ලංකා බැංකුවේ සංවර්ධන බැංකු අංශය විසින් ක්‍රියාත්මක කරනු ලබන BOC ගම්මාන වැඩසටහන මගින් අඩු වරප්‍රසාද සහිත ග්‍රාමීය ජනතාවගේ මූල්‍ය සාක්ෂරතාව හා ජීවන තත්ත්වය වැඩිදියුණු කිරීම අරමුණු කරයි. මෙහිදී ඉලක්ක ගත කණ්ඩායම් වෙත ළඟාවීම සඳහා විශේෂ වැඩසටහන් මාලාවක් BOC ගම්මාන වැඩසටහන තුළ ව්‍යුහගත කර ඇත.
මෙරට ග්‍රාමීය ජනතාව දේශීය ආර්ථිකයේ වැදගත් කොටසක් නියෝජනය කරන බැවින්, ග්‍රාමීය සංවර්ධනය ජාතික ආර්ථිකය නැංවීමෙහිලා අත්‍යවශ්‍ය අංගයකි. රටේ ප්‍රමුඛතම බැංකුව සහ ප්‍රමුඛතම රාජ්‍ය බැංකුව ලෙස, ග්‍රාමීය ආර්ථිකයේ දියුණුව සහ ග්‍රාමීය ජනතාවගේ ජීවන තත්ත්වය නංවාලීම තම වගකීමක් කොට සලකන ලංකා බැංකුව සිය ග්‍රාමීය සංවර්ධන වැඩසටහන ලෙස BOC ගම්මාන වැඩසටහන දියත් කරයි.
මෙවර වැඩසටහන විවෘත කිරීමේ අවස්ථාව සඳහා සබරගමු පළාත් නියෝජ්‍ය ප්‍රධාන ලේකම් (ක්‍රම සම්පාදන) පරාක්‍රම පියසේන, ලංකා බැංකුවේ සභාපති ජනාධිපති නීතිඥ රොනල්ඩ් සී. පෙරේරා, මහා කළමනාකරු රසල් ෆොන්සේකා, නියෝජ්‍ය මහා කළමනාකරු (ශාඛා මෙහෙයුම්) ප්‍රියල් සිල්වා යන මහත්වරු ඇතුළු නිලධාරීහු සහ මීගස්තැන්න ගම්වාසීහු සහභාගි වූහ.
BOC ගම්මාන වැඩසටහනට සමගාමීව, ලංකා බැංකුව යටියන්තොට සහ දෙහිඕවිට ප්‍රාදේශීය ලේකම් කාර්යාල දෙකටම අයත් මීගස්තැන්න ගම්මානයේ පොදු පහසුකම් සංවර්ධනය කිරීම යටතේ, අබලන් වූ මාර්ගයක් කොන්ක්‍රීට් කිරීම, නාය යෑමෙන් වැසී තිබූ අමුණ පිළිසකර කිරීම, ළදරු පාසල අලු‍ත්වැඩියා කර ක්‍රීඩා උපකරණ ලබා දීම, විහාරස්ථානය ප්‍රතිසංස්කරණය කිරීම, BOC මිතුරු කුඩා කණ්ඩායම් ගොඩනැගීම හරහා ක්ෂුද්‍ර මූල්‍ය ණය පහසුකම් ප්‍රදානය, ගෙවතු වගාව සඳහා පැල බෙදාදීම ආදී සංවර්ධන වැඩසටහන් රැසක් ක්‍රියාත්මක විය. එමෙන්ම ලංකා බැංකුවේ සහයෝගය ඇතිව මීගස්තැන්න විද්‍යාලයේ උසස් පෙළ සිසු සිසුවියන් වෙනුවෙන් ඉදි කිරීමට යෝජිත පන්ති කාමර දෙකකින් යුතු ගොඩනැඟිල්ල වෙනුවෙන් අරමුදලක් පිහිටුවීම ද සිදු කරන ලදී. එමෙන්ම ග්‍රාමීය පුස්තකාලය සහ BOC රන් කැකුළු සංසදය එදින විවෘත කෙරුණු අතර, පාසලේ අත් පන්දු කණ්ඩායම වෙත ජර්සි ලබා දීමද එදින සිදු කෙරුණි. පසුගියදා මෙම වැඩසටහනට සමගාමීව ලේ දන් දීමේ වැඩසටහනක් ක්‍රියාත්මක කිරීම ද විශේෂත්වයකි.
]]>