සම්පත් බැංකුවේ ශාඛා බැංකුකරණ ප්‍රධාන කළමනාකාර ජනක කරුණාරත්න මහතා සහ ගොවිජන සංවර්ධන දෙපාර්තමේන්තුවේ මාතලේ දිස්ත්‍රික් කාර්යාලයේ ගොවිජන සංවර්ධන නි. කොමාසාරිස් බී.එම්.සී.එච්. කුමාරිහාමි මහත්මිය කොරකහගොල්ල වැව ප්‍රතිසංස්කරණයට අදාළ අවබෝධතා ගිවිසුම හුවමාරු කරගත් අයුරු.
අභාවයට යමින් පවතින වාරි කර්මාන්තය යළි නගා සිටුවමින් සුවහසක් ගොවි ජනතාවට පමණක් නොව සකල ශ්රී ලාංකේය ජනතාවට බතින් බුලතින් සපිරි හෙට දිනක් උදාකර දීම වෙනුවෙන් වූ සම්පත් බැංකුවේ ප්‍රධාන සමාජ සත්කාරක වැඩසටහන වන ‘වැවට ජීවයක්’ සමාජ සත්කාරක වැඩසටහනෙහි තවත් අදියරක් පසුගියදා දඹුල්ල, කලුන්දෑව ප්‍රදේශයේදී ආරම්භ කරනු ලැබුවේ ප්‍රදේශයේ ගොවි බිම් වෙත දියවර සපයන කොරකහගොල්ල වැවට ජීවය ලබා දීමේ කටයුතු සුබ මොහොතින් අරඹමිනි. කොරකහගොල්ල වාරි ව්‍යාපෘතිය යටතේ අස්වද්දනු ලබන භූමි ප්‍රමාණය අක්කර 75කට අධිකය. මෙතෙක් එම කෙත් ඉඩම් වගා කෙරුණේ වසරේ එක් කන්නයක් පමණකි. ඒ කුඹුරුවලට අවශ්‍ය තරම් දියවර සපයා දීමට අභාවයට යමින් තිබූ කොරකහගොල්ල වැවට ශක්තියක් නොවූ බැවිනි.
ගොවිජන දෙපාර්තමේන්තුවේ මාතලේ දිස්ත්‍රික් කාර්යාලයේ තාක්ෂණික සහයෝගයෙන් හා මහසෙන් ගොවි සමිතියේ දායකත්වයෙන් යළි ජීවය ලබන කලුන්දෑව කොරකහගොල්ල වැව තවත් මාස කිහිපයක් අවසානයේ පරිපූර්ණ වාරි පද්ධතියක් ලෙස ප්‍රදේශයේ ගොවි පවුල් 100කට අධික ප්‍රමාණයකගේ සිහින සැබෑ කරමින් ඔවුන්ගේ ඍජු හා වක්‍ර රැකියා අවස්ථාවන් ආරක්ෂා කර දෙමින් හෙට දවසේ ආර්ථිකයට ද සුවිසල් දායකත්වයක් සපයනු ඇත.
