සිව්කොන් තරගාවලියටක සහභාගි වීම සඳහා ඉන්දියාවට ගොස් සිටින වයස අවුරුදු 19 න් පහළ ශ්‍රී ලංකා බාලිකා කණ්ඩායම මූලික තරග වටය යටතේ සහභාගි වුණු තෙවැනි තරගයෙන් ඉන්දීය ඒ පිල හමුවේ පෙරේදා (17 වැනිදා) ලකුණු 77 ක පරාජයකට මුහුණ දුන්නේය. මෙම තරග පරාජයත් සමඟ අද (19 වැනිදා) පැවැත්වීමට නියමිත අවසන් මහ තරගයට සුදුසුකම් ලැබීම සඳහා තබා තිබූ බලාපොරොත්තු ද සුනු විසුණු විය.
විසාග්හි පැවැති මෙම තරගයේදී පළමුව පන්දුවට පහර දුන් ඉන්දීය ‘ඒ’ කණ්ඩායම නියමිත පන්දු වාර 20 අවසනදී කඩුල්ලක් පමණක් දැවී ලකුණු 175 ක් රැස් කිරීමට සමත්වූවේය. ඉන්දීය ඉනිම වෙනුවෙන් සාර්ථක පිතිහරඹයක නියැළුණු ආරම්භක පිතිකාරිණියෝ පළමු කඩුල්ල වෙනුවෙන් ලකුණු 116 ක් එක් කළේ පන්දු 82 ක් පමණක් වැය කරමිනි.
ඒ වෙනුවෙන් නායිකා සෙර්වාට් පන්දු 46 ක් තුළ හතරේ පහර 11 ක් සහ හයේ පහරක් සමග ලකුණු 68 ක් ලබා ගත්තාය.
ලකුණු 176 ක අභියෝගාත්මක ඉලක්කය හඹා යෑම සඳහා පිටියට පිවිසි ශ්‍රී ලංකා කණ්ඩායමට නියමිත පන්දු වාර 20 අවසනදී සියලු දෙනා දැවී ලබා ගැනීමට සමත්වූයේ ලකුණු 98 ක් පමණි.
එම තරගයේදී ද සාර්ථකත්වයට පත්වූ තුන් ඉරියව් ක්‍රීඩිකා මනුදි නානායක්කාර පන්දු 27 ක් තුළ වේගවත් ලකුණු 35 ක් ලබා ගත්තාය. ජාත්‍යන්තර අත්දැකීම් සහිත ශ්‍රී ලංකා පිලේ නායිකාව වන විශ්මි ගුණරත්න අද තරගයේදීත් ලකුණු 18 කට දැවී ගිය නමුත් නවක ක්‍රීඩිකාවක් වූ මනුදි නානායක්කාර සමස්ත තරගාවලියේදීම කැපී පෙනෙන දස්කම් දැක්වූවාය.
ඉන්දියාව පන්දු වාර 20 කදී කඩුලු 1 ට ලකුණු 175 යි. – (ශ්වො සෙර්වාට් 68, සෞම්‍යා තිවාරි 65, සෝනියා මෙන්දියා (නොදැවී) 34, මනුදි නානායක්කාර 43/1)
ශ්‍රී ලංකාව පන්දු වාර 20 කදී කඩුලු9 ක් දැවී ලකුණු 98 යි – (මනුදි නානායක්කාර 35, විශ්මි ගුණරත්න 18, නෙත්මි සේනාරත්න 14, විහාරා සෙව්වන්දි 13, සෝනම් යාදව් 13/3, අර්චනා දේවි 16/3)
