මෙරට ට ගෙන එනු ලබන ඉන්ධන නෞකාවල තිබිය යුතු ඉන්ධනවලින් සියයට තුනක ප්‍රමාණයක් ක්‍ෂයවීම් ලෙස සලකා නොසලකා හැරිය හැකි මුත් බැරල් 25,786ක් අඩුව තිබිය දී එය ගොඩබෑමට උපදෙස් දුන් හා එය ක්‍රියාත්මක කළ නිලධාරීන්ට එරෙහිව පියවර ගත යුතු බව ද එම නිලධාරියා පැවසීය. ඇතිකරගෙන තිබෙන ගිවිසුම් උල්ලංඝනය කරමින් ඉන්ධන තොග ගොඩබා තිබේ.
නියමිත ප්‍රමාණය අඩංගුව නොතිබූ මෙම ඉන්ධන නෞකා දෙක වෙනුවෙන් අදාළ ප්‍රමාද ගාස්තු හා ඉන්ධන සඳහා ගෙවීම් කර ඇත්තේ ඇමරිකානු ඩොලර්වලිනි.
මේ සම්බන්ධයෙන් නීතිමය ක්‍රියාමාර්ගයකට යන බවට ලංකා ඛනිජ තෙල් සංස්ථාව මීට පෙර ප්‍රකාශ කළත් මේ වනතුරු ඒ සම්බන්ධව පියවර ගෙන නැතැයි ද හෙතෙම කීය.
ඉකුත් වසරේ නොවැම්බර් 20 වැනිදා ඉන්ධන බැරල් හයලක්ෂ අනූනව දහසක් අඩංගු නෞකාවක බැරල් දහතුන් දහස් දෙසිය තිස්නවයක් අඩුවෙන් තිබී ඇත. එය ගොඩබා ඇත්තේ දින 25කට පසුව ය.
අනෙක් නෞකාව නොවැම්බර් 28 වැනිදා මෙරටට පැමිණියේය. බැරල් හත්ලක්ෂ විසිහතර දහස් අටක් අඩංගු විය යුතු ඒ නෞකාවේ ඉන්ධන බැරල් දොළොස් දහස් පන්සිය පනස් එකක් අඩුවී තිබී ඇත. එය ගොඩබා ඇත්තේ දින 66කට පසුවයි. ඒ අනුව ඉන්ධන බැරල් අඩුවීම නිසා වූ පාඩුවට අමතරව ප්‍රමාද ගාස්තු ලෙස ඩොලර් ලක්ෂ 96ක මුදලක් අදාළ සමාගමට ගෙවා දමා ඇත. සිංගප්පූරුවේ සිට මෙම ඉන්ධන මෙරටට ගෙනැවිත් තිබේ.
ශිරාන් රණසිංහ
]]>