පුංචි ඡන්දෙ ජයත් වත්මන් රජයටම පැවරුවොත් රටේ වෙනසක් වේවි – හිටපු යුද හමුදාපති ෆීල්ඩ් මාර්ෂල් සරත් ෆොන්සේකා
පොරොන්දු දේශපාලනයෙන් බැටකාපු ජනතාව මෙවර පැවැත්වෙන ප්‍රාදේශීය සභා මැතිවරණයේදීත් පවතින රජයට ගමේ බලයත් ලබාදෙන බව විශ්වාස යැයි හිටපු යුද හමුදාපති ෆීල්ඩ් මාර්ෂල් සරත් ෆොන්සේකා මහතා කඩවත ඉන්ද්‍රා හෝටලයේ පැවති ජනහමුවකදී පැවසීය. රටපුරා සිදුවන මිනිස් ඝාතන රැල්ල මැඩපැවැත්වීමට ආණ්ඩුවට නොහැකි වී ඇත්තේ රජයේ දුර්වල පාලනයේ වරද නිසා දැයි මාධ්‍යවේදීන් ඹහුගෙන් විමසූ අතර එයට පිළිතුරු දෙමින් ෆොන්සේකා මහතා මෙසේද පැවසීය.
රටේ ජාතික ආරක්ෂාව කඩවැටිලා කියලා විවිධ අන්දමින් විවිධ වාසි බලාගෙන විරුද්ධ කණ්ඩායම් මත පළ කළත් රට තුළ එවැන්නක් සිදුවී නැහැ. ආයුධ සන්නද්ධ ත්‍රිවිධ හමුදාව යොදවා ආරක්ෂාව සැපයීමට තරම් අනතුරුදායක තත්ත්වයක මේ රට තවම පත්වෙලා නැහැ. නමුත් සිවිල් සමාජයේ සමහර පිරිසක් ගිනි අවි භාවිත කරන්න පටන් අරන්. ඒ නිසා රටේ මහජනතාවගේ ආරක්ෂාව පිළිබඳ දැඩි අවධානයක් යොමුකළ යුතු කාලයක් අපි ගතකරමින් ඉන්නවා. ඒක රටේ ජාතික ආරක්ෂාව කඩා වැටීම නිසා ඇතිවූ දෙයක් නම් නෙවෙයි. පෞද්ගලික කෝන්තර වලටත් අසල්වැසියාට කොකා ගැස්සීම ජාතික ආරක්ෂාවට තර්ජනයක් වෙලා කියන ගිණුමට බැර කරන්න බැහැ.
ටී 56 වගේ ගිනි අවි සිවිල් සමාජය ඇතුළේ භාවිත වෙනවා. පෞද්ගලික ආරවුල් මත්ද්‍රව්‍ය ජාවාරම, නීති විරෝධී මත්පැන් පෙරීම, ණය ගනුදෙනු, පැරණි ආරවුල්, අනියම් සබඳතා, ප්‍රේම සම්බන්ධතා මේ වගේ සුළු සිදුවීම්වලට වෙඩි උණ්ඩෙන් පිළිතුරු දෙනවා. ලෙයට ලෙය පළිගන්නවා. මුදලට කොන්ත්‍රාත් ක්‍රමේට සිදුකරන මිනිස් ඝාතන. ඒ ඇරුනම රටේ ජාතික ආරක්ෂාවට තර්ජනයක් නැහැ. මම ආණ්ඩුවට කඩේ යනවා නෙවි.
කැලණිය – මංගලා මදුරප්පෙරුම
ලංකා කම්කරු කොංග්‍රසයේ බලය කොයි තරම් ද කියලා පුංචි ඡන්දයේදී බලාගන්න පුළුවන් – නුවරඑළිය දිස්ත්‍රික් පාර්ලිමේන්තු මන්ත්‍රී ජීවන් තොණ්ඩමන්
මෙවර පැවැත්වෙන පළාත් පාලන මැතිවරණයේදී නුවරඑළිය දිස්ත්‍රික්කයේ පළාත් පාලන ආයතනවල බලය ලංකා කම්කරු කොංග්‍රසය විසින් ස්ථිර ලෙසම හිමි කර ගන්නා බව එම කොංග්‍රසයේ මහ ලේකම් නුවරඑළිය දිස්ත්‍රික් පාර්ලිමේන්තු මන්ත්‍රී ජීවන් තොණ්ඩමන් මහතා පවසයි.
නුවරඑළිය දිස්ත්‍රික්කයේ පළාත් පාලන ආයතන සඳහා ලංකා කම්කරු කොංග්‍රසයේ මැතිවරණ ක්‍රියාවලිය පිළිබඳව අදහස් දක්වමින් මේ බව පැවසූ ජීවන් තොණ්ඩමන් මහතා එහිදි වැඩි දුරටත් මෙසේද පැවසීය. නුවරඑළිය දිස්ත්‍රික්කයේ පළාත් පාලන ආයතන සඳහා ලංකා කම්කරු කොංග්‍රසය තම ලාංඡනය වන කුකුළා ලකුණින් අපේක්ෂකයන් ඉදිරිපත් කරලා තියෙනවා. මෙසේ ඉදිරිපත් කරලා තියෙන්නේ එම ප්‍රදේශවල ජනතාව අතර සිටින ප්‍රබල අපේක්ෂකයන්. එම තත්ත්වයන් මත එම අපේක්ෂකයන් ඒ ඒ කොට්ඨාසවලින් ස්ථිර ලෙසම ජය ගන්නවා.
එම තත්ත්වයන් මත නුවරඑළිය දිස්ත්‍රික්කයේ ලංකා කම්කරු කොංග්‍රසය එම පළාත් පාලන අයතනවල බලය ස්ථිර ලෙසම හිමි කර ගන්නවා. එතකොට කාට කාටත් බලා ගන්න පුළුවන් ලංකා කම්කරු කොංග්‍රසයේ බලය කොයි තරම් ද කියලා.
හැටන් – මනුර සුදත් සෙල්ලහේවා
පහසුකම් අඩු ලාහුගල පහසුකම් වැඩි කරනවා – ජා.ජ.බ. අපේක්ෂක හර්ෂ අබේනායක
අම්පාර දිස්ත්‍රික්කයේ ලාහුගල ප්‍රාදේශීය සභා බලප්‍රදේශය ඉතා අඩු පහසුකම්වලින් යුත් ප්‍රදේශයක් බවත් වත්මන් ආණ්ඩුවේ පූර්ණ සහයෝගය ලබාගෙන ප්‍රදේශයේ අඩුපාඩුකම් සහ ජනතා අවශ්‍යතා ඉටුකරන්න තමා කටයුතු කරන බව ලාහුගල ප්‍රාදේශීය සභාවට තරග කරනු ලබන ජාතික ජනබලවේගයේ අපේක්ෂක හර්ෂ අබේනායක මහතා සඳහන් කළේය.
පසුගිය රජයන් සියල්ලක්ම පාහේ ලාහුගල පානම ඇතුළු ප්‍රදේශ අමතක කරල තිබුණා. ඒ නිසා වත්මන් ආණ්ඩුවේ සහයෝගය ලබාගෙන පානම ජනතාවගේ අභිලාෂයන් ඉටුකරන්න තමා කටයුතු කරන බවද සඳහන් කළේය.
ගම සංවර්ධනය නොකර රටකට දියුණු වීමට නොහැකි බවත් ඒ සඳහා පවතින ආණ්ඩුවට බලය ලබා ගමේ බලය දීමට කටයුතු කරන ලෙස ජනතාවගෙන් ඉල්ලා සිටින බවද හර්ෂ අබේනායක මහතා වැඩිදුරටත් සඳහන් කළේය.
පානම – පී. විජේසේකර
ආණ්ඩුවේ හොඳ දේට සහය දෙන්නත් නරක දේට විරුද්ධවත් කතා කරනවා – මහරගම සජබ අපේක්ෂක ඉනෝජා මුණසිංහ
ආණ්ඩුවේ හොඳ දේවල්වලට සහය දෙන්නත් නරක දේවල්වලට විරුද්ධව ගම්මට්ටමින් ජනතාව දැනුවත් කරන්න සමගි ජනබලවේගය පසුබට නොවන බව මහරගම නගර සභාවට තරග වදින සමගි ජනබලවේගයේ හිටපු නාගරික මන්ත්‍රී ඉනෝජා මුණසිංහ මහත්මිය සඳහන් කළාය.
ජනතාව මුලා කරමින් බලයට පැමිණි මේ ආණ්ඩුව පිළිබඳව දවසින් දවස ජනතාව තේරුම් ගෙන තිබෙන බවත් එහි ප්‍රතිඵලය ළඟ එන පළාත් සභා මැතිවරණයෙන් පිළිතුරු ලබාදෙනු ඇතැයි ද මහරගම පැවති ජනහමුවකදී ඉනෝජා මහත්මිය සඳහන් කළාය. එහිදී වැඩිදුරටත් කතා කළ හිටපු නාගරික මන්ත්‍රිවරයා මෙසේ ද කීය. 2011 වසරේ මහරගම නගර සභාවට තරග කර ජය ලබා ගැනීමෙන් අනතුරුව නිවහල් දේශයක් ගොඩනැඟීම සඳහා තලවතුගොඩ, කලල්ගොඩ ජනතාවට හැකි උපරිම අයුරුන් සේවය කළා. ජනතාව දුන් කතිරයට සාධාරණයක් කරන්න හොරකම්, පගාව, මහජන දේපළ අවභාවිතා කළේ නැතුව කළ සේවය අදත් ජනතාව දන්නවා. එම නිසා ජනතාවට වුණු පොරොන්දු මේ ආණ්ඩුව ඉටු කරදී නැහැ. ගමේ ජනතාව ටිකෙන් ටික ආණ්ඩුවෙන් ඈත් වෙන්න කටයුතු කරන බව එම ජනතාවම සඳහන් කරනවා. ඒ නිසා ගමට වැඩක් කරන්න ජනතාවගේ අවශ්‍යතා ඉටු කරන්න සමගි ජනබලවේගයට බලය ලබාදෙන ලෙස මහරගම ජනතාවගෙන් ඉල්ලා සිටිනවා යැයි ද ඉනෝජා මහත්මිය වැඩිදුරටත් සඳහන් කළාය.
ගමට සවියක් වීම මගේ අරමුණයි – මහරගම පොහොට්ටුවේ චාන්දනී බස්නායක
පුරා වසර තිහක් තිස්සේ සමාජ සේවයේ යෙදෙන තමා මෙවර මහරගම නගර සභාවට තරගවදින්නේ දූෂණයෙන් තොර පාලනයක් වෙනුවෙන් බව පොදුජන පෙරමුණෙන් තරග වදින චාන්දනී බස්නායක මහත්මිය පවසයි.
බස්නායක මහත්මිය මේ කරුණු ප්‍රකාශ කළේ පතිරගොඩ ප්‍රදේශයේ පැවැති ජනහමුවකදීය.
එහිදී ඇය මෙසේද කීවාය.
අපේ ජනතාව අද පොහොට්ටුව වටා එක්වෙමින් තිබෙනවා. මොකද මාලිමා ආණ්ඩුවේ බොරුව ගැන ජනතාවට හොඳ අවබෝධයක් ලැබිලා තියෙන්නේ. කතා පවත්වලා රටගොඩ ගන්න බැහැ. මෙවර මහරගම නගර සභාවට පොදුජන පෙරමුණෙන් හොඳ කණ්ඩායමක් ඉදිරිපත් කරලා තියෙනවා. අපේ කාන්තා නියෝජනය ශක්තිමත් ‘ගමට සවියක් – ඔබට දිරියක්, සැමට සෙතක්’ යන්න මගේ දේශපාලන තේමාවයි. එය ඉදිරියට ගෙන යෑම සඳහා මහරගම ප්‍රගතිශීලී ජනතාව අපිට සහය දෙන බව විශ්වාසයි. කාන්ති කොඩිකාර මහත්මිය අපට නිසි නායකත්වය දෙන බවත් කියන්න ඕනෑ.
බදු ගෙවන ජනතාව වෙනුවෙන්ම කැපවිය යුතුයි – ස.ජ.බ. අනුරාධපුර අපේක්ෂක රවීන්ද්‍ර රණසිංහ
සාමාන්‍ය මන්ත්‍රී භූමිකාවෙන් ඔබ්බට ගොස් මන්ත්‍රීවරයෙකුට ලැබෙන මන්ත්‍රී දීමනාව පොදු ජනතාවගේ සුබසිද්ධිය වෙනුවෙන් කැප කළ තමන් ඉදිරියේදී ද අනුරාධපුර මහ නගර සභාවේ මන්ත්‍රීවරයකු ලෙස පත් වූ පසුවත් බදු ගෙවන ජනතාවගේ සත පහක මුදලක් පෞද්ගලික පරිහරණයට නොගෙන සේවය කිරීමට කැපවන බව අනුරාධපුර මහ නගර සභාවේ සමගි ජනබලවේගයේ මන්ත්‍රීධුර අපේක්ෂක රවීන්ද්‍ර රණසිංහ මහතා පැවසීය.
2017 වර්ෂයේ දී මම අනුරාධපුර මහ නගර සභාවට මන්ත්‍රීවරයෙක් ලෙස තේරී පත් වුණේ. එදා සිට එම නගර සභාව විසුරුවා හරිනු ලැබූ දිනය තෙක් මා නගර සභාවෙන් කියා ඇල්වතුර වීදුරුවක් පානය කර නෑ. මා සභාවට එනවිට පානීය ජල බෝතලයත් ගෙදරින් රැගෙන ගියේ. නාගරික මන්ත්‍රීවරයෙකු ලෙස මා ප්‍රදේශයේ ආගමික අධ්‍යාපනික සාමාජීය ආර්ථික සහ ක්‍රීඩා ආදී අංශ රැසක අභිවෘද්ධිය වෙනුවෙන් රවීන්ද්‍ර රණසිංහ පදනමට, අනුරාධපුර නගරයේ ව්‍යාපාරික භවතුන්ගේ සහ මහ නගර සභාවෙන් ලද මාසික මන්ත්‍රී දීමනාව යොදවනු ලැබූවා.
අනුරාධපුර විශේෂ – පර්සි කුරුනේරු
ආණ්ඩුවේ මූල්‍ය ආධාර නොව අවශ්‍ය වන්නේ දක්ෂ කළමනාකරණයක් – මහනුවර ස්වාධීන අපේක්ෂක අශෝක හේරත්
මහනුවර මහ නගර සභාවට ඉදිරිපත් වන තම කණ්ඩායම ප්‍රධාන දේශපාලන පක්ෂ වලට විශාල අභියෝගයක් වී ඇති බවත්, මහනුවර මහ නගර සභාවේ බහුතර මන්ත්‍රී ධුර සංඛ්‍යාවක් දිනා ගෙන මහ නගර සභාවේ බලය ලබා ගන්නේ තම කණ්ඩායම බවද මෝටර් බයිසිකලය ලකුණින් තරග කරන අංක 2 ස්වාධීන කණ්ඩායමේ පුරපති අපේක්ෂක හිටපු මධ්‍යම පළාත් සභා මන්ත්‍රී අශෝක හේරත් මහතා පැවැසීය.
ඒ මහතා මෙම අදහස් පල කළේ මෙවර පළාත් පාලන මැතිවරණයේදී මහනුවර මහ නගර සභාව පාලනය කරන්නේ කෙසේද යන්න පැහැදිලි කිරීමට මහනුවර තැන්නෙකුඹුර ජෙම් ඉන් හෝටලයේ පැවැති එම ස්වාධීන කණ්ඩායම සංවිධානය කර තිබූ මාධ්‍ය හමුවකදී අදහස් දක්වමිනි.
නගර සභාවේ පාලනය පවත්වාගෙන යාම සදහා ආණ්ඩුවේ මුදල් ආධාර අවශ්‍ය බව සඳහන් කළ ද එවැනි මුදලක් නගර සභා පරිපාලනය සඳහා අවශ්‍ය නොවන බවද, මහ නගර සභා අණ පනත් අනුව මෙහි පාලනය ගෙන යාම සදහා ආණ්ඩුවේ කිසිදු මූල්‍ය ආධාරයක් නොව අවශ්‍ය වන්නේ දක්ෂ කළමනාකරණයක් හා දැක්මක් සහිත නායකත්වයක් පමණක් බවද ඒ සදහා කුමන දේශපාලන පක්ෂයකින් හෝ ස්වාධීන කණ්ඩායමකින් නගරාධිපතිවරයකු තෝරා පත් කර ගැනීමට ජනතාවට අයිතියක් ඇති බවද ඒ මහතා පැවැසීය.
ගම්පොළ – සුරංග දිල්හාන්
