ජනාධිපති රනිල් වික්‍රමසිංහ
අයිඑම්එෆ් එකඟත්වය ඇති වූ පමණින් සෑහීමකට පත් වීමට නොහැකි බවත් තවත් දීර්ඝ ගමනක් ආරම්භ කිරීම සඳහා දැන්වත් රට ගොඩනැංවීමේ ව්‍යායාමයට පක්ෂ විපක්ෂ අප සියලුදෙනා එකතුවෙලා වැඩ කළයුතු අතර රටේ ආර්ථිකය ගොඩ නැංවීමේ මල්වට්ටියට අපි හැමෝම අතගසමු යැයි ජනාධිපති රනිල් වික්‍රමසිංහ මහතා පාර්ලිමේන්තුවේ දී ඊයේ (22දා) පැවසීය.
අයිඑම්එෆ් එකඟතා ලියවිල්ල ද සභාගත කරමින්, අතීත අත්දැකීම් ඔස්සේ තමන් ඇතිකරගත් විශ්වාසය මත තමන් වැටුණත්, රට වට්ටන්නෙ නෑ යන අදහස ඇතිව තමන් රට ගොඩ නැංවීමේ අභියෝගය බාරගත් බවද කී ජනාධිපතිවරයා මෙරටට ලැබුණු විස්තීරණ ණය පහසුකම පිළිබඳ පළමු නිල ප්‍රකාශය සිදු කරනු ලැබීය.
ජාත්‍යන්තර මූල්‍ය අරමුදලේ විස්තීරණ ණය පහසුකම ලබාගන්න අපට පුළුවන් වූ බව මේ ගරු සභාවට නිල වශයෙන් දන්වා සිටින්න මා කැමැතියි. රාජ්‍ය මුදල් පිළිබඳ සියලු බලතල ව්‍යවස්ථාව මගින් පවරා තියෙන්නෙ පාර්ලිමේන්තුවටයි.
● මා භාරගත්තේ ගිනිගත්තු රටක්
මා පසුගිය ජුලි 09 වැනිදා බාරගත්තේ ගිනි ගත්තු රටක්. අවුලෙන් අවුලට පත් වෙලා තිබුණු රටක්. හෙට දවසක් ගැන අබමල් රේණුවක බලාපොරොත්තුවක් තිබුණෙ නැති රටක්. නිල වශයෙන් බංකොලොත් භාවය ප්‍රකාශ කරපු රටක්. උද්ධමනය සියයට 73 ක් දක්වා ඉහළ ගිය රටක්. ඉන්ධන, ගෑස් පෝලිම්වල මිනිස්සු දවස් ගණන් දුක් විඳින රටක්. පාසල් වැහිච්ච රටක්. දවසකට පැය දහයක් දොළහක් විදුලිය කප්පාදු කරන රටක්.
ගොවීන්ට වගා කරන්න පොහොර නොතිබුණු රටක්. නීතිය හා සාමය වල් වැදිච්ච රටක්. ආණ්ඩුවේ කාර්යාල බලහත්කාරයෙන් අල්ලාගෙන ඒවායේ පිටස්තරයන් පදිංචිවෙලා හිටපු රටක්. මැර කණ්ඩායම් තැන තැන පහරදීම් කළ රටක්. ප්‍රතිවාදීන්ගේ ගෙවල් ගිනිතියන රටක්. මහදවල් මහමඟ මිනිස්සු මරා දාපු රටක්. මෙහෙම පසුබිමක වගකීම් බාරගන්න කිසිවෙක් කැමති වුණේ නෑ. සමහරු පස්ස ගැහුවා. සමහරු කේන්දරේ බලන්න කල් ඉල්ලුවා. සමහරු ලිස්සලා ගියා. සමහරු බය වුණා.
● මා වැටුණත් රට වැටෙන්න දෙන්නේ නැතැයි
කියන අදහස අනුව අභියෝගය භාරගත්තා
මගෙන් මේ ඉල්ලීම කළේ, ඒ කවුරුත් වගකීම භාර ගන්න ඉදිරිපත් වුණේ නැති අවස්ථාවකයි. මා කිසිම කොන්දේසියකින් තොරව අභියෝගය බාර ගත්තා. මට පාර්ලිමේන්තුවේ බලයක් තිබුණේ නෑ. මට මගේ කියා මන්ත්‍රීවරු හිටියේ නෑ. හැබැයි මේ කිසිවක් නැතත්, මට තිබුණෙ එකම එක ශක්තියයි. ඒ, මා ඉපදුණ, මා හැදුන වැඩුණ, මා අධ්‍යාපනය ලබපු මගේ ආදරණීය රට යළි ගොඩ ගන්න මට පුළුවන් කියන විශ්වාසය විතරයි. ඒ විශ්වාසය තහවුරු කරන්න අතීත අත්දැකීම් ගණනාවකුත් මට තිබුණා.
වසර 2001 වෙද්දී රටේ ආර්ථික ඍණ වර්ධනයකට කඩා වැටුණා. නමුත් පාලනය බාර අරන් වසර 2 කට අඩු කාලයක් තුළ රටේ ආර්ථිකය හරි මඟට ගන්න මට පුළුවන් වුණා. ඒ විතරක් නොවෙයි, ටෝකියෝ ආධාර සමුළුව මගින් ඇමරිකානු ඩොලර් බිලියන 4ක ආධාර දිනා ගැනීමට මට පුළුවන් වුණා. අවාසනාවකට ඊට පස්සේ පාලනය භාර ගත්ත අය ඒ මුදල නිසි ආකාරයෙන් පාවිච්චියට ගත්තෙ නෑ. 2015 දී මා ආර්ථිකය භාර ගනිද්දී තිබුණෙ දුර්වල තත්ත්වයක. නමුත් 2018 වන විට අයවැයේ ප්‍රාථමික අතිරික්තයක් ලබා ගන්නට අපට හැකි වුණා. විවිධ සහන දෙන ගමන් වැටුප් 106% කින් පමණ වැඩි කරන්නටත් අප ක්‍රියා කළා. මේ බරපතළ අභියෝගය බාර ගනිද්දී මා සතුව තිබුණේ ඒ අතීත අත්දැකීම් ඔස්සේ ඇතිකරගත් විශ්වාසය පමණයි. මා වැටුණත්, රට වට්ටන්නෙ නෑ කියන අදහස ඇතිව මම අභියෝගය බාරගත්තා.
● තවත් ඩොලර් බිලියන 7ක පමණ කඩිනම් ණය ආධාර අප බලාපොරොත්තු වෙනවා
අයිඑම්එෆ් එකඟතාව ලැබීමත් සමග තරුණ තරුණියන්ගේ අනාගතය ගොඩ නංවන්නට අපට මාවතක් විවෘත වී තියෙනවා. අපේ මාතෘ භූමිය යළිත් ඔසවා තබන්නට අවකාශ උදා වී තියෙනවා. මේ ණය පහසුකම යටතේ වසර 4ක කාලයක් තුළ අපට අමරිකානු ඩොලර් බිලියන තුනක පමණ ආධාරයක් හිමිවෙනවා. අමරිකානු ඩොලර් මිලියන 330 ක ප්‍රමාණයක් එහි පළමු වාරිකය වශයෙන් දැන් අපට ලැබී තියෙනවා. ලෝක බැංකුව සහ වෙනත් ණය ආධාර ලබාදෙන පාර්ශ්වයන් වෙතින් තවත් ඩොලර් බිලියන 7ක පමණ කඩිනම් ණය ආධාර අප බලාපොරොත්තු වෙනවා. අයිඑම්එෆ් විස්තීරණ ණය පහසුකම කියන්නේ ගිනි පොලියට ගන්නා තවත් ණයක් විතරයි කියලා අර්ථ දක්වන අයත් ඉන්නවා.
මේ ලැබෙන මුදලින් මුළු රටේ ණය බර ගෙවා ඉවර කරන්න බෑ කියමින් ඝෝෂා කරන අයත් ඉන්නවා. එවැනි ප්‍රකාශවලින් පෙන්නුම් කරන්නේ එක්කෝ ඒ අයගේ නොදැනුවත්කම. නැත්නම් දේශපාලන වාසි ලබා ගැනීම සඳහා බොරුවෙන් මේ රටේ අහිංසක ජනතාව රැවටීමට
ගන්නා උත්සාහයයි. අයිඑම්එෆ් විස්තීරණ ණය කියන්නෙ වැටුණු රටක් යළි යථා තත්ත්වයට පත් කර ගැනීම සදහා දෙන පහසුකමක්. ඒ සඳහා සකස් කර දෙන වේදිකාවක්. මේ පහසුකම ලබා දීමත් සමග අපට ජාත්‍යන්තරයේ යළිත්
පිළිගැනීමක් ලැබෙනවා. ශ්රී ලංකාව තවදුරටත් බංකොලොත් රටක් නොවන බවට සහතිකයක් ලැබෙනවා. අපේ දේශීය බැංකු යළිත් ලෝකය පිළිගන්නා මට්ටමට පත් වෙනවා. ජාත්‍යන්තර මූල්‍ය ආයතන අපේ ණයවර ලිපි වලට ගරු කරනවා.
● වෙනත් ජාත්‍යන්තර මූල්‍ය ආයතනවලින් ඉතා අඩු පොළියට ණය ලබාගැනීමේ පසුබිම සැකසුණා
වෙනත් ජාත්‍යන්තර මූල්‍ය ආයතනවලින් ඉතා අඩු පොලියට ණය ආධාර ලබා ගැනීමට පසුබිමක් සැකසෙනවා. විදේශ ආයෝජකයන් යළිත් ලංකාව ගැන විශ්වාසය තබනවා. ජාත්‍යන්තරයේ පුළුල් අවස්ථා ගණනාවකට අපට දොරගුළු හැරෙනවා. ශක්තිමත් නව ආර්ථිකයක් ගොඩ නැංවීමේ පදනම සකස් වෙනවා. ඒ විතරක් නෙවෙයි, මේ එකඟත්වය නිසා අපේ රටේ මූල්‍ය විනය නීති ගත වෙනවා. දූෂණ වංචා වැළැක්වීමේ දැඩි නීති රීති අලුතෙන් හඳුන්වා දෙනවා. ශ්රී ලංකාවේ මෙතෙක් නොතිබූ නව මූල්‍ය සංස්කෘතියක් හා දූෂණයෙන් තොර පරිසරයක් මෙමගින් නිර්මාණය වෙනවා.
අයිඑම්එෆ් සංවිධානය අපේ රට පිළිබඳව තීන්දුව ගැනීමට පෙර රට සම්පූර්ණයෙන්ම අකර්මණ්‍ය කරන්නට සමහරු උත්සාහ ගත්තා. නොනවතින වර්ජන රැල්ලක් ඇති කරන්න, ආර්ථිකය කඩා බිඳ දමන්න, රට අරාජික කරන්න සැලසුම් කළා. ඔවුන් බලාපොරොත්තු වුණේ කඩාකප්පල්කාරී ක්‍රියා මගින් අයිඑම්එෆ් සහයෝගය ලබාගැනීම වළක්වන්නයි. සමහර දේශපාලන කණ්ඩායම්, සමහර වෘත්තීය සමිති, සමහර ජනමාධ්‍ය මේ වැඩේට සෑහෙන්න මහන්සි වුණා. රට අස්ථාවර නිසා අයිඑම්එෆ් සහයෝගය ලැබෙන්නේ නෑ කිව්වා.
පළාත් පාලන ඡන්දය පවත්වන්නේ නැති නිසා අයිඑම්එෆ් සහයෝගය ලැබෙන්නෙ නෑ කිව්වා. මෙවැනි නොයෙකුත් බොරු ප්‍රචාර කරමින් රටේ ජනතාව පාරට බස්සන්න දඟ දැම්මා. නමුත් රටේ බහුතර ජනතාව මේ කඩාකප්පල්කාරී වැඩවලට සහාය දැක්වූයේ නෑ. රටේ ඉදිරිගමන එක් එක් දේශපාලන බල ව්‍යාපෘති වෙනුවෙන් කඩාකප්පල් කරන්න බහුතර ජනතාව කැමැති වුණේ නෑ. ඔවුන් රට වෙනුවෙන් වගකීමක් ඇතිව ක්‍රියා කළා.
● 2025 දී, දේපල බදු ක්‍රමය වෙනුවට ධන බද්දක්
විවිධ දුෂ්කරතා මැද, නොයෙකුත් පීඩනයන් මැද, ඒ සියල්ල ඉවසමින් දුක් කරදර විඳ දරා ගනිමින්, රටේ බහුතර ජනතාව සන්සුන්ව ඉවසීමෙන් කටයුතු කළා. අපට අයිඑම්එෆ් එකඟතාව ලබාගැනීමට ඔවුන්ගේ කැපවීම විශාල ශක්තියක් වුණා. ඒ නිසා මුලින්ම මේ රටේ ජනතාවට මගේ ප්‍රණාමය පළ කරන්න කැමතියි. මේ කටයුත්තේදී අපේ නිලධාරීන් දිවා රෑ නොබලා ඊට වෙහෙස වුණා. සමහර අයට තර්ජනවලට මුහුණ දෙන්නත් සිදු වුණා. ඇමතිවරුන් කැපවී කටයුතු කළා. මේ සභාවේ ගරු සාමාජිකයන් බොහොමයක් ඊට සහය දුන්නා. සමහරු ප්‍රසිද්ධියේ. තවත් සමහරු අප්‍රසිද්ධියේ. ඔවුන් සියලු දෙනාටත් මා ස්තුතිවන්ත වෙනවා.
ඒ වගේම මේ විස්තීරණ ණය පහසුකම ලබා ගැනීමේ කාර්යයේදී අපේ ප්‍රධාන ණය හිමියන් අපට සහය දුන්නා. විදේශීය රටවල්, ජාත්‍යන්තර සංවිධාන අපට සහය දුන්නා. විදේශීය රාජ්‍ය නායකයන් හා මැති ඇමතිවරුන්, ජාත්‍යන්තර සංවිධාන නිලධාරීන් හා නියෝජිතයන්, විදේශීය රාජ්‍ය තාන්ත්‍රිකයන් සහ නිලධාරීන් අපට උදව් කළා. ඒ සියළු දෙනාටත් ශ්රී ලංකාවේ ගෞරවනීය ස්තූතිය පළ කරනවා.
අප මේ මුල පුරන්නේ අලුත් ගමනකට, මේ ගමනේ දී ආර්ථික ප්‍රතිසංස්කරණ ගණනාවක් සිදු කළ යුතු වෙනවා. අපේ සාර්ථකත්වයට පදනම දැමෙන්නේ එතැනින්. මේ සමහර ප්‍රතිසංස්කරණ අප 2022 අතුරු අයවැය සහ 2023 අයවැය මගින් යෝජනා කර දැනටමත් ක්‍රියාවට නංවා තියෙනවා. තවත් ප්‍රතිසංස්කරණ ගණනාවක් අප හඳුන්වා දෙනවා. ඒ අතරින් වැදගත් කරුණු කිහිපයක් මා දැන් අවධාරණය කරන්නට කැමතියි.
ඒ වගේම දැනට අප ක්‍රියාත්මක කරන සහ අනාගතයේ ක්‍රියාත්මක කරන්නට බලාපොරොත්තු වෙන ප්‍රතිසංස්කරණ ක්‍රියාවලිය පිළිබඳවත් මෙම ගරු සභාව දැනුවත් කරන්නටත් මා බලාපොරොත්තු වෙනවා.
2025 වන විට ප්‍රාථමික හිඟය දළ දේශීය නිෂ්පාදිතයෙන් 2.3% ක් බවට පත් කර ගැනීම අපගේ ඉලක්කයයි.
ශ්රී ලංකා රජයේ ආදායම මේ වන විට දළ දේශීය නිෂ්පාදිතයෙන් 8.3% ක්. ලෝකයේ වෙනත් රටවල් හා සසඳද්දී අපේ රාජ්‍ය ආදායම පවතින්නේ පහළම අගයක. මේ නිසා අප සැලසුම් කරන්නේ 2026 වන විට රජයේ ආදායම දළ දේශීය නිෂ්පාදිතයෙන් 15% ක් දක්වා වැඩි කර ගැනීමටයි.
ආංශික බදු සහන නොමැතිව සංස්ථාපිත ආදායම් බදු අනුපාතය 30% දක්වා දැන් වැඩි කර තියෙනවා.
වැට් බදු අනුපාතය 8% සිට 15% දක්වා වැඩි කිරීමට අප පියවර ගත්තා වැට් බදු සඳහා ලබා දී ඇති නිදහස් කිරීම් ක්‍රමානුකූලව අඩු කිරීමට, වැට් බදු ආපසු ගෙවීම් කඩිනම් කිරීමට සහ එස් – වැට් ක්‍රමය අහෝසි කිරීමටත් පියවර ගන්නවා.
රාජ්‍ය වියදම් කළමනාකරණය
විධිමත් වියදම් කළමනාකරණයක් ඔස්සේ රජයේ වියදම් සඳහා ලබාදෙන ප්‍රතිපාදන වැඩි කිරීමට පියවර ගන්නවා.
උද්ධමනයට සරිලන පරිදි, වැටුප් සහ විශ්‍රාම වැටුප් ගැලපීමට අපේක්ෂා කරනවා. නමුත් මේ ගැළපීම් සිදුකරන්නේ ප්‍රාථමික අයවැය ශේෂයේ සීමාවන් තුළයි.
රාජ්‍ය ව්‍යවසාය සහ බලශක්ති මිල ඉන්ධන මිල තීරණය කිරීම දේශපාලන අධිකාරියෙන් සම්පුර්ණයෙන්ම ඉවත් කරනවා. ඉන්ධන මිල තීරණය කරන්නේ 2018 මිල සූත්‍රය අනුව පමණයි.
අනාගත පිරිවැය ඇස්තමේන්තුව සැලකිල්ලට ගෙන සෑම සය මසකට වරක්ම විදුලි මිල ගැලපීමට පියවර ගන්නවා.
මහා පරිමාණයෙන් පාඩු ලබන, මාර්ග සංවර්ධන අධිකාරිය, ශ්රී ලංකා ගුවන් සේවය, ශ්රී ලංකා ඛණිජ තෙල් නීතිගත සංස්ථාව හා ලංකා විදුල බල මණ්ඩලය වැනි ආයතනයන් හි ශේෂ පත්‍ර යළි සකස් කරනවා. කල් ඉක්ම වූ ස්වෛරීත්ව ඇපකර මත ලබාගත් විදේශ ණය ප්‍රමාණය ශ්රී ලංකා රජය ගෙවිය යුතු ණය ලෙස මාරු කිරීමට කටයුතු කරනවා.
මිල ස්ථායීතාව සහ මූල්‍ය ප්‍රතිපත්ති උද්ධමන අනුපාතය 4% 6% අතර අනුපාතයට නැවත ගෙන ඒමට කටයුතු කරනවා. මේ වන විට උද්ධමනය සැලකිය යුතු මට්ටමකින් අඩු කිරීමට අපට හැකි වුණා. එසේම 2023 වසර මැද භාගය වන විට උද්ධමන අනුපාතය තනි අගයක් දක්වා ගෙන ඒම අපේ ඉලක්කයයි.
මේ සැලසුම් ක්‍රියාත්මක කරන කාලය තුළ දී මුදල් අච්චු ගැසීමෙන් ක්‍රමානුකූලව බැහැර වෙනවා. අයවැය හිඟය පියවා ගැනීම සඳහා ණය ගැනීමෙන් තොරව ආදායම් උපදවා ගැනීමට මෙමගින් මහා භාණ්ඩාගාරයට සිදු
වෙනවා.
දැනට පවත්නා විදේශ විනිමය සීමා කිරීම් හා නියාමනය ක්‍රමයෙන් ඉවත් කරමින්, විදේශ විනිමය වෙළෙඳපොළේ කටයුතු වෙළෙඳපොළ නිර්ණායක මත තීරණය වීමට ඉඩ ලබා දෙනවා.
තීරණය කරන ලද ඉලක්කයන්ට අනුව විදේශ සංචිත ගොඩනැගීම සඳහා විදේශ මුදල් මිලදී ගැනීම මහ බැංකුව විසින් සිදු කරනවා.
● අයිඑම්එෆ් විසින් රාජ්‍ය දුර්වලතා පිළිබඳ වාර්තාවක් හදනවා
දේශීය විශේෂඥයන්ගේ අදහස් ද සැලකිල්ලට ගෙන අයිඑම්එෆ් සංවිධානය විසින් රාජ්‍ය දුර්වලතා පිළිබඳ වාර්තාවක් සකස් කරනවා. දුෂණය වැළැක්වීම සම්බන්ධයෙන් රජය හා ආයතනික රාමුව තුළ ඇති අඩුපාඩු හඳුනාගැනීමට මේ මගින් අවස්ථාව ලැබෙනවා.
එක්සත් ජාතීන්ගේ ප්‍රඥප්තියට සමගාමීව දූෂණය මැඬලීමේ නීති සම්පාදනය කෙරෙනවා.
අහිමි වූ වත්කම් යළි ලබා ගැනීමේ ප්‍රතිපාදන 2024 මාර්තු වන විට ව්‍යවස්ථාදායක රාමුවට ඇතුළත් කිරීමට ද අපේක්ෂා කරනවා.
ශක්තිමත් මූල්‍ය ප්‍රතිපත්ති පදනම් කරගනිමින් නව රාජ්‍ය මුදල් කළමනාකරණ පනතක් කෙටුම්පත් කරනවා.
සහනදායී බදු පදනම මත වාහන ආනයනය කිරීමේ බලපත්‍ර ලබාගත් පුද්ගලයන්, ආයෝජන මණ්ඩලයේ බදු සහන බදු විරාම ලබා ගන්නා ආයතන ලේඛනය ජනතාවගේ දැන ගැනීම සඳහා ප්‍රසිද්ධ කරනවා. එසේම විශාල ප්‍රමාණයේ රාජ්‍ය ප්‍රසම්පාදන කොන්ත්‍රාත්තු පිළිබඳ විස්තර ද ප්‍රසිද්ධ කිරීමට කටයුතු කරනවා.
● කාන්තා ශ්‍රම බළකායේ සහභාගිත්වය වැඩි දියුණු කරනවා
ජාත්‍යන්තර මූල්‍ය අරමුදල සම්බන්ධ වැඩසටහනෙහි ප්‍රතිසංස්කරණ ඔස්සේ මධ්‍ය පරිමාණ හා දීර්ඝ කාලීන ආර්ථික වර්ධනය වැඩිදියුණු කිරීම ඇතුළත්. මෙහිදී වෙළෙඳ ප්‍රතිසංස්කරණවලට අදාළ ක්‍රියාමාර්ග, කාන්තා ශ්‍රම බලකායේ සහභාගීත්වය වැඩි දියුණු කිරීමේ පියවරයන්, කුසලතා සංවර්ධනය, බලශක්ති ක්ෂේත්රයේ ප්‍රතිසංස්කරණ මගින් අකාර්යක්ෂමතාව හා පිරිවැය අඩු කර ගැනීමට ද පියවර ගන්නවා. කාලගුණ වෙනස් වීම මත සිදුවන වෙනස්කම් ද මෙහිදී සැලකිල්ලට ගැනෙනවා.
ණය ආපසු ගෙවීම් සම්බන්ධයෙන් ඇති කරගන්නා කොන්දේසි පිළිබඳ අවසන් තීරණ ගැනීමට පෙරාතුව, සියලු ද්විපාර්ශවීය ණය හිමියන්ට ඒ ගැන දැන ගැනීමට හැකි වන ආකාරයේ විවෘත ක්‍රමවේදයක් අප අනුගමනය කරනවා. අනෙකුත් විදේශීය ණය හිමියන් සම්බන්ධයෙන් ද අනුගමය කරන්නේ ඒ පිළිවෙතමයි. එහිදී සියළු ණය හිමියන්ට සාධරණ වන අයුරින් ප්‍රතිව්‍යුහගත කිරීම් සිදු කිරීම අපේ බලාපොරොත්තුවයි.
අපේ නිල ණය හිමියන් වෙත විවෘත ලිපියක් යවමින් මා දන්වා සිටි ආකාරයට, අප කිසිදු ණය හිමියෙකුට වැඩි සැලකිල්ලක් දක්වන්නේ නෑ. ඔවුන් සියලු දෙනාටම සමානව සලකනවා. අප මෙතක් ඔවුන් සියලුදෙනා සමග විවෘතව හා මිත්‍රශීලීව කටයුතු කළා. ඉදිරියටත් එසේම කටයුතු කරනවා.
අපේ ණය ගැති භාවයන් පිළිබඳ වාර්තා නිරන්තරව ප්‍රකාශයට පත් කරනවා. රටේ ණය පිළිබඳ කිසිදු තොරතුරක් වසන් කරන්නේ නෑ. අප මුහුණ දෙන කටුක සත්‍යය එයයි.
අපේ මේ වැඩපිළිවෙළ මාස හයෙන් හයට සමාලෝචනය කරන්නට අපත්, අයිඑම්එෆ් සංවිධානයත් ක්‍රියා කරනවා. පළමු සමාලෝචනය සිදු කරන්නේ ලබන ජුනි මාසයේදී. දැනට ක්‍රියාත්මක කරන බදු ක්‍රමය සංශෝධනය කිරීම ගැන දැනටමත් අපේ අවධානය යොමු වෙලා තියෙනවා. මහා භාණ්ඩාගරය සංශෝධිත යෝජනා සකස් කරමින් යනවා. ඒ වගේම විවිධ විද්වතුන්, ආර්ථික විශේෂඥයන් මේ සම්බන්ධ යෝජනා ඉදිරිපත් කරලා තියෙනවා. ඔවුන් සියලුදෙනා සමග සාකච්ඡා කරන්න අප බලාපොරොත්තු වෙනවා. ඉන්පසු පොදු එකඟත්වයකට එළැඹෙන්නට අපට පුළුවන් වේවි.
● බදු සංශෝධන ගැන අයිඑම්එෆ් සමග සාකච්ඡා කරනවා
ජුනි මාසයේ සමාලෝචනයේදී මේ බදු සංශෝධන අපේ සැලසුමට ඇතුළත් කරන්න අයිඑම්එෆ් සංවිධානය සමග අප සාකච්ඡා කරනවා. ඊට අමතරව කාලීනව අවශ්‍ය වෙනත් ප්‍රතිපත්තිමය සංශෝධන ගැනත් අප සාකච්ඡා කරනවා. මේවා හැඟීම්වලින්, අරගලවලින් විසඳා ගන්න පුළුවන් දේවල් නෙවෙයි. මේ ගැටළු විසඳා ගත යුත්තේ සීරුවෙන්, සැලකිල්ලෙන් හා බුද්ධියෙන්.
අපි මේ ගත කරන්නේ අමාරු කාලයක්. හැබැයි අපේ අමාරුකම්, දුෂ්කරතා තාවකාලිකයි. වර්තමාන වෙහෙසීමේ හා කැපවීමේ ප්‍රතිඵල අපට ටික කලකින් ලැබේවි. හෙට දවසේ රට බාර ගන්නා තරුණ තරුණියන් වෙනුවෙන්, අපේ අනාගත දරු පරපුර වෙනුවෙන් අප මේ කැපවීම කළ යුතුයි. අප මේ එකඟතාවයට අනුකූලව ඉදිරි වසර හතර පුරා නිසි මුල්‍ය විනයක් සහිතව, ආර්ථික ප්‍රතිසංස්කරණ ඉදිරියට ක්‍රියාත්මක කළහොත්, රටේ අනගතය වෙනුවෙන් ශක්තිමත් ආර්ථික පදනමක් සැකසෙනවා. අප මේ මාර්ගයෙන් ඉවත් වුණොත් පසුගිය අප්‍රේල් මාසයේ තිබුණු තැනටත් වඩා අන්ත අයහපත් තත්වයකට මුළු රටම ඇද වැටෙනවා.
● ඔබේ අදහස් සමග සහයෝගයද ලබාදෙන ලෙස ඉල්ලා සිටිනවා
අයිඑම්එෆ් එකඟතාව පිළිබඳ පාර්ලිමේන්තු විවාදයට අප්‍රේල් තුන්වැනි සතියේදී දින නියම කරන්න අප ක්‍රියා කරනවා. එහිදී ඔබේ අදහස් සමග සහයෝගයද ලබා දෙන ලෙස මේ ගරු සභාවේ සිටින ඔබ සැමගෙන් ඉල්ලා සිටිනවා.
ඒ වගේම තවත් වැදගත් කරුණක් ගැන ඔබේ අවාධානය යොමු කරන්න කැමතියි. අයිඑම්එෆ් එකඟත්වය ඇති වූ පමණින් අපට සෑහීමකට පත් වෙන්න බෑ. මේ ගමනක අවසානය නෙවෙයි. තවත් දීර්ඝ ගමනක ආරම්භය තමයි මේ. දැන් අපි අපේ උත්සාහයෙන් ඒ ගමන යා යුතුයි.
මේ සියල්ල ලේසි පහසු ඉලක්ක නෙවෙයි. නමුත් රට වෙනුවෙන් කැපවෙමින් අප මේ ගමන ඉදිරියට යා යුතුයි. මේක අසීරු ගමනක්. අපි ඒ අසීරු ගමන, සීරුවෙන් යමු.
● අයිඑම්එෆ් සමග ඇතිකරගත් සැලසුම වසර හතරකදී ක්‍රියාත්මක කර අවසන් කළ යුතුයි
අයිඑම්එෆ් සංවිධානය සමග අප ඇති කරගත් සැලසුම වසර හතරකදී ක්‍රියාත්මක කර අවසන් කළ යුතුයි. නමුත් අපේ ශක්තිය හා අධිෂ්ඨානය මත එය වසර තුනක් හෝ තුනහමාරක් තුළ අවසන් කරගත හැකියි. අපි ඊට උත්සාහ දරමු. වෙහෙසෙමු.
සමාජයේ පහළම ස්ථරයන්හි සිටින ජනතාව වෙනුවෙන් ශක්තිමත් සමාජ ආරක්ෂණ වැඩ පිළිවෙළක් සහතික කිරීම. දෙවනුව, රුපියල ශක්තිමත් කරලීම සඳහා උපාය මාර්ග සහ විධිමත් සැලසුමක් ක්‍රියාවට නැංවීම. තුන්වෙනුව, දූෂණය මැඩලීමේ නීති රීති වහාම සම්මත කොට ක්‍රියාවට නැංවීම. අපේ අධිකරණ ඇමතිතුමා මේ පිළිබඳ කෙටුම්පත ළඟදීම ඉදිරිපත් කරාවි. සිව්වනුව, සමජයේ සිදුවිය යුතු වෙනත් ව්‍යුහාත්මක ප්‍රතිසංස්කරණ සඳහා අවධානය යොමු කිරීම. ඒවා හඳුනා ගැනීම සහ ඒ ප්‍රතිසංස්කරණ සඳහා මුල පිරිම.
ඩී. එස්. සේනානායක අගමැති සමයේ අපේ රට කිසිදු විදේශ ණයක් ලබා ගත්තේ නෑ. පසුව අපේ රටේ ආදායමෙන් වැඩ කටයුතු කරනවා වෙනුවට, පිටරටින් ණය ගෙන රට කරවීමේ සම්ප්‍රදායක් ඇති වුණා. අප සියලුදෙනා අද මේ දුකට, පීඩාවට පත්ව සිටින්නේ ඒ සම්ප්‍රදාය පිළිකාවක් බවට පත්වූ නිසයි.
● අවුරුදු 10 තුළ අප මෙතෙක් ගෙන ඇති සියලු ණය ගෙවා අවසන් කළ යුතුයි
අපට හැමදාමත් ණය ගන්න බෑ. අප උත්සාහ ගත යුත්තේ ණය නොගන්නා ජාතියක් බවට පත්වීමටයි. මේ අසීරු සමයෙන් ගොඩ එන්නට අප සියලුදෙනා එක්විය යුත්තේ ඒ නිසයි. ඉදිරි අවුරුදු 10 තුළ අප මෙතෙක් ගෙන ඇති සියළු ණය ගෙවා අවසන් කළ යුතුයි. මේ මාර්ගයේ නිවැරදිව ඉදිරියට ගියොත් අපට ඒ තත්වය උදා කරගන්නට පුළුවන් බව මට විශ්වාසයි.
ඒ ණය ගෙවීමෙන් අනතුරුව රටේ වියදමට සරිලන ආදායම අපිටම උපදවා ගන්නට පුළුවන් ශක්තියක් අප ඇතිකර ගත යුතුයි. උත්සාහ ගත්තොත්, වෙහෙසුණොත් අපට එය කරන්නට පුළුවන්. ඒ මාර්ගයේ ගියොත් නිදහසින් වසර 100 ක් පිරෙන 2048 දී අපේ රටේ ලෝකයේ සංවර්ධිත රාජ්‍යයක් බවට පත් කරගන්නට අපට පුළුවන්.
මෙහිදී තවත් කරුණක් ඔබේ අවධානයට යොමු කරන්නට මම කැමතියි. මෑතකදි එක් මතයක් ප්‍රකාශයට පත්වුණා. ථෙරවාදී බෞද්ධ රටවල් හැම විටම ආර්ථික අතින් දුප්පත් කියලා. දැන් තායිලන්තය මේ මතය බිඳ දමන්නට වෙහෙසෙනවා. ලෝකයේම ථෙරවාදී කේන්ද්‍රස්ථානය ලෙස සැලකෙන අපිත් ඒ මතය බිඳ දමන්නට වෙහෙසිය යුතුයි.
● විපක්ෂය කිසිදු අවස්ථාවක මාහට සහයෝගය ලබාදුන්නේ නෑ
මා මුලින්ම අගමැතිවරයා ලෙස පත් වූ අවස්ථාවේ රටේ ආර්ථිකය යළි ගොඩ නැංවීමේ ව්‍යායාමයට විපක්ෂයේ සහාය ඉල්ලා සිටියා. නමුත් මට ඒ සහාය ලැබුණේ නෑ. ඉන් පසුව ජනාධිපතිවරයා ලෙස පාර්ලිමේන්තුව විවෘත කරන අවස්ථාවේදීත් මා විපක්ෂයේ සහාය ඉල්ලා සිටියා. නමුත් දුන්නේ නෑ. අයවැය විවාදය අවස්ථාවේදීත් මා විපක්ෂයේ සහාය ඉල්ලා සිටියා. සහාය ලබා දුන්නේ නෑ. වර්තමාන පාර්ලිමේන්තු සැසිවාරය විවෘත කරන අවස්ථාවේදීත් මා විපක්ෂයේ සහාය ඉල්ලා සිටියා. ඒත් මට කිසිදු සහයෝගයක් ලබා දුන්නේ නෑ.
ඒ ඒ අවස්ථාවල විවිධ හේතු කියමින් ඔවුන් සහාය ලබා දීම ප්‍රතික්ෂේප කළා. මගේ පත්වීම ව්‍යවස්ථාවට විරුද්ධයි කිව්වා. ජාතික ලැයිස්තුවෙන් අගමැතිවරු පත් කරන්න බෑ කිව්වා. මගේ අරමුණ රට ආර්ථික අර්බුදයෙන් ගොඩ ගැනීම නෙවෙයි, රාජපක්ෂලා බේරා ගැනීම කියලා කිව්වා. අසීරු වැල් පාලමෙන් මම එගොඩ කරන්නේ ශ්රී ලංකා මාතාව නෙවෙයි, නාමල් රාප්පක්ෂ කියලා කිව්වා. නමුත් ශ්රී ලංකා මාතාව අර්ථික වැල් පාලමෙන් එගොඩ කරන්නට මම ක්‍රියා කළ බව දැන් ජාත්‍යන්තරයම පිළිගෙන තියෙනවා. විපක්ෂයේ චෝදනා සත්‍ය නොවන බව දැන් සනාථ වෙලා තියෙනවා.
විපක්ෂයේ චෝදනාවලට මම උත්තර දෙන්න යන්නේ නෑ. අතීතය විවේචනය කිරීම මගේ කාර්යය නෙවෙයි. මගේ කාර්යය අනාගතය ගොඩ නැංවීමයි. අතීත වැරදි යළි සිදු නොවන අන්දමට නීති රීති සහ පසුබිම සකසමින් අනාගතය ගොඩ නැංවීමට මා වෙහෙසෙනවා. කැපවෙනවා. ක්‍රියා කරනවා.
මා නැවතත් ඒ ඉල්ලීම කරනවා. රටේ ආර්ථිකය ගොඩ නැංවීම සඳහා අයිඑම්එෆ් එකඟතාවය ක්‍රියාත්මක කිරීමට කරුණාකර ඔබේ සහය දැන්වත් ලබා දෙන්න. මේ මල්වට්ටියට අපි හැමෝම අතගසමු.
අකිත පෙරේරා, රනිල් ධර්මසේන
ජනාධිපතිවරයාගේ කතාවෙන් පසු මතුවූ සංවාදය…
විපක්ෂ නායක සජිත් ප්‍රේමදාස මහතා: මා ඉල්ලීමක් කරනවා ජනාධිපති තුමා දැන් මේ සිදු කළ කතාව සම්බන්ධයෙන් විවාදයක් ලබා දෙන්න කියලා. ඒ වගේම එතුමාගේ ප්‍රකාශයට පිළිතුරක් ලබා දෙන්න මටත් අවස්ථාවක් ලබා දෙන්න.
සභානායක සුසිල් ප්‍රේමජයන්ත මහතා :
අපි අද සිටම ඒ විවාදය ලබා දෙන්න සූදානම්, අද දිනයට අදාල සියළු ලේඛන අපි සභාගත කරලා තිබෙනවා.
විපක්ෂනායක: අපිත් සූදානම් අද සිට විවාදයකට.
ජනාධිපති රනිල් වික්‍රමසිංහ මහතා: මේ විවාදය කරන්න ඕනේ එක අරමුණක් ඇතිව. විවිධ අදහස් ඉදිරිපත් කළත් අපි එකට එකතුවී වැඩ කටයුතු කරන්න ඕන. ඒ සඳහා ජාතික සභාවේදී මුණු ගැහෙමු.
විපක්ෂ නායක:
අභියෝගයක් කළා අදම මේ විවාදය පවත්වමු කියලා. ඒකට අපි සූදානම්. ඒ විවාදය තුළ අපට එකතුවෙන්න පුළුවන් තැන් තිබෙනවා. එහිදී අපි එකතුවෙනවා. විකල්ප යෝජනා අපි ඉදිරිපත් කරනවා.
සභානායක: ජනාධිපති තුමා අද අයිඑම්එෆ් ලබා
ගැනීම සඳහා ඉදිරිපත් කළ සියළු ලේඛන, කොන්දේසි අද සභාගත කරනවා.
විමල් වීරවංශ මහතා: ජනාධිපතිතුමාගෙන් මම
දැනගන්න කැමතියි, පසුගිය කැබිනට් මණ්ඩල රැස්වීමේදී තීරණයක් අරන් තිබෙනවා ටෙලිකොම් ආයතනයේ රජයේ කොටස් සහ ලංකා හොස්පිට්ල් ආයතනයේ කොටස් විකුණන්න. අයියෝ කෑ ගහන්න එපා. අයිඑම්එෆ් එක දන්නවානම් මේ වගේ මැට්ටෝ ටිකක් ඉන්නේ කියලා සත පහක් දෙන්නෑ. කපුටු කාක් කාක් කියලා තමයි කියන්න තිබෙන්නේ. මම අහන්නේ ලාභ ලබන ආයතන විකුණන්නේ ඇයි? අනෙක මේ ආයතන මිලදී ගන්නේ විදෙස් ආයතන. එහෙම වුනහම ඒ අය ලාභය ගෙනියන්නේ ඩොලර් වශයෙන්. ඒක පාඩුද නැද්ද කියලා මට අයිඑම්එෆ් එකෙන් අහලා හරි කියන්න.
හර්ෂ ද සිලාවා මහතා : අපි හැමදේටම විරුද්ධ වුනේ නෑ. අපි එවකට රජයට කිව්වා අයිඑම්එෆ් යන්න, නැත්නම් රට බංකොළොත් වෙනවා කියලා. අපි මතුටු වෙනවා අයිඑම්එෆ් ගිය එක ගැන. ඒ නිසා අපි ධනාත්මකව මේ විවාදය කරමු.
ජනාධිපති : අයිඑම්එෆ් සමග එකඟ වූ එකඟතාවට අනුමැතිය දෙන්න නැත්නම් මට ඊළඟට ගිහින් අනෙක් ණය හිමියන් සමග කතා කරන්න බෑ.
සභානායක: අපි න්‍යාය පත්‍රය අනුව යමු. ඒ අනුව විවාදය ආරම්භ කරන්න පුළුවන්.
ලක්ෂ්මන් කිරිඇල්ල මහතා: විපක්ෂයේ අය සහයෝගය දුන්නේ නෑ කිව්වා. 21 වැනි සංශෝධනයට අපි සහායෝගය දුන්නේ නැද්ද? අපි අවශ්‍ය වෙලාවට සහය දුන්නා. දැන් අධිකරණය වරප්‍රසාද කමිටුවට ගෙනල්ලා තිබෙනවා. මාධ්‍යයත් ගෙනල්ලා, මැතිවරණ දැන් කල් දාලා. මේක ප්‍රජාතන්ත්‍රවාදයද?
ඉරාන් වික්‍රමරත්න මහතා: අපි අතීතයේ වරද්දා ගත්තා. විශ්වාසය ඇති කරන්න අපි හොරු අල්ලන්න ඕන.
ජනාධිපති : අපි දැන් කෙටුම්පතක් ඉදිරිපත් කරනවා. ඒ ගැන අපිට එකඟද නැද්ද කියන්න. මා යහපාලන ආණ්ඩුව කාලේ ඒ ගැන ක්‍රියා කළා. ඒක භාරව හිටියේ ආනන්ද විජයපාල මහතා. මේවා හොයලා තිබෙනවා. හොරකම් කළ අය අධිකරණයට ගෙනාවා. අපි ඒ ගැන තව ඉදිරියට යනවා.
විමල් වීරවංශ මහතා: කව්ද මේ දුෂණ ගැන හොයනවා කිව්ව ආනන්ද විජයපාල කියන්නේ අපි එහෙම කෙනෙක් දන්නේ නෑ. කව්ද ඒ.
කුමාර වෙල්ගම මහතා : මම ඇත්තටම හදවතින් ස්තුතිවන්ත වෙනවා ජනාධිපතිතුමාට. අපේ රට බංකොළොත් වෙලා හිටියේ. අපි විපක්ෂය ලෙස සහායෝගය දුන්නා. මමනම් මේකට සම්පූර්ණ සහායෝගය දෙනවා. හැමදාම හොරු හොරු කිව්වා. නමුත් අල්ලන හොරෙකුත් නෑ. ඔය හොරු මේ දෙපැත්තෙම ඉන්නවා. ඒත් හොරු අල්ලන්නේ නෑ. අනෙක ඔය හොරකම් කරපු සල්ලි මේ රටේ නෑ. අනෙක කිව්වා ජනාධිපතිට අයිඑම්එෆ් ගේන්න බෑ කියලා. ඒ නිසා අපි ජනාධිපතිතුමාට සහාය දෙමු. රට ගොඩ නගන්න. අපේ පොඩි දරුවෝ ගැන හිතලා. නැතුව මේ නාකි මළ හැත්ත ගැන හිතන්නේ නැතුව.
හරීන් ප්‍රනාන්දු මහතා : අපි නිරන්තරයෙන්ම වේදිකාවේ කියනවා දැක්කා මේ සභාවේ මුල් පේලිවල සිටින කිහිප දෙනෙක් කිව්වා ඒ අයගේ ආණ්ඩුවකින් අයිඑම්එෆ් ගෙවන්නේ නෑ කියලා. ඒකත් හිතේ කියාගෙන මේ විවාදය ආරම්භ කරමු.
