නිදහස් සැමරුමට කෝටි ගණනක් වියදම් වන බවට කල් තියාම කනින් කොණින් ආරංචි වීම නිසා මේ පිළිබඳව බොහෝ දෙනා ආණ්ඩුවට අප්රසාදය පළ කළහ. නමුත් ආණ්ඩුව එය කනකට ගත්තේ නැත. පෙර කී පරිදි චාම්ව නිදහස් සමරුව පවත්වනවා වෙනුවට ජනාධිපතිවරයා මාස ගණනක් තිස්සේ පටන් පැවසූ පරිදි අභිමානවත්ව නිදහස් උළෙල පැවැත්වීය. ඒ නිසා මෙසේ රුපියල් කෝටි 40 ක් වියදම් වී ඇත්තේ රටේ ජනතාව අසීමිතව පීඩාවට පත්ව ඇති මොහොතකය. මෙම වියදම 2022 වසරේදී නිදහස් උළෙලට වැයවූ මුදල මෙන් සිව් ගුණයකි. ‘දිවයින ඉරිදා සංග්රහය’ පුවත්පත තම ප්රධාන සිරස්තලයෙන් හෙළි කළ පරිදි උත්සවයේ වැසිකිළි වියදම පමණක් ලක්ෂ 142 කි.
නිදහස් උළෙලට සමගාමීව පැට්රල් ලීටරයක් රුපියල් 400 දක්වා රුපියල් 30 කින් වැඩිකරන ලද අතර, කිලෝග්රෑම් 12.5 ලිට්රෝ ගෑස් සිලින්ඩරයක් රුපියල් 334 කින්, එනම් රුපියල් 4800 කට ආසන්න මිලක් දක්වා වැඩි කරන ලදි. එසේම ලාෆ්ස් ගෑස් සිලින්ඩරයක්ද රුපියල් 200 කින් ඉහළ දමා ඇත. මෙසේ ජීවන බර තව තවත් වැඩි කරන්නට නම් නිදහස් උළෙලක් සඳහා කෝටි ගණන් වැයකරන්නේ ඇයි දැයි පාලකයින් තේරුම් ගත යුතුව ඇත. ‘සිස්ටම් චේන්ජ්’ යැයි මතුර මතුරා මේ කරන කටයුතුවලින් රටට කිසිදු සෙතක් නැත. ජනතා අප්රසාදයද තව තවත් ඉහළ යනවා මිස ජනතාවට ලැබෙන සහනයට වඩා අසහනය වර්ධනය වන බව පාලකයින් තේරුම් ගත යුතුය.
මේ අතර 13 වැනි ව්යවස්ථා සංශෝධනයට කටයුතු කිරීම නිසා රට තුළ අරාජිකත්වයක් නිර්මාණය වන ලක්ෂණ පහළ වෙමින් තිබේ. පළාත් සභාවලට ඉඩම් හා පොලිස් බලතල ලබාදීම පළාත් සභා ක්රමය මෙරටට හඳුන්වා දුන් ජේ.ආර්. ජයවර්ධන ජනාධිපතිවරයාටවත් කළ නොහැකි වූවකි. ඒ මගින් පෙඩරල් රාජ්යයක් බිහිවී වෙනම රාජ්යයකට යෑමේ පාර කැපෙන බවට දේශපාලන විචාරකයෝ පවසති. එසේම, මහා සංඝරත්නයද මේ නිසා 13 සම්පූර්ණයෙන් සංශෝධනයට තම දැඩි නොකැමැත්ත පළ කර ඇත. එනමුත්, රට නොබෙදා බලය උපරිමයෙන් විමධ්යගත කරන බවට ජනාධිපතිවරයා පවසයි. මැතිවරණ මානසිකත්වයක් රට තුළ පවතින මෙවන් මොහොතක 13 වැනි ව්යවස්ථා සංශෝධනයක් මෙසේ පටලවා ගැනීම කෙතරම් යහපත් දෙයක්ද යන්න හා එහි වාසිය කාටද යන්න සැබෑම ප්රශ්නයකි. මීට පිළිතුරු ලබා දෙන ජාතික ජන බලවේගයේ සුනිල් හඳුන්නෙත්ති මහතා කියා ඇත්තේ මෙය මැතිවරණයට ජාතිවාදය පටලවා ගැනීමක් බවය. කෙසේ හෝ 13 සංශෝධනය යනු ප්රශ්න විසඳීමකට වඩා තවත් ප්රශ්න වැලක ආරම්භයක් බවට බොහෝ විචාරකයින් අනතුරු හඟවති. එනම්, 13 ක් ගැන කතා කරන්නේ 13 ක් ගැන කතා කරන්නට අවශ්ය මොහොතක නොවන බවයි. ඇත්තටම අද රටට අවශ්යව ඇත්තේ රටේ නිෂ්පාදන ආර්ථිකය හෝ විදේශ විනිම ආර්ථිකය ගොඩ දමා රට වැටී ඇති ආපදාවෙන් රටත් ගොඩගැනීමය. එසේ නැතිව නැති ප්රශ්න නිර්මාණය කිරීම තුළින් රට අරාජිකත්වයට පත්වීම වැළැක්විය හැක්කක් නොවේ. මේ මොහොතේ වැදගත් වන්නේ එකාවන්ව සිතා සියල්ලන් විසින්ම රට වැටී ඇති තැනින් ඔසවා තැබීමය. නමුත් එවන් ධනාත්මක දෑ සිදුවනු දක්නට නොලැබීම අවාසනාවකි.
පෙබරවාරි 06 දින අලුයම තුර්කිය හා සිරියාව අයත් භූමි ප්රදේශයේ සිදු වූ බලවත් භූකම්පන කිහිපයකින් දෙරටේ ජනයා 20,000 කට අධික ප්රමාණයක් මිය ගොස් ඇති බවට ලෝක සෞඛ්ය සංවිධානය පුරෝකතනය කර ඇත. නමුත් දැනට නිකුත්වී ඇති නිල සංඛ්යාලේඛන අනුව දක්වා ඇති මරණ සංඛ්යාව 5,000 ක් තරම් වේ. එක පිට එක සිදු වූ බලවත් භූකම්පන නිසා බොහෝ ගොඩනැගිලි සමතලා වී ගියේ නිදා සිටි මිනිසුන් සමූහයා ලෙස මිහිදන් කරමිනි. මේ අනුව මෙම භූකම්පනය ශතවර්ෂයේ සිදු වූ දැවැන්තම ඛේදවාචකයන්ගෙන් එකක් ලෙස සැලකේ. ලෝකයේ කොතැන සිදුවූවත් මෙවන් ව්යසනයන්ට මුහුණ දෙන්නේ අපේම සහෝදර මිනිසුන්ය. මෙවන් මොහොතක ඒ විපතට පත් මිනිසුන්ට අපේ දෑත් දිගුවිය යුතු අතර ඒ විපතට පත් මිනිසුන් සමග අපි ද ශෝක විය යුතු වෙමු.
]]>එසේම පවතින ආර්ථික තත්ත්වය හමුවේ වුව ද 75 වැනි නිදහස් දින උත්සවය සුවිශේෂී සංධිස්ථානයක් කරගනිමින් අඩු පිරිවැයකින් අභිමානවත් අයුරින් සැමරීමට ජනාධිපති රනිල් වික්රමසිංහ මහතා විසින් නිලධාරීන්ට උපදෙස් දී තිබේ.
විවිධ සංස්කෘතිකාංගයන්ගෙන් සහ ත්රිවිධ හමුදාවේ සහ පොලිසියේ පෙළපාළි සහ උත්තමාචාරවලට අමතරව ශ්රී ලාංකේය අභිමානය විදහා දැක්වෙන සංස්කෘතිකාංග හා යෞවනයට ගැළපෙන කලා අංග ඊට එක් කර ගැනීමේ අවශ්යතාව ජනාධිපතිවරයා පෙන්වාදී ඇත.
පළාත් 09 නියෝජනය වන පරිදි සංස්කෘතික, කලා හා ආගමික වැඩසටහන් එම පළාත්වල දේශපාලන අධිකාරිය සහ රාජ්ය නිලධාරීන්ගේ සම්බන්ධීකරණයෙන් පැවැත්වීමටත්, පළාත් මට්ටමින් හා ජාතික මට්ටමින් පාසල් දරුවන් මූලික කර ගනිමින් අධ්යාපන අමාත්යාංශය මගින් විවිධ තරග කිහිපයක් සංවිධානය කිරීමට හා තරුණ තරුණියන්ගේ සෞන්දර්යාත්මක රසවින්දනය වෙනුවෙන් කලා හා සංගීත වැඩසටහන් පළාත් මට්ටමින් පැවැත්වීමටත් ජනාධිපතිවරයාගේ උපදෙස් පරිදි තීරණය කෙරිණි.
ජාත්යන්තර සහයෝගීතාව වැඩිදියුණු කර ගැනීමේ අපේක්ෂාවෙන් නිදහස් උළෙළේ විශේෂ ආරාධිත අමුත්තන් ලෙස සාර්ක් රටවල විදේශ අමාත්යවරුන්ට ආරාධනා කිරීමට ද තීරණය කෙරිණි.
ඒ ඒ පළාත්වල ප්රධාන රාජ්ය ශ්රවණාගාර, රංග ශාලා සහ කොළඹ නෙළුම් පොකුණ රඟහල, ටවර් හෝල්, එල්ෆින්ස්ටන් සහ ජෝන් ද සිල්වා රඟහල නම් කරන ලද කාලසීමාවකට ඉතා සුවිශේෂී මිලකට ලබාදීමට අවශ්ය පසුබිම සකස් කරන ලෙසත් වික්රමසිංහ මහතා උපදෙස් දුන්නේය.
නිදහස් දිනයට සමගාමීව අඩු ආදායම්ලාභී පවුල් සඳහා නිවාස 1996ක් ඉදිකිරීමට සැලසුම් කර ඇති අතර පෑලියගොඩ, දෙමටගොඩ, මොරටුව, මහරගම සහ කොට්ටාව ප්රදේශවල මෙම නිවාස ඉදි කිරීමට නියමිතය. කලාකරුවන් වෙනුවෙන් කොට්ටාවේ ඉදිවන නිවාස සංකීර්ණය වෙන් කෙරේ.
මෙම සියලු නිවාස දේශපාලන පදනම හෝ හිතවත්කම් මත නොව, ප්රමුඛතාව සහ නිසි අවශ්යතාවය මත පදනම්ව පමණක් ලබාදීමට අවශ්ය ක්රමවේදය වහාම සකස් කරන ලෙස ද ජනාධිපතිවරයා දැනුම් දුන්නේය.
75 නිදහස් දිනයට සමගාමීව සියලුම පළාත් මූලික කරගනිමින් විවිධ තේමාවන් යටතේ ප්රදර්ශන පැවැත්වීමටත්, දෙවුන්දරතුඩුව සහ පේදුරුතුඩුව යා කරමින් ප්රදර්ශනාත්මක පාපැදි සවාරියක් සංවිධානය කිරීමටත් ජනාධිපතිවරයා යෝජනා කරන ලදී.
එමෙන්ම එදින මූලික කරගනිමින් සීමිත පිටපත් සංඛ්යාවක් සහිත සුවිශේෂී මුද්දරයක් නිකුත් කිරීමටත්, 1948 නිදහස් දින උළෙලට සමගාමීව පුවත්පත්වල පළ වූ ලිපි, වාර්තා ආදිය යළි ජනගත කරමින් නිදහස් දිනය පිළිබඳ ජනතාව තුළ අභිමානයක් ඇති වන අයුරින් වැඩසටහනක් දියත් කිරීමටත් ජනාධිපතිවරයාගේ උපදෙස් පරිදි සැලසුම් කර තිබේ.
මීට අදාළ අනුකමිටු, අග්රාමාත්ය දිනේෂ් ගුණවර්ධන මහතාගේ අධීක්ෂණය යටතේ ජනාධිපති ලේකම්වරයාගේ මූලිකත්වයෙන් පත් කිරීමට ජනාධිපති රනිල් වික්රමසිංහ මහතා වැඩිදුරටත් උපදෙස් දුන්නේය.
75 වැනි නිදහස් දින සමරු උළෙල සංවිධාන කමිටු පළමු රැස්වීම ඉකුත් 07 වැනිදා ජනාධිපති කාර්යාලයේ දී ජනාධිපති රනිල් වික්රමසිංහ මහතාගේ ප්රධානත්වයෙන් පැවැත්වුණු අවස්ථාවේ දී මෙම උපදෙස් ලබා දුන්නේය.
උපාලි ද සේරම්
]]>