මැරතන් ශූරයා රත්නපාල – ශූරිය එම්. එස්. පී. එන්. පෙරේරා
ඇවිදීමේ ශුරයා රුක්මාල් – ශූරිය කල්හාරි
47 වැනි ජාතික මහා ක්‍රීඩා උළෙල සාර්ථක අයුරින් ඊයේ (09 වැනිදා) ගම්පහදී නිමාවට පත්විය. ශ්‍රී ලංකා යෞවන කටයුතු අමාත්‍යංශය සහ ක්‍රීඩා සංවර්ධන දෙපාර්තමේන්තුව එක්ව නෙස්ලේ ලංකා සමාගමේ නෙස්ටමෝල්ට් පූර්ණ අනුග්‍රහය යටතේ ක්‍රියාත්මක වූ අදාළ ක්‍රීඩා උළෙල ක්‍රීඩා ඉසව් 31කින් යුක්ත විය.
තරගාවලියේ ප්‍රධානතම ක්‍රීඩා ඉසව් අතරින් අවධානයට ලක්වූ පිරිමි පාපැදි ධාවන තරගයේ ශූරතාව දිනා ගැනීමට එම්. ඒ. ඩී. මැඩොන්සා ඊයේ සමත්විය. ඒ කිලෝ මීටර් 165කින් යුත් පිරිමි පාපැදි ධාවන තරගය පැය 3යි මිනිත්තු 57යි තත්පර 36.23කින් නිමාවට පත්කරමිනි.
එම ඉසව්වේ දෙවැනි ස්ථානය ආර්. ටී. සී. දයානන්ද විසින් හිමිකර ගත්තේ පැය 3යි මිනිත්තු 57යි තත්පර 36.50ක කාලයක් වාර්තා කරමිනි. පැය 3යි මිනිත්තු 57යි තත්පර 53.42ක කාලයක් වාර්තා කළ ඩී. එස්. නුගේරා තෙවැනි ස්ථානය දිනා
ගැනීමට සමත්විය.
කිලෝ මීටර් 82.5කින් යුක්ත වූ කාන්තා පාපැදි ධාවන තරගය පෙරේදා (08 වැනිදා) ගම්පහ අස්ගිරිය අලුත්පාර අසලින් ආරම්භ වූ අතර එම ඉසව්වේ ජය වාර්තා කිරීමට කේ. ඒ. එස්. එන්. පෙරේරා සමත් වූයේ පැය 2යි මිනිත්තු 40යි තත්පර 11ක කාලයක් වාර්තා කරමිනි. එහි දෙවැනි ස්ථානය ආකාෂා සඳමිණි විසින් හිමිකර ගනිද්දී උදේශිනී කුමාරසිංහ තෙවැනි ස්ථානය දිනා ගත්තාය.
තරගාවලියේ සමාරම්භ දිනයේ පැවැති පිරිමි මැරතන් තරගයේ ශුරතාව හිමිකර ගැනීමට ටී. ඩබ්ලිව්. රත්නපාල සමත්විය. කිලෝමීටර් 42ක දුරකින් සමන්විත වූ එම ඉසව්ව පැය 2යි මිනිත්තු 25යි තත්පර 49.45ක කාලයකින් අවසන් කිරීමට රත්නපාල සමත්විය. ක්‍රීඩකයින් 70කට ආසන්න පිරිසක් සහභාගි වූ පිරිමි මැරතන් තරගය දෙවැනි ස්ථානය දිනා ගැනීමට ආර්. ඒ. පී. ඩී. අරුණසිරි සමත්වූ අතර ඩබ්ලිව්. එම්. එස්. කුමාර එහි තෙවැනි ස්ථානය දිනා ගැනීමට සමත්විය.
කාන්තා මැරතන් ඉසව්වේ ශූරතාව දිනා ගැනීමට එම්. එස්. පී. එන්. පෙරේරා සමත්වූ අතර එහිදී පැය 2යි මිනිත්තු 49යි තත්පර 15ක කාලයක් වාර්තා කිරීමට ඇය සමත්වූවාය. එම ඉසව්වේ තෙවැනි ස්ථානය එච්. එම්. ඩබ්ලිව්. ජී. ඩබ්ලිව්. එම්. හේරත් විසින් හිමිකර ගනිද්දී ඒ. එල්. එස්. ඩී. ලියනගේ තෙවැනි ස්ථානයට පත්වූවාය.
කිලෝමීටර් 20ක දුරකින් යුක්ත වූ පිරිමි ඇවිදීමේ තරග ඉසව්ව ජය ගැනීමට ආර්. එම්. ඩී. රුක්මාල් සමත්විය. ඒ එම ඉසව්ව පැය 1යි මිනිත්තු 34යි තත්පර 09කින් නිමාවට පත්කරමිනි. රවීන්ද්‍ර හේරත් එහි දෙවැනි ස්ථානය දිනා ගැනීමට සමත්වූ අතර සඳුන් ලක්මාල් තෙවැනි ස්ථානය දිනා ගැනීමට සමත්විය.
එම ඉසව්වේ කාන්තා තරගය ජය ගැනීමට කල්හාරි මදිරිකා සමත්වූයේ පැය 1යි මිනිත්තු 50යි තත්පර 58ක කාලයක් වාර්තා කරමිනි. දිනූෂා දිල්හානි එහි දෙවැනි ස්ථානය දිනා ගැනීමට සමත්වූ අතර පී. බී. ගයානි තෙවැනි ස්ථානය දිනා ගත්තාය.
අදාළ ඉසව්වලදී පළමු ස්ථානය දිනා ගත් ක්‍රීඩක ක්‍රීඩිකාවන් හට මුදලින් රුපියල් 50000 බැගින් පිරිනැමුණු අතර දෙවැනි සහ තෙවැනි ස්ථාන සඳහා පිළිවෙලින් රුපියල් 40.000 සහ 30.000 බැගින් පිරිනැමිනි.
කසුන් රණවීර
එම තරගවලින් ජය ගන්නා ක්‍රීඩක ක්‍රීඩිකාවන් ජාතික සංචිතයට තෝරාගැනීමට නියමිත අතර ක්‍රීඩා උළෙල සමස්ත ක්‍රීඩා ඉසව් 31කින් යුක්ත වේ.
තරගාවලියේ ප්‍රධාන තරග ඉසව් ලෙස ජාතික මැරතන් තරගය, සහ පාපැදි ධාවන තරගය පැවැත්වේ.
එහිදී කිලෝමීටර් 42ක දුරකින් යුත් පිරිමි මැරතන් තරගය සඳහා ක්‍රීඩකයන් 70ක්ද, කාන්තා මැරතන් තරගය සඳහා ක්‍රීඩිකාවන් 30ක්ද සහභාගිවීමට නියමිතය.
එම තරගය ලබන 08 දා උදෑසන 5.30ට ආරම්භවීමට නියමිත වන අතර තරග ආරම්භය ගම්පහ උඩුගම්පොල මාර්ගයේ ගුවන් පාලම අසල පන්සල පරිශ්‍රයේදී සිදු කෙරේ.
තරග සඳහා සහභාගිවීමට අපේක්‍ෂිත ක්‍රීඩක ක්‍රීඩිකාවන් ලබන 07 වන දින ගම්පහ ශ්‍රී බෝධි ක්‍රීඩාංගණය අසල දී ප.ව. 1.00 සිට ප.ව. 6.00 දක්වා ලියාපදිංචි කිරීම සිදු කෙරේ.
කිලෝමීටර 20ක දුරකින් යුත් කාන්තා සහ පිරිමි ඇවිදීමේ තරග සඳහා ක්‍රීඩක ක්‍රීඩිකාවන් ලියාපදිංචි කිරීම ලබන 08 වෙනිදා ප.ව. 1.00 සිට ප.ව. 6.00 දක්වා ගම්පහ ශ්‍රී බෝධි ක්‍රීඩාංගණය අසලදී සිදු කෙරේ.
එම තරග ලබන 09 වෙනිදා උදෑසන 5.45 ට ගම්පහ අලුත් පාර පන්සල අසලින් ආරම්භ කිරීමට කටයුතු යොදා ඇත. ඒ සඳහා ක්‍රීඩකයන් සියයක් සහ ක්‍රීඩිකාවන් හතළිහක් සහභාගිවනු ඇතැයි අපේක්‍ෂා කෙරේ.
පාපැදි රේසින් තරග සඳහා ක්‍රීඩක ක්‍රීඩිකාවන් ලියාපදිංචිය ගම්පහ ශ්‍රී බෝධි ක්‍රීඩාංගණය අසල දී ප.ව. 1.00 සිට ප.ව. 6.00 දක්වා සිදු කෙරෙන අතර ඉන් කාන්තා ලියාපදිංචිය ලබන 07දා ද පිරිමි ලියාපදිංචිය ලබන 08දා ද සිදු කෙරේ.
පාපැදි කාන්තා රේසින් තරගය කිලෝමීටර් 82.5ක දුරකින් යුක්ත වන අතර එම තරඟය ලබන 08 දා උදෑසන 9.40 ට ගම්පහ අස්ගිරිය අලුත් පාර අසල දී සිදු කෙරේ.
කිලෝ මීටර් 165 ක දුරකින් යුත් පිරිමි පාපැදි රේසින් තරගය ඊට පසු දින එනම් ලබන 09 වැනිදා ගම්පහ අස්ගිරිය අලුත් පාරෙන් ආරම්භ වෙයි.
මෙම තරඟ සඳහා ක්‍රීඩකයන් 250ක්ද, ක්‍රීඩිකාවන් 50ක්ද සහභාගිවනු ඇතැයි සංවිධායකයෝ අපේක්‍ෂා කරති.
මැරතන්, ඇවිදීමේ තරග සහ පාපැදි රේසින් තරගවලදී පළමු ස්ථානය දිනාගන්නා තරගකරුවන්ට රුපියල් 50,000ක මුදලක් පිරිනැමීමට කටයුතු යොදා ඇත.
දෙවන සහ තෙවන ස්ථානවලට පිළිවෙලින් රුපියල් 40,000ක මුදලක් සහ 30,000ක මුදලක් පිරිනැමේ.
තරගාවලියේ ප්‍රථම, දෙවන සහ තෙවන ස්ථාන ලබාගන්නා ක්‍රීඩක ක්‍රීඩිකාවන් සඳහා සහතික පත්, පදක්කම් හා කුසලාන ද පිරිනැමීමට කටයුතු යොදා ඇත.
ක්‍රීඩා උළෙලේ පාපැදි, මැරතන්, සහ ඇවිදිමේ තරග සඳහා අනුග්‍රාහකත්වය දක්වන නෙස්ලේ සමුහ ආයතනය වෙනුවෙන් එහි උප සභාපති බන්දුල එගොඩගේ මහතා විසින් අනුග්‍රාහක චෙක්පත ක්‍රීඩා අමාත්‍ය රොෂාන් රණසිංහ මහතා වෙත භාරදෙන ලද අයුරු ඡායාරූපයේ දැක්වේ. ක්‍රීඩා අමාත්‍යාංශ ලේකම් විශේෂඥ වෛද්‍ය අමල් හර්ෂ ද සිල්වා මහතා ද ඡායාරූපයේ ද වේ. ඡායාරූපය – නිශාන් එස්. ප්‍රියන්ත
කුෂාන් සුබසිංහ
]]>