඕන තරම් මේ කොළඹ ඉන්නවා. ඔවුන්ගේ රැකියාව එක.”
”මේවා කරන්නේ තනි පුද්ගලයෙක් නොවෙයි. අඩුම ගාණේ තුන්දෙනෙක්වත් එකතුවෙලා තමයි කරන්නේ. කුඩු, ගංජා සහ කසිප්පු ගහන අය තමයි වැඩිපුරම කරන්නේ. ඒ අතර ගෑනුත් ඉන්නවා. මොකද ගෑනු කෙනෙක් හැපුණාහම ලෙහෙසියෙන්ම මුදල් ගන්න පුළුවන්නේ. සමහරු බයටම සල්ලි දෙනවා පොලිසි ගාණේ රස්තියාදු වෙන්නේ නැතිව.”
”වැඩිපුරම උන් ටාගට් කරන්නේ කාර්. ඒ අතරිනුත් නෝනලා පදින ඒවා තමයි. මොකද නෝනලා බය කරලා සල්ලි ගන්න ලේසියි. ඒ අතර යතුරු පැදිවල පවා හැපිලා සල්ලි ගන්න අයත් ඉන්නවා.”
”ඇත්තෙන්ම මේක ජාවාරමක්. දැන් ගොඩක් පිරිසක් මේකට යොමුවෙලා. මොකද වැඩි මහන්සියක් නොවී සල්ලි හොයන්න පුළුවන්නේ. ඒ වගේම තමයි මේ වගේ වැඩ කරන්න ගිහිල්ලා වැඩ වරද්ද ගත්ත අයත් ඉන්නවා. මාළිගාවත්ත හරක් පට්ටිය පැත්තේ සෙට් එකක් හිටියා ඔය වගේ වැඩ කරන. ගෑනු දෙන්නෙක් තුන්දෙනෙක් ඒකට සම්බන්ධ වෙලා හිටියා.”
”දවසක් එහෙම වාහනයක හැපෙන්න ගිහිල්ලා ගැහැනු කෙනෙක් ජීවිතය පවා නැති කරගත්තා. තව ඔය වගේ වැඩ කරන්න ගිහින් අතපය තුනටිය පවා කඩා ගත්ත අය ඉන්නවා. ඒ විතරක් නෙවේ මිනිස්සුන්ගෙන් ගුටි කාපු අයත් ඉන්නවා ඕන තරම්. ඒ මොකද ඔය වාහනවල විවිධ තරාතිරමේ අය යනවනේ. නාහෙට අහන්නැති කෙනෙකුට මේ වගේ දෙයක් කරලා අහුවුණොත් ගුටි පූජාවක් තමයි කන්න වෙන්නෙ.”
”දවසට දෙදහ තුන්දාහේ ඉඳන් විසි දහ දක්වා හොයන අය ඉන්නවා. දෙමටගොඩ, මාලිගාවත්ත, වනාත, බොරැල්ල, නාරාහේන්පිට, පංචිකාවත්ත, කොරළවැල්ල, මොරටුමුල්ල සහ අඟුලාන ප‍්‍රදේශවල තමයි පහුගිය දවස්වල වැඩිපුර සිදුවුණේ. කොළඹ වතු නිවාස ආශ‍්‍රිත මාර්ගවල මේ වගේ සිද්ධි බහුලව සිදුවෙනවා. ඒ සඳහා වෙනම ගැන්සි ඉන්නවා. සමහර පොලීසියේ නිලධාරීනුත් මේ බව දන්නවා.”
”මේ වගේ මිනිස්සුන්ගෙන් බේරෙන්න එකම ක‍්‍රමයයි තියෙන්නේ. ඒ අනතුර උන ගමන් පොලිසියට යන්න කතා කරන්න. නැත්නම් කියන්න රෝහලට එක්කන් යන්නම් කියලා. එහෙම කිව්වොත් අමාරුවෙන් හරි බේරෙන්න පුළුවන්.”
මෙම දිනවල කොළඹ අවට මාර්ගවල මෙවැනි වංචනික පුද්ගලයෝ බහුලව සිටිති. එමනිසා ඔබත් ප‍්‍රවේශම් වන්න. පොලිසිය ද මේ පිළිබඳව සොයාබලා මාර්ගවල සිටින මෙවැනි පුද්ගලයන් අත්අඩංගුවට ගෙන යළි එවැනි දේවල් සිදු නොකරන ආකාරයේ දඬුවමක් ලබාදිය යුතුය.
ගයාන් සමරසිංහ
