පාරිභෝගික අධිකාරියේ සභාපති
රුපියල් 50ක් වන පාලන මිලට වැඩියෙන් බිත්තර අලෙවි කරන වෙළෙඳුන්ට එරෙහිව වැටලීම් සිදුකර නීතිමය පියවර ගන්නා බව පාරිභෝගික කටයුතු අධිකාරියේ නීතිඥ ශාන්ත නිරිඇල්ල මහතා පැවසීය.
නීතිය හමුවට පැමිණවීමෙන් පසු රුපියල් ලක්‍ෂයක දඩයකට යටත් වීමට සිදුවිය හැකි බවත්, වැටලීම් සිදුනොකරන ලෙස විවිධ පාර්ශ්වවලින් බලපෑම් එල්ල වුවත් ඒවා නොසලකා වැටලීම් සිදුකරන ලෙස නිලධාරීන්ට උපදෙස් දී ඇති බවත් පැවසූ ඒ මහතා ව්‍යාපාරිකයන් බිත්තර හිඟයක් මවා පා බිත්තර මිල වැඩි කිරීමට උත්සාහදරන බවට පෙනී යන බවද කියා සිටියේය.
පාලන මිලට අලෙවි නොකර ඇතැම් ස්ථානවල බිත්තර තොග තබාගෙන සිටින බවට ලැබුණු තොරතුරු මත වැටලීම් කර නීතිමය පියවර ගත් බවත් තවත් එවැනි ස්ථාන තිබේනම් වැටලීම් අඛණ්ඩව සිදුකරන ලෙස නිලධාරීන්ට උපදෙස් දුන් බවත් පැවසූ කිරිඇල්ල මහතා අවශ්‍ය නම් කාර්යාල වේලාවන් තුළ 1977 අංකයට තොරතුරු ලබාදිය හැකි බවද පැවසීය.
බිත්තරයක් දින 14ක වඩා ගබඩාකර තබා ගත නොහැකි බවත් එම නිසා තොග සඟවා ගෙන නොසිට වෙළෙඳ පොළේ පාලන මිලට අලෙවි කිරීමට සපයන ලෙසත් ඒ මහතා තොග වෙළෙන්දන් ගෙන් ඉල්ලා සිටියේය. වැඩි මිලට බිත්තර අලෙවි කරන ස්ථානවලින් බිත්තර ලබා ගැනීමෙන් වළකින ලෙසද ඒ මහතා මහජනතාවගෙන් ඉල්ලා සිටියේය.
චමින්ද සිල්වා
