රට ගොඩනැගීමේ වගකීම මාලිමාව බාර ගන්නවා

132

ජාතික ජන බලවේගයේ නායක අනුර කුමාර දිසානායක පානදුරදී කියයි
බලය පොදු ජනතාවට මාරුවීමේ අවස්ථාව උදා වෙලා

රජයේ දේපළවලට හානි කළ ලොකුම ත්‍රස්තවාදියා කවුද? – ජවිපෙ ලේකම් ටිල්වින් සිල්වා

දුප්පත්කමේ ගිලටීනයට හෙළා ඇති රට ගොඩනැගීමේ වගකීම මාලිමාව බාර ගන්නා බව ජාතික ජන බලවේගයේ නායක අනුර කුමාර දිසානායක පවසයි. ජාතික ජන බලවේගය පානදුර රැලිය පසුගිය ඉරිදා පැවැත්විණි. එහිදී ජාතික ජන බලවේගයේ නායක අනුර කුමාර දිසානායක මහතා මෙසේද පැවසීය.

පසුගිය ඡන්දවලදී අපි ගම්වලට ඇවිත් වංචා-දූෂණ ගැන, රටේ නීතියේ ආධිපත්‍යය කඩා වැටෙන බව, රට විශාල අනතුරක තිබෙන බව පැහැදිලි කළා. නමුත් අපිට ඡන්ද 3%ක් ලැබෙන විට ඒ ගොල්ලන්ට ලක්‍ෂ 69ක් ලැබුණා. අපි කියපු දේ පිළිනොගත් ජනතාව ඔවුන්ගේ බොරු ප්‍රචාරවලින් ඔවුන්ගේම දූෂිත බවට විනාශකාරී අපරාධවලට සුජාතභාවයක් ලබා ගැනීමට යොදා ගත්තා. ජනතාව අනුමත කොට ඇති බව කිවුවා. මේ වර ඡන්දය කඩාකප්පල් කරන්නේ ඔවුන්ට ඡන්ද අහිමි වී මාලිමාව ජයග්‍රහණය කිරීමට ජනතාව පෙළගැසෙමින් සිටින නිසයි. ඔවුන්ට ඡන්ද වැදගත් වෙන්නේ ඔවුන්ට ජයග්‍රහණය කළ හැකිනම් පමණයි. එසේ නොමැති නම් ඡන්ද වැඩක් නැති බව ඔවුන් පෙන්වමින් සිටිනවා. ව්‍යවස්ථාව ඔවුන්ට වැඩක් නැති බවත් පෙන්වමින් සිටිනවා.

ඡන්ද, ව්‍යවස්ථා, අධිකරණය ඔවුන්ගේ බලයට තර්ජනයක් ලෙස අද සලකමින් තිබෙනවා. අපේ රටේ ඉතිහාසයේ ඡන්ද විශාල ප්‍රමාණයක් පවත්වා තිබෙනවා. නමුත් අද ඔවුන් අතේ දීර්ඝ කාලයක් තිබුණු බලය පොදු ජනතාවට මාරු වීමේ අවස්ථාව උදා වී තිබෙන නිසා හැම පැත්තෙන්ම වෙට්ටු දානවා. දීර්ඝ කාලයක් රට පාලනය කළ පවුල් විසින් අපේ රට විකිණීමේ සහ ණය ගැනීමේ උගුලේ හසුකර අවසන්. අයි.එම්.එෆ්. එකෙන් ඩොලර් බිලියන 2.9ක් අරගෙන උද්දාමයට පත්වෙන රනිල් 2015-19 කාලයේ ඩොලර් බිලියන 12.5ක ණය ගත්තා. ඒ වගේම හම්බන්තොට වරාය විකුණලා තවත් ඩොලර් බිලියනයක් ගත්තා. විකිණීමේ සහ ණය ගැනීමේ මාවතෙන් අපේ රට ගොඩයනවා නම් දැන් මේ වන විට ගොඩගිහින් තිබෙන්න ඕනෑ.

අපේ රටේ තිබෙන සම්පත්වලින් උපරිම ප්‍රයෝජන ගන්න ඉලක්ක කරගත් පාලනයක් අපි ගොඩනගනවා. රට සංවර්ධනය කිරීමේදී නීතියේ ආධිපත්‍යය තහවුරු කිරීම ශිෂ්ට සම්පන්න සමාජයක් පැවතීම අත්‍යාවශ්‍යයි. අපේ තරුණ පරම්පරාවට නව අවස්ථා සලසා දෙමින් ලෝකය ජයගත හැකි රටක් ගොඩනැගීමේත්, අද දුප්පත්කමේ ගිලටීනයට හෙළා තිබෙන රට

ගොඩනැගීමේත් වගකීම ජාතික ජන බලවේගය බාර ගන්නවා. 2019දී ඩොලර් බිලියන 85ක තිබුණු අපේ ආර්ථිකය 2022 අවසන් වනවිට ඩොලර් බිලියන 65 දක්වා කඩා වැටී තිබෙනවා. අපට ආසන්නයේ තිබෙන මාලදිවයිනේ ඒක පුද්ගල ආදායම ඩොලර් 13,500ක් වනවිට අපේ අදායම ඩො. 3000 දක්වා අඩු මට්ටමකට වැටී තිබෙනවා. මේ පාලකයන් රටකට කළ හැකි සියලු‍ම විනාශයන් සිදුකර අවසන්.මේපාලක කණ්ඩායමෙන් ජනතාවත් රටත් මුදා ගෙන නව ගමනකට මුල පුරන්න ඕනෑ. ඒ වෙනුවෙන් තිබෙන මැතිවරණය මේ පාලක කණ්ඩායම විසින් වළක්වා තිබෙනවා. නමුත් අපි රනිල්ට එක දෙයක් කියනවා. අපි හති වැටෙන්නේ නැහැ, රනිල් කපන බොරු වළවල්වල වැටෙන්නේ නැහැ, ඉතාමත් සූක්‍ෂ්මව, සැලසුම් සහගතව ජයග්‍රහණය දක්වා මේ යාත්‍රාව පදවනවා. ගතවන හැම දවසක්ම මාලිමාවේ ජයග්‍රහණය තහවුරු කෙරෙන දවසක් බවට පත්කර ගන්නවා.

ජනතා විමුක්ති පෙරමුණේ ලේකම් ටිල්වින් සිල්වා මහතා

රනිල් ඡන්දය කල් දැම්මේ අපව වළක්වන්න නම් ඒක කිසි දින කරන්න නොහැකි බව අවධාරණය කරනවා. ගතවන හැම දිනයකදීම අපි නොගිය ගෙවල්වලට යනවා. ගිය ගෙවල්වලට තවත් වරක් යනවා. එයාට අපව පරාජය කරන්න හැකි වෙන්නේ නැහැ. මාර්තු 09 වැනිදා පළාත් පාලන ඡන්දය පැවැත්වූවා නම් අද පානදුර නගරයේ මේ වගේ

රැස්වීමක් පවත්වන්නේ නැහැ. ඒ වගේ සෑම දවසක් පාසාම අපි ජනතාව මුණගැසී ඒකරාශී කරමින් කරුණු පැහැදිලි කරනවා. අද මාලිමාවට ලැබෙන ඡන්ද ප්‍රතිශතය 60% හෙට 70%ක් කර ගන්නවා. ඒ නිසා රනිල් වික්‍රමසිංහට පරාජයෙන් ගැලවෙන්න බැහැ. රනිල් සහ මේ හොර නඩය පරද්දන්න අපි ලැහැස්ති බව අවධාරණය කරනවා. රනිල් කරන්න යන දේ අපි දන්නවා. අහිංසකකමට ණයක් ගත්තා නෙවෙයි.

ගෝඨාභය රාජපක්‍ෂ පළවා හැරීමෙන් හිස්වුණු පුටුවට පැනගෙන පිනට ලැබුණු ජනාධිපතිකම යොදාගෙන අධිරාජ්‍යවාදීන් විසින් පැවරූ වගකීම ඉටුකරමින් රට විනාශ කරනවා. මේ ණය අරගෙන තිබෙන්නේ ජාත්‍යන්තර මූල්‍ය අරමුදල කියන අධිරාජ්‍යවාදී ආයතනයෙන්. ඒ ආයතන එක්ක කොන්දේසි රාශියකට යටවෙමින් වටිනාම සම්පත් ටික විකුණන්න ලැහැස්ති වෙනවා.

රජයේ දේපළවලට හානි කිරීම ත්‍රස්තවාදී ක්‍රියාවක් නම් ලොකුම ත්‍රස්තවාදියා කවුද? ඒ තමයි මහ බැංකුව කැඩුව රනිල්. මේ රට පාවාදීමට එරෙහි ජනතාව බියවද්දන්න මේ වාගේ පනත් සම්මත කරගන්න යනවා. මේ රටට ලොකුම ද්‍රෝහීකම් කරන රනිල් වික්‍රමසිංහලා ආරක්‍ෂා වෙන්න ජනතාව මර්දනය කරන්න සූදානම් වෙනවා. රනිල් වික්‍රමසිංහ ඩොලර් බිලියන 03කට මුළු රටක් පාවා දෙන්න යනවා. මේ තත්වයට එරෙහිව රට වෙනුවෙන් නැගී සිටින ජනතාව මර්දනය කිරීමට එරෙහිව පෙළගැසීමේ වගකීම කාට නැතත් ජාතික ජන බලවේගයට තිබෙනවා. අපි ඒ වගකීම අකුරටම ඉෂ්ට කරමින් ඉන්නවා.

advertistmentadvertistment
advertistmentadvertistment