සියඹලාණ්ඩුව වගා නිරීක්ෂණ චාරිකාවක නිරත වෙමින් ජනාධිපති රනිල් වික්‍රමසිංහ කියයි
මෙරට ණය ප්‍රතිව්‍යුහගතකරණය සම්බන්ධයෙන් පසුගියදා තමන් චීන මුදල් අමාත්‍යවරයා සමඟ සාකච්ඡා කළ බවත් ඒ වෙනුවෙන් පැවැත්වෙන සාකච්ඡා සාර්ථකව අවසන් වනු ඇති බව තම අපේක්ෂාව බවත් ජනාධිපති රනිල් වික්‍රමසිංහ මහතා සඳහන් කළේය.
රටේ ආර්ථික බංකොලොත්භාවය පිළිබඳ ගැටලු‍ව කඩිනමින් විසඳීමටත් ආහාර සුරක්ෂිතතාව තහවුරු කිරීමටත් රජය ප්‍රමුඛ අවධානයක් ලබා දී කටයුතු කරන බවද ජනාධිපතිවරයා පැවසීය.
ජනාධිපතිවරයා මේ බව සඳහන් කළේ ඉකුත් 16 වැනිදා පෙරවරුවේ සියඹලාණ්ඩුව, ප්‍රාදේශීය ලේකම් කොට්ඨාසයේ රතුමඩ, වීරකඳවල අවට වගා භූමියේ නිරීක්ෂණ චාරිකාවක නිරත වීමෙන් අනතුරුව අදහස් දක්වමිනි.
මොණරාගල දිස්ත්‍රික්කය තුළ ආහාර සුරක්ෂිතතා වැඩසටහන ක්‍රියාත්මකවීමේ ප්‍රගතිය හා කෘෂිකර්මාන්තයට අදාළව පවතින වත්මන් තත්ත්වය පිළිබඳව මෙහිදී ජනාධිපතිවරයා රාජ්‍ය නිලධාරීන් සමග සාකච්ඡාවකට එක් විය.
ජනතාවට අවශ්‍ය ආහාර සපයාදීමට නිසි වැඩපිළිවෙළක් ක්‍රියාත්මක නොවුණහොත් ලේ වැගිරීමට නොව හාමතේ මිය යාමට සිදුවන බව සඳහන් කළ ජනාධිපතිවරයා දේශපාලනය පාර්ලිමේන්තුවේදී පමණක් කතා කළ යුතු බවත්, ජනතා අවශ්‍යතා ඉටු කිරීමේ වැඩපිළිවෙළට පක්ෂ බේදයෙන් තොරව සියලු දෙනා එක්විය යුතු බවත් අවධාරණය කළේය.
නිලධාරීන් ගොවි බිමට කැඳවූ ජනාධිපතිවරයා ක්ෂණික විසඳුම් ලබාදිය හැකි ගැටලු‍වලට එම අවස්ථාවේම විසඳුම් ලබාදීමට පියවර ගැනීම විශේෂත්වයක් වන අතර තම ප්‍රදේශයට ජනාධිපතිවරයෙකු පැමිණි ප්‍රථම අවස්ථාව මෙය බව සඳහන් කළ ගොවි ජනතාව තමන් අසළට පැමිණ ගැටලු සොයා බැලීම පිළිබඳ ජනාධිපතිවරයාට ස්තුතිය පළ කළහ.
එමෙන්ම ප්‍රදේශයේ ජනතා ගැටලු රැසක් ද ජනාධිපතිවරයා වෙත ඉදිරිපත් කෙරුණු අතර අධ්‍යාපන, මාර්ග, නිවාස ඇතුළු ගැටලු ඒ අතර විය. එම සියලු ගැටලු‍වලට ඇහුම්කන් දුන් ජනාධිපතිවරයා දුෂ්කරතා
රැසක් මධ්‍යයේ අධ්‍යාපන කටයුතුවල නිරත වන ප්‍රදේශයේ දරු දැරියන් විශ්වවිද්‍යාල අධ්‍යාපන දක්වා ගෙන යාමට අවශ්‍ය පහසුකම් සලසන බව පැවසීය.
මෙම අවස්ථාවට සහභාගී වී නැවත පැමිණෙන අතරතුර සියඹලාණ්ඩුව කලු‍ඔබ්බ ධර්මාශෝක පෙර පාසලේ පැවැත්වෙන දහම්පාසල වෙතද කිසිඳු දැනුම්දීමකින් තොරව ගිය ජනාධිපතිවරයා සිසු දරුවන්ගේ සුවදුක් විමසීය. පූර්ව දැනුම්දීමකින් තොරව එම ස්ථානයට පැමිණියත් සිසු දරු දැරියන් විසින් ජයමංගල ගාථා ගායනා කරමින් ජනාධිපතිවරයාව පිළිගනු ලැබීය.
නීරික්ෂණ චාරිකාවෙන් අනතුරුව වැඩිදුරටත් අදහස් දැක්වූ ජනාධිපති රනිල් වික්‍රමසිංහ මහතා
ආහාර සුරක්ෂිතතා වැඩපිළිවෙළ අපි ආරම්භ කර තිබෙන්නේ එය අඛණ්ඩව ඉදිරියට ක්‍රියාත්මක කිරීමේ අරමුණ ඇතිවයි. ඒ සඳහා ලබාදිය හැකි සියලු පහසුකම් අපි ලබා දෙනවා. මේ මහ කන්නය වන විට වි වගාව, බඩ ඉරිගු සහ අනෙකුත් බෝග
වගාවන් කරන්න සූදානම් විය යුතුයි. එහෙම නම් මහ කන්නය වන විට හෝ ඊට පෙර හෝ හොඳ අස්වැන්නක් ලබා ගත යුතුයි. හොඳ අස්වැන්නක් තිබෙනවා නම් නිෂ්පාදනය ඉහළ ගොස් රටේ ස්ථාවරත්වයක් ඇති වෙනවා.
වගා කටයුතු පමණක් නොවේ, අස්වැන්න එකතු කිරිම, නාස්තිය අවම කිරීම, ගබඩා කිරීම ඒ වගේම බෙදා හැරීමේ ජාලය දියුණු කිරීමට අපි පියවර ගෙන තිබෙනවා. තවත් අඩු පාඩු තිබිය හැකියි. ඒවත් විසඳාගෙන සාර්ථකව මේ වැඩකටයුතු ඉදිරියට ක්‍රියාත්මක කළ යුතුයි.
මේ පළාත දියුණු කර ජනතාවට යහපත් ජිවන තත්ත්වයක් උදාකරදීම අපේ අරමුණයි. මේ ප්‍රදේශයේ කුඩා වැව් නැවත ප්‍රතිසංස්කරණ කිරීම සම්බන්ධව සාකච්ඡා කර තිබෙනවා. ඒ වැඩසටහන් අපි ක්‍රියාත්මක කරමු. පළමුවෙන්ම කරන්න තිබෙන්නේ ලබන කන්නයේදි ආහාර නිෂ්පාදනය වැඩි කර ගැනීමයි. ඒ නිසා කිසිදු බාධාවකින් තොරව ඉදිරි මහ කන්නය වන තෙක් මුළු රටම ආහාර සුරක්ෂිතතා වැඩසටහනට යොදා ගන්නවා. ඒ වගේම රටේ පවතින ආර්ථික බංකොළොත්භාවය පිළිබඳ ප්‍රශ්නය විසඳිය යුතුයි.
අපි ජාත්‍යන්තර මූල්‍ය අරමුදල සමග සාකච්ඡා ආරම්භ කළා. ඒ අනුව මේ වන විට මූලික එකඟතාවකට පැමිණීමට අපට හැකි වී තිබෙනවා. අපිට ණය ලබාදී ඇති රටවල් අතර ප්‍රධානම රටවල් තමයි චීනය, ජපානය සහ ඉන්දියාව. දැන් අපි ණය ප්‍රතිව්‍යුහගත කිරීම සම්බන්ධයෙන් එම රටවල් සමග සාකච්ඡා කරමින් සිටිනවා. මම ජපානයට ගිය අවස්ථාවේ එහි විදේශ අමාත්‍යවරයා සහ අගමැතිවරයා සමග ඒ පිළිබඳ සාකච්ඡා කළා. එමෙන්ම පසුගියදා චීන මූදල් අමාත්‍යවරයා සමඟත් ඒ පිළිබඳ විශේෂ සාකච්ඡාවක් සිදු කළා. ඒ වගේම වොෂින්ටන් නුවරට ගොස් සිටින අපේ රාජ්‍ය අමාත්‍ය ෂෙහාන් සේමසිංහ මහතා ඉන්දියාවේ කණ්ඩායම් සමග ණය ප්‍රතිව්‍යුහගතකරණ වැඩසටහන සමඟ සාකච්ඡා කර තිබෙනවා.
රටේ පවතින ණය බර අඩු කිරීම පිළිබඳව ජාත්‍යන්තර මූල්‍ය අරමුදල සහ චීනය, ජපානය සහ ඉන්දියාව සමග අපි ප්‍රථම වතාවට ඊයේ දිනයේ මූලික සාකච්ඡාවක් පැවැත්වුවා. අපිට මේ ණය ගෙවීම අපහසුයි. නමුත් ණය බර අඩුකර ගැනීමේ මාර්ගයක් සොයා ගත යුතුයි. ණය පමණක් නොව දැන් පොළිය ගෙවා ගැනීමටවත් නොහැකි තත්ත්වයක් මතුව තිබෙනවා. මෙම සාකච්ඡා විධිමත්ව ඉදිරියට ගෙන ගියහොත් මේ සියලු ගැටලු නිරාකරණය කරගත හැකියැයි මම විශ්වාස කරනවා.
ඒ කාලය තුළ ලෝක බැංකුව, ආසියනු සංවර්ධන බැංකුව වැනි ආයතනවලින් අපිට මුදල් ලැබෙනවා. පොහොර ලබා ගන්නත් ඒ වගේම ඖෂධ ලබා ගන්නත් ලෝක බැංකුවෙන්, යුරෝපයෙන්, ඇමරිකාවෙන්, ආසියනු සංවර්ධන බැංකුවෙන් අපිට මුදල් ලබා දුන්නා. එම මුදල්වලින් තමයි අපි මේ වැඩකටයුතු කරන්නේ. ඒනිසා අපිට
ගැටලු‍වකින් තොරව මේ වැඩකටයුතු ඉදිරියට කරගෙන යා හැකියි.
වාද විවාද කරන එක මට ප්‍රශ්නයක් නොවේ. සමහර අය කියනවා පාරට බැහැලා ලේ වගුරනවා කියලා. ඊට ඉස්සෙල්ලා ජීවත් විය යුතුයි. නැතිනම් හාමතේ මිය යන්න සිදු වෙනවා. කතාකරන්න තියෙන ඕන දෙයක් පාර්ලිමේන්තුවේ දී කතා කරමු. පාර්ලිමේන්තුව තිබෙන්නේ ඒ සඳහායි. අද මේ සඳහා සහභාගී වූ සියලු‍දෙනාට මම ස්තූතිවන්ත වෙනවා. පසුගිය කන්නයේ පොහොර නොලැබීම පිළිබඳ සියලු ගොවි ජනතාවට අපේ කණගාටුව ප්‍රකාශ කරනවා.
ඌව පළාත් ආණ්ඩුකාර ඒ.ජේ.එම්. මුසම්මිල්, රාජ්‍ය අමාත්‍යවරුන් වන ශෂේන්ද්‍ර රාජපක්ෂ, විජිත බේරුගොඩ, ජගත් පුෂ්පකුමාර, පාර්ලිමේන්තු මන්ත්‍රී වෛද්‍ය
ගයාෂාන් නවනන්දන, හිටපු පාර්ලිමේන්තු මන්ත්‍රිනි සුමේධා ජී. ජයසේන, හිටපු නියෝජ්‍ය කතානායක ආනන්ද කුමාරසිරි, ජනාධිපති ලේකම් සමන් ඒකනායක, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සහ ජනාධිපති කාර්ය මණ්ඩල ප්‍රධානී සාගල රත්නායක, ජාතික ආහාර සුරක්ෂිතාව පිළිබඳ ජනාධිපති උපදේශක ආචාර්ය සුරේන් බටගොඩ, මොණරාගල දිස්ත්‍රික් ලේකම් ගුණදාස සමරසිංහ, සියඹලාණ්ඩුව ප්‍රාදේශී ලේකම් අසංක දයාරත්න යන මහත්වරු සහ දිස්ත්‍රික් සහ ප්‍රාදේශීය රාජ්‍ය නිලධාරීහු ඇතුළු පිරිසක් මෙම අවස්ථාවට එක්ව සිටියහ.
මෙහිදී ගොවි ජනතාව විසින් ඉදිරිපත් කළ ගැටලු සහ ඒවට ජනාධිපති රනිල් වික්‍රමසිංහ මහතා දුන් පිළිතුරු පහත දැක්වේ.
ප්‍රශ්නය – පොහාර ගැටලු‍ව තමයි ජනාධිපතිතුමනි අපට තිබෙන්නේ,
පිළිතුර – මේ මහ කන්නයේ වී වගාව සහ බඩ ඉරිගු වගාව සඳහා අවශ්‍ය පොහොර අපි ලබා දෙනවා. ඊට අදාළ පියවර දැන්මටත් ගෙන තිබෙන බව මතක් කරන්න කැමතියි. ඒ ගැන ගැටලු‍වක් ඇති කර නොගෙන ගොවිතැන් කටයුතු නිසි වේලාවට ආරම්භ කරන ලෙස මම ඔබෙන් ඉල්ලා සිටිනවා.
ප්‍රශ්නය – ජනාධිපතිතුමනි, අපේ ගොවිතැන් කටයුතු සඳහා ඉන්ධන ලබා ගැනීම විශාල ගැටලු‍වක් බවට පත්ව තිබෙනවා.
පිළිතුර – අපි මේ ප්‍රදේශවලට අවශ්‍ය පරිදි ඉන්ධන ලබාදීමට තීරණය කරලා තිබෙනවා. දැන් ඒ ඒ දිස්ත්‍රික්කවලට අවශ්‍ය ඉන්ධන ප්‍රමාණයයි, ඒ වගේම අස්වැන්න එකතු කරන විට මැෂින්වලට අවශ්‍ය ඉන්ධන ප්‍රමාණයයි අපි ලබා දෙන්නම්.
ගොවි ජනතාවට අවශ්‍ය පොහොර, ඉන්ධන නිසි වේලාවට ලැබෙනවාද යන්න පිළිබඳව මේ ප්‍රදේශය නියෝජනය කරන අපේ මැති ඇමැතිවරු සොයා බැලිය යුතුයි.
