බස් රථවලින් පළාත් මායිම් වෙතට ළගා වී අනෙක් පළාත් වෙත පා ගමනින් යන පුද්ගලයන් අත්අඩංගුවට ගැනීමේ විශේෂ පොලිස් මෙහෙයුමක් අරඹා ඇතැයි ජ්‍යෙෂ්ඨ නියෝජ්‍ය පොලිස්පති අජිත් රෝහණ මහතා ‘‘දිවයින’’ ට ඊයේ (18 දා) පැවැසීය.
එසේ නීති උල්ලංඝනය කරන පුද්ගලයන් හා ඊට අනුබල දෙන බස් රථ රියදුරන් හා කොන්දොස්තරවරුන් සම්බන්ධයෙන් නීතිය දැඩිව ක‍්‍රියාත්මක කරන බව ද හෙතෙම කීය.
පොදු ප‍්‍රවාහන සේවාවලට හෝ අත්‍යවශ්‍ය සේවාවලට හැර අන් කිසිවකුටවත් පළාත් මායිම් හරහා ගමන් කළ නොහැකි බවද ඒ මහතා සඳහන් කළේය.
සෑම පළාතක්ම ආවරණය වන පරිදි පළාත් මායිම්වල විශේෂ පොලිස් කණ්ඩායම් යොදවා ඇති අතර, සියලූ අතුරු මාර්ග, පාලම් ආවරණය වන පරිදි මාර්ග බාධක, පොලිස් සංචාර යොදවා ඇතැයි ද ජ්‍යෙෂ්ඨ නියෝජ්‍ය පොලිස්පතිවරයා වැඩිදුරටත් කියා සිටියේය.
ප‍්‍රදීප් ප‍්‍රසන්න සමරකෝන්
