ගුරුතරුව වී අපේ නිර්මාණ නුඹ පෙතේ
සරුසාර අස්වැන්න නෙළන්නට දුන් සිතේ
හුරුකෙරූ වින්දනයෙ රස පහස කවි සිතේ
විරුවෙකිය සාහිතයෙ සනාතන පිං කෙතේ
මාළිගා නොසැදු මාළිගා වත්තේ
මහරජාණන් ඔබය රන් කිරුළු නැත්තේ
මිනිස්කම් කිරුළගෙන හිස පැළඳ ගත්තේ
හිස්වෙච්ච සිහසුනට වෙන කෙනෙකු නැත්තේ
පන්හිඳට පණ දුන්නු අරුම සුළවතාණන්
බෝසත් ගුණෙන් යුත් සොඳුරු හිතවතාණන්
පහන් වැට දරු කැළගෙ මහරු පියසදාණන්
තැවුල්පත් ලොවට ආ කාරුණික වෙදාණන්
සසර සැරියේ අරුම ඉතින් පිළිගත යුතුය
ආපු හැම දෙනාටම යෑමේ අයිතිය සතුය
ඔබේ මතකෙට සදා මියෙන තුරු අප නතුය
බුදුවෙන්න පෙරාතුව – එකම එක වතාවක්
නැවත හමුවිය යුතුය !
යමුනා මාලනී පෙරේරා
