මීට පෙරත් රුසියාවේදී සිසුවකුට පිහියෙනුත් ඇනලා
රුසියාවේ උසස් අධ්‍යාපනය ලබා දෙන බව පවසා, සංචාරක වීසා යටතේ එරටට ශ්‍රී ලංකාව පුරා සිසුන් රැගෙන ගොස්, ඔවුන්ගේ මුදල් වංචා කර ලබා ගෙන එරට අතරමං කළ පුද්ගලයකු ඉකුත් 20 වැනිදා රාත්‍රී කටුනායක ගුවන් තොටුපළේ දී මීගමුව විශේෂ අපරාධ විමර්ශන අංශයේ නිලධාරීන් පිරිසක් විසින් අත්අඩංගුවට ගෙන තිබේ.
මොහු වත්තල, හුණුපිටිය ප්‍රදේශයේ පදිංචි 32 හැවිරිදි පුද්ගලයෙකි.
මොහු රුසියාවේ සිට මෙරටට පැමිණෙමින් සිටියදී කටුනායක ගුවන් තොටුපොළේ දී අත්අඩංගුවට ගෙන තිබේ.
ඔහු කටාන ප්‍රදේශයේ සිසුවකු රුසියාවේ උසස් අධ්‍යාපනය සඳහා යවන බව පවසා රුපියල් විසි එක් ලක්ෂ අනූ පන් දහසක මුදලක් වංචා කිරීම පිළිබඳ මීගමුව විශේෂ අපරාධ විමර්ශන අංශය වෙත සිදු කර තිබූ පැමිණිල්ලකට අදාළව මීගමුව මහෙස්ත්‍රාත් අධිකරණය මගින් ලබා ගෙන තිබූ ගුවන් ගමන් තහනමක් උපයෝගී කර ගෙන මෙසේ මොහු අත්අඩංගුවට ගෙන ඇත.
මීගමුව විශේෂ අපරාධ විමර්ශන අංශය වෙත ලැබී තිබූ පැමිණිල්ලට අමතරව මොහුට එරෙහිව මාතර මූලස්ථානය පොලිසිය වෙත පැමිණිලි 17ක් ද, කුලියාපිටිය පොලිසියට පැමිණිලි 02 ක් ද, කුරුණෑගල පොලිසියට පැමිණිලි 03 ක් ද, නාරාහේන්පිට පොලිසියට එක් පැමිණිල්ලක් ද ලැබී තිබුණි.
මීට අමතරව මොහු පිළිබඳ වාද්දුව, අම්පාර සහ මොරටුව පොලිසිවලට පැමිණිලි ලැබී ඇති බව මීගමුව විශේෂ අපරාධ විමර්ශන අංශය වෙත දැනුම් දී ඇති බව එහි ස්ථානාධිපති ප්‍රධාන පොලිස් පරීක්ෂක රෝහණ මුණසිංහ මහතා පැවසීය.
මෙම පුද්ගලයා මෙසේ රුසියාවට රැගෙන ගිය සිසුවකුට පිහියකින් ඇන තුවාල සිදු කිරීම පිළිබඳ එරට පොලිසිය මොහුට එරෙහිව විමර්ශන ආරම්භ කිරීමත් සමග, එයින් බේරීම සඳහා මොහු 20 වැනිදා ශ්‍රී ලංකාවට පලා විත් තිබේ.
මෙම අත්අඩංගුවට ගැනීම සහ මේ පිළිබඳ වැඩිදුර විමර්ශන කටයුතු මීගමුව පොලිස් අධිකාරී එරික් පෙරේරා මහතාගේ උපදෙස් මත මීගමුව විශේෂ අපරාධ විමර්ශන අංශයේ ස්ථානාධිපති ප්‍රධාන පොලිස් පරීක්ෂක රෝහණ මුණසිංහ මහතාගේ අධීක්ෂණය යටතේ එම අංශයේ නිලධාරීන් පිරිසක් විසින් සිදු කරනු ලබයි.
කටුනායක ටී.කේ.ජී. කපිල
