මහවැලියට අයත් ඉඩම් හෙක්ටයාර් 94,000 භාවිතා කර වී, මිරිස්, ලූනු, සෝයා බෝංචි සහ බඩ ඉරිඟු වගා කර එහි අස්වැන්න දෙගුණ කිරීම සඳහා මහවැලි අධිකාරිය මගින් සකස් කළ වගා සැලසුම කාබනික පොහොර ප්‍රතිපත්තිය නිසා අසාර්ථක වූ බව පොදු ව්‍යාපාර කාරක සභාවේ දී (කෝප්) අනාවරණය වී තිබේ.
මෙරට වී වගාවෙන් හෙක්ටයාරයකට වැඩිම අස්වැන්නක් ලැබෙන්නේ මහවැලියට අයත් කුඹුරුවලින් බව හෙළි වී ඇත. එය හෙක්ටයාරයකට මෙටි්‍රක් ටොන් 5.8කි. සෙසු ප්‍රදේශවල වගා කරන කුඹුරු හෙක්ටයාරයකින් ලැබෙන්නේ මෙටි්‍රක් ටොන් 4ක් බව හඳුනාගෙන තිබේ. ඒ අනුව පසුගිය යල කන්නයේ දී මහවැලි ඉඩම් හෙක්ටයාර 50,000ක වී වගා කිරීමට සහ සෙසු හෙක්ටයාර 44,000හි මිරිස්, ලූනු, සෝයා බෝංචි සහ බඩ ඉරිඟු වගා කිරීමට සැලසුම් කර තිබී ඇත. නමුත් 2021 වසරේ දී ජනාධිපති ගෝඨාභය රාජපක්ෂ මහතාගේ රජය විසින් අනුගමනය කරන ලද කාබනික පොහොර වගා ජාතික ප්‍රතිපත්තිය නිසා මෙම වගා සැලසුම ක්‍රියාත්මක කිරීමට නොහැකි වී තිබේ. කාබනික පොහොර වගාවෙන් ලැබෙන්නේ අඩු අස්වැන්නක් බව කෘෂිකර්ම විශේෂඥයන් පැවසුවද එවක පැවැති රජය එය පිළිනොගැනීම නිසා මෙම සැලසුම අසාර්ථක වූ බව මෙහිදී මහවැලි අධිකාරිය නියෝජනය කරමින් කෝප් කමිටුවට සහභාගී වූ නිලධාරීන් පවසා ඇත.
උපාලි ද සේරම්
