පක්ෂ දේශපාලනය පැත්තකට දාන්න – ජනතාවගේ ආහාර ගැටලුව විසඳන වැඩපිළිවෙළට සියලුදෙනා එක්විය යුතුයි

99

රාජ්‍ය නිලධාරීන් දැනුවත් කිරීමේ අම්පාර දිස්ත්‍රික් වැඩසටහනට එක්වෙමින් ජනාධිපති රනිල් වික්‍රමසිංහ කියයි

ජනාධිපති රනිල් වික්‍රමසිංහ මහතා අම්පාරට පැමිණි අවස්ථාවේ ජනතාවගේ සුවදුක් විමසූ මොහොතකි මේ.

සාම්ප්‍රදායික පක්ෂ දේශපාලනය ඉවත දමා, ආහාර සුරක්ෂිතතාව ඇති කර ජනතාවගේ ආහාර ගැටලු‍ව විසඳන වැඩපිළිවෙලට සියලු‍දෙනා එක්විය යුතු බව ජනාධිපති රනිල් වික්‍රමසිංහ මහතා පැවසීය.

පක්ෂ දේශපාලනය පැත්තකට දාන්න - ජනතාවගේ ආහාර ගැටලුව විසඳන වැඩපිළිවෙළට සියලුදෙනා එක්විය යුතුයි

ජනාධිපතිවරයා මේබව සඳහන් කළේ ඉකුත් 15දා පෙරවරුවේ අම්පාර හාඩි උසස් තාක්ෂණ ආයතන ශ්‍රවණාගාරයේ පැවති ආහාර සුරක්ෂිතතාව සහ පෝෂණය සහතික කිරීම සඳහා ග්‍රාමීය ආර්ථික කේන්ද්‍ර සවිබල ගැන්වීමේ බහුආංශික ඒකාබද්ධ යාන්ත්‍රණය පිළිබඳ රාජ්‍ය නිලධාරීන් දැනුවත් කිරීමේ අම්පාර දිස්ත්‍රික් වැඩසටහනට එක්වෙමිනි.

මේ වන විට ඉතා අසීරු කාලයක් පසු කරමින් සිටියත්, කිසිවෙකු කුසගින්නේ නොතබන බව අවධාරණය කළ ජනාධිපතිවරයා ජාතික ආහාර නිෂ්පාදන වැඩපිළිවෙළ සාර්ථකව ඉදිරියට ගෙන යමින් 2023 ඇතිවිය හැකි ගෝලිය ආහාර අර්බුදයට ශක්තිමත්ව මුහුණදීමේ වැදගත්කමද පෙන්වා දුන්නේය.

පක්ෂ දේශපාලනය පැත්තකට දාන්න - ජනතාවගේ ආහාර ගැටලුව විසඳන වැඩපිළිවෙළට සියලුදෙනා එක්විය යුතුයි

ආහාර සුරක්ෂිතතා වැඩපිළිවෙළ ක්‍රියාත්මක කරන අතරතුරදී ලබන වසරේ සිට කෘෂිකර්මාන්තය නවීකරණය කිරීමේ වැඩසටහන ක්‍රියාවට නංවන බවද ජනාධිපතිවරයා කීය.

මෙම සාකච්ඡාව සඳහා  සහභාගීවී සිටි රාජ්‍ය නිලධාරීන් අතරට ගිය ජනාධිපතිවරයා ක්ෂේත්‍ර කටයුතුවලදී ඔවුන් හඳුනාගත් ගැටලු‍ සහ දුෂ්කරතා පිළිබඳ ඝෘජුවම ඇහුම්කන් දීමද විශේෂත්වයක් විය.

අම්පාර දිස්ත්‍රික්කයේ කෘෂිකාර්මික සහ ධීවර ගැටලු‍ රැසක් පිළිබඳ එහිදී ජනාධිපති රනිල් වික්‍රමසිංහ මහතා දැනුවත් කෙරණු අතර ඒ පිළිබඳ සොයා බලා කඩිනම් පියවර ගැනීමට රාජ්‍ය නිලධාරීන්ට උපදෙස් දුන් ජනාධිපතිවරයා ඒ සඳහා විශේෂ කමිටුවක් පිහිටුවීමටද උපදෙස් දුන්නේය. මෙම සාකච්ඡාවෙන් අනතුරුව හාඩි ගොවිපොළේ නිරීක්ෂණ චාරිකාවකට එක් වූ ජනාධිපතිවරයා එම අවස්ථාව සනිටුහන් කරමින් ගොවිපොළ පරිශ්‍රයේ පැළයක් රෝපණය කිරීමට ද කටයුතු කළේය.

සාකච්ඡාවේදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මහතා

ලංකාවේ මෙවැනි වැඩසටහනක් ක්‍රියාත්මක කරන පළමු අවස්ථාව මෙය. මෙහෙම තත්ත්වයක් මීට පෙර ලංකාවේ ඇතිවී තිබුණේ නැහැ. දෙවන ලෝක යුද්ධයේදී ආහාර ගේන්න බැරි වුණාට ආර්ථිකය කඩාගෙන වැටුණේ නැහැ. දැන් ආර්ථිකය කඩා වැටිලා තිබෙන්නේ. පසුගිය වසරට වඩා මේ වසරේ මේ ආර්ථිකය ගොඩ අරගෙන තිබෙනවා. තවම ගැටලු‍ තිබෙනවා. අපි මුදල් මුද්‍රණය කරන්න ගියොත් උද්ධමනය වැඩි වෙනවා. තිබෙන මුදල් එක්ක වැඩ කරද්දි සීමා ඇති වෙනවා. කෙසේ හෝ අපි සියලු‍දෙනා එකතු වෙලා මේ ප්‍රශ්නවලට විසඳුම් සෙවිය යුතුයි.

දැනට තිබෙන්නේ තමන්ගේ ප්‍රදේශවල මේ වගා කටයුතු ආරම්භ කරන්න. ඒ ගැන වාර්තා කරන්න. දෙවනුව අපිට වැඩිපුර අවශ්‍ය ආහාර වර්ග ගැන අපේ ආහාර සුරක්ෂිතතා කාර්යාංශයෙන් දැනුම් දෙයි. වී වගාව ගැන ප්‍රශ්නයක් නැහැ. මේ කන්නය සාර්ථක වුණොත් අපිට අතිරික්තයක් තිබෙනවා. බඩඉරිගු වැනි බෝග වගාවන් වැඩි කරගන්න ඕන. ඒ සඳහා ඉඩ කඩ ලබා ගනිමින් ඒ කටයුතු සිදු කරන ලෙස මම ඔබෙන් ඉල්ලා සිටිනවා.

පළමුව අපි ආහාර සුරක්ෂිතාව ඇති කළ යුතුයි. දෙවනුව මන්ද පෝෂණය තුරන් කිරීම සඳහා ආහාර ලබාදීමේ වැඩසටහන ආරම්භ කර තිබෙනවා. අපිත් ඒවට ආධාර උපකාර කරනවා. ඒ සඳහා ආහාර බැංකු, ප්‍රජා මුලු‍තැන්ගෙය මෙම වැඩසටහන් ඇති කරලා තිබෙනවා. මොකද අපි මේ ගත කරන්නේ අසීරු කාලයක්. ඒත් කාටවත් ආහාර නැතිව ඉන්න අපි ඉඩ දෙන්න හොඳ නැහැ. ඉදිරියේ දි මහ කන්නය සාර්ථක වුණාහම මේ තත්ත්වයෙන් අපිට ඉදිරියට යන්න පුලු‍වන්. ඒ වගේම මෙම ආහාර සුරක්ෂිතතා යාන්ත්‍රණය මෙතතින් නතර කරන්නේ නැහැ. මෙය ක්‍රියාත්මක කරන ගමන් ලබන වසරේ සිට කෘෂිකර්මාන්තය නවීකරණය කරන වැඩසටහන් අපි ආරම්භ කරනවා. එහෙම නම් අපි අලු‍ත් වැඩකටයුත්තක් භාරගෙන තිබෙන්නේ. ඒ සඳහා අපි සියලු‍දෙනා එකට එකතු වෙලා  වැඩ කරන්න ඕන.

මේ වැඩකටයුත්තේදී අපට තිබෙන්නේ පක්ෂ දේශපාලනය නෙවේ, සම්ප්‍රදායික  දේශපාලනය මේකට වැඩක් නැහැ. පක්ෂ දේශපාලනය පැත්තකට දාන්න. ජනතාවගේ ආහාර ගැටලු‍ව විසඳන දේශපාලනයට අපි යන්න ඕන. ඒ වැඩපිළිවෙළට අපි එකතු වෙමු. මහ කන්නයේ සාර්ථක අස්වැන්නක් ලබන්න දැන් සිට අප්‍රේල් දක්වා නිෂ්පාදන වැඩසටහන ක්‍රියාත්මක කළ යුතුයි.

මම බලාපොරොත්තු වෙනවා අම්පාර දිස්ත්‍රික්කයෙන් රටට වුවමනා ආහාරවලින් වැඩි ප්‍රමාණයක් ලබා දෙයි කියල. මේ කටයුත්තේදී දේශපාලන බේදයක් නැතිව සියලු‍ මන්ත්‍රීවරු, සංවිධායකවරු එකතුවෙලා මේ වැඩසටහන කරන්න. කෘෂිකර්ම අමාත්‍යවරයා සහ අග්‍රාමාත්‍යවරයා ඉදිරියේදී මේ ප්‍රදේශයට පැමිණෙයි මේවැඩසටහනේ ප්‍රගතිය ගැන බලන්න. නැගෙනහිර පළාත් ආණ්ඩුකාර අනුරාධා යහම්පත්, පාර්ලිමේන්තු මන්ත්‍රී අම්පාර දිස්ත්‍රික් සංවර්ධන කමිටු සභාපති ඩබ්ලිව්.ඩී. වීරසිංහ, පාර්ලිමේන්තු මන්ත්‍රීවරුන් වන ඒ.එල්.එම්. අතාවුල්ලා, එච්.එම්.එම්. හරිස්, ෆයිසාල් කාසිම්, වෛද්‍ය තිලක් රාජපක්ෂ, එන්.එම්.එම්. මුෂාරෆ්, ටී. කලෙයි අර්සන්, සරත් වීරසේකර, හිටපු අමාත්‍ය දයා ගමගේ, හිටපු රාජ්‍ය අමාත්‍ය අනෝමා ගමගේ, ජනාධිපති ලේකම් සමන් ඒකනායක, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක, ජාතික ආහාර සුරක්ෂිතතාව පිළිබඳ ජනාධිපති උපදේශක ආචාර්ය සුරේන්

බටගොඩ යන මහත්ම මහත්මීහු සහ ත්‍රිකුණාමල දිස්ත්‍රික් ලේකම්, නැගෙනහිර පළාත් ප්‍රධාන ලේකම්, අම්පාර දිස්ත්‍රික් ලේකම්, නැගෙනහිර පළාත් කෘෂිකර්ම අමාත්‍යාංශයේ ලේකම්, නැගෙනහිර පළාත් සභාවේ සභාපති සහ අම්පාර දිස්ත්‍රික්කය නියෝජනය කරන කෘෂිකර්ම, වාරිමාර්ග, සමෘද්ධි ඇතුළු රාජ්‍ය නිලධාරීහුද මීට එක්ව සිටියහ.
 

advertistmentadvertistment
advertistmentadvertistment