කෝප් වාර්තාවලට ශ්රී ලංකන් ගුවන් සමාගම, ලංකා විදුලි බල මණ්ඩලය, ඛනිජ තෙල් නීතිගත සංස්ථාව හා ලංකා සතොස බලවත් ලෙස පාඩු ලබති. සමස්ත පාඩුවෙන් 40 % ක් පමණ අයත් වන්නේ ශ්රී ලන්කන් ගුවන් සමාගමටය. ශ්රී ලන්කන් ගුවන් සේවය, එයාර් ලංකා නමින් පටන්ගෙන ටික කලකින්ම පාඩු ලබන්නට පටන් ගත්තේය. එවිට ජනාධිපති චන්ද්රිකා එහි වැඩි කොටස් එමිරේට්ස් සමාගමට වික්කේය. එමිරේට්ස් සමාගම එයාර් ලංකා නම ශ්රී ලන්කන් ලෙස වෙනස් කළේය. රාජපක්ෂ ආණ්ඩුව බලයට පැමිණි පසු ඔවුන්ගේ ඥාතියකු ශ්රී ලන්කන් ගුවන් සමාගමේ ප්රධානියා බවට පත්විය. මෙතුමා සහ එමිරේට්ස් සමාගම අතර ප්ලේන් එකක අවභාවිතාවක් සම්බන්ධයෙන් හටගත් ගැටුමක් නිසා රාජපක්ෂ ආණ්ඩුව එමිරේට්ස් ආයතනයේ පාලක කොටස් ආපසු පවරාගෙන එමිරේට්ස් සමාගම ලංකාවෙන් එලවා දැමීය. එදා එමිරේට්ස් සමාගම වෙනුවෙන් ශ්රී ලන්කන් ගුවන් සේවය පාලනය කළ පීටර් හිල් අද මේ රටේම ගුවන් සේවයක් ආරම්භ කර ඇත. ශ්රී ලන්කන් අයිතියෙන් එමිරේට්ස් එලවන අතර සජින් වාස් ගුණවර්ධන නමැත්තෙක් රාජපක්ෂලාට කන්කෙඳිරිගා අවසර ලබාගෙන මිහින් ලංකා නමැති බජට් ගුවන් සේවයක් පටන්ගෙන ඉතාම කෙටි කාලයක් තුළදී ඩොලර් බිලියනයක් පමණ පාඩු ලබා ශ්රී ලංකාවේ අහසින් මකබෑවී ගියේය. අපට ආරංචි හැටියට මෙහි පාඩුවද ශ්රී ලන්කන් ගුවන් සමාගමට අවශෝෂණය කරවන ලදී. මේ ආරංචිය බොරුවක් නම් අපි එය ඉල්ලා අස්කර ගනිමු. ශ්රී ලංකාවට කෙළවුණේ ආණ්ඩුව බිස්නස් කරන්නට යෑම නිසාය. පුද්ගලික අංශය විසින් කළයුතු බිස්නස් ආණ්ඩුවෙන් කිරීමට පටන්ගන්නේ 1970 දීය. අවසානයේදී ආණ්ඩුව රෙදිත් වික්කේය. කඩදාසිත් වික්කේය. කජුත් වික්කේය. බිජුත් වික්කේය. (මෙහිදී බිජු යනුවෙන් හඳුන්වන්නේ කෘෂිකර්ම දෙපාර්තමේන්තුව විකුණන බීජ වර්ගය) ආණ්ඩුව නොවික්කේ බුලත් විට සහ සුරුට්ටු පමණි. ශ්රී ලංකාවේ බීඩි නිෂ්පාදන අයිතිය සියතට ගැනීම සඳහා 1970 දී බලයට පත්වූ සමගි පෙරමුණු ආණ්ඩුව උත්සාහ කළ නමුදු එවකට සිටි මුදල් ඇමැති එන්. එම්. පෙරේරාගේ විරෝධය නිසා එම තැත ව්යර්ථ විය. හිඟන්නාගේ සිට පහළ මධ්යම පාන්තිකයා දක්වා බීඩි උරති. සිගරට් සඳහා වැය කිරීමට ඔවුන්ට මුදල් නැත. ලංකාවේ කසිප්පු ගහන්නේත් මේ කියන සමාජ ස්ථරයයි. එන්. එම්. පෙරේරා මෙය හඳුනාගෙන සිටියේය.
ශ්රී ලංකාවේ රාජ්යය ආයතන ලාභ ලැබීමට නම් අනුගමනය කළ යුතු ක්රම දෙකක් තිබේ. ඉන් එකක් නම් ආණ්ඩුව හැර සෙසු සියල්ලම පුද්ගලික අංශයට විකිණීමය. දෙවැන්න නම් එම ආයතනවලට ප්රාග්ධනය පොම්ප කර දක්ෂ සහ අවංක නිලධාරීන් යටතේ ලොකු ක්ෂමතාවක් සහිත ආයතන බවට පත්කිරීමය. මේ දෙකෙන් එකක්වත් හරියට කරගැනීමට මෙතෙක් බලයට පත්වූ කිසිම ආණ්ඩුවකට හැකිව නැත. අයියෝ සාමිනී යෙනකු වේනම්. (මේ කෑල්ලේ තේරුම අප දන්නේ නැත)
]]>