පියා අල්ලන්න පරීක්ෂණ
දරුවා මිලට ගත් කත හා බ්‍රෝකර් දැලේ
මේ තාත්තා කෙනෙක් කළ අමන වැඩක්
දින හතක් වයසැති පිරිමි දරුවකු රුපියල් පනස් දහසක මුදලකට පිටස්තර කාන්තාවකට විකිණූ පියෙකු අත්අඩංගුවට ගැනීම සඳහා විමර්ශන ආරම්භ කර ඇති බවත්, එම දරුවා මිලදී ගත් කාන්තාව සහ අතරමැදියා ලෙස කටයුතු කළ පුද්ගලයා පෙරේදා (25 දා) අත්අඩංගුවට ගත් බවත් අනුරාධපුර පොලීසිය පවසයි.
මෙලෙස අත්අඩංගුවට පත්ව ඇත්තේ කැබිතිගොල්ලෑව වාහල්කඩ ප්‍රදේශයේ පදිංචි කාන්තාවක් සහ මෙම ගනුදෙනුවේ අතරමැදියා ලෙස කටයුතු කළ අනුරාධපුර ත්‍රීවිල් රථ රියැදුරෙකු බව පොලීසිය කියයි. දරුවාගේ මව විසින් සිදු කරන ලද පැමිණිල්ලකට අනුව කළ විමර්ශනයකදී එම බිළිඳු දරුවා සමඟ සැකකරු සහ සැකකාරිය අත්අඩංගුවට ගත් බව පොලිසිය පවසයි. තම බිලින්දා රුපියල් 50,000 ක මුදලකට විකුණූ පියා මෙම ගණුදෙනුවෙන් පසු ප්‍රදේශය අතහැර පලා ගොස් ඇති බවත් ගණුදෙනුව සිදු කර දරුවා සහ මුදල් දෙපාර්ශ්වයට ලබා ඇත්තේ අතරමැදියා ලෙස කටයුතු කළ පුද්ගලයා බව හඳුනා ගෙන ඇතැයිද පොලීසිය සඳහන් කළේය. නීත්‍යානුකූලව විවාහ නොවී අනුරාධපුර නගරයේ විවිධ ස්ථාන වල අඹුසැමියන් ලෙස නවාතැන්ගෙන සිටින මෙම යුවලේ පිරිමි පුද්ගලයා (පියා) මාතලේ ප්‍රදේශයේ පදිංචිකරුවෙකු බවත්, කාන්තාව (මව) කොළඹ ප්‍රදේශයේ පදිංචිකරුවකු බවත් පොලිසිය කියයි. අත්අඩංගුවට ගත් සැකකරු සහ සැකකාරිය ඊයේ (26දා) අනුරාධපුර මහෙස්ත්‍රාත් අධිකරණයට ඉදිරිපත් කිරීමට නියමිතව තිබුණි. අනුරාධපුර මූලස්ථාන ප්‍රධාන පොලිස් පරීක්ෂක ලක්මාල් විජේරත්න මහතාගේ උපදෙස් මත ළමා හා කාන්තා කාර්යාංශයේ ස්ථානාධිපතිනි පොලිස් පරීක්ෂිකා යමුනා කාන්ති මහත්මියගේ මෙහෙයවීමෙන් සැකකරු සහ සැකකාරිය අත්අඩංගුවට ගනු ලැබූහ.
අනුරාධපුර විශේෂ පර්සි කුරුනේරු, මිහින්තලේ – රංග චතූ
