කොල්කටා නයිට්රයිඩර්ස් කණ්ඩායමේ මුල් පෙළ පිතිකරුවන් අසාර්ථක වුවද මැදපෙළ පිතිකරුවන්ගේ දක්‍ෂ පිතිහරඹය හේතුවෙන් සහ සන්රයිසස් හයිද්‍රාබාද් කණ්ඩායමේ දුර්වල පිතිකරණය හේතුවෙන් ඉන්දීය ප්‍රිමියර් ලීග් තරගාවලියේ 15වන තරගය වූ කොල්කටා නයිට්රයිඩර්ස් කණ්ඩායම සහ සන්රයිසස් හයිද්‍රාබාද් කණ්ඩායම අතර පැවැති තරගයෙන් ලකුණු 80ක පහසු ජයක් ලැබීමට කොල්කටා නයිට්රයිඩර්ස් කණ්ඩායම සමත්විය.
පෙරේදා (03 දා) ඊඩ්න් ගාර්ඩන්හිදී පැවැති මෙම තරගයේ පළමුව පන්දුවට පහරදුන් කොල්කටා නයිට්රයිඩර්ස් කණ්ඩායම නියමිත පන්දු වාර 20 අවසානයේ කඩුලු 6ක් දැවී ලකුණු 200ක් ලබාගැනීමට සමත්වූ අතර, ලකුණු 201ක දැවැන්ත ඉලක්කයක් හඹායෑම සඳහා පිටියට පිවිසි සන්රයිසස් කණ්ඩායමට ලබාගැනීමට හැකියාව ලැබුණේ පන්දුවාර 16යි පන්දු 4ක් අවසානයේ සියලු දෙනා දැවී ලකුණු 120ක් වීම හේතුවෙන් ලකුණු 80ක ජයක් කොල්කටා කණ්ඩායමට හිමිවිය.
කොල්කටා කණ්ඩායම වෙනුවෙන් පන්දුවට පහරදීමේදී දක්‍ෂ පිතිහරඹයක නිරත වූ වෙන්කටේෂ් අයියර් පන්දු 29කට මුහුණදෙමින් හයේ පහර 3ක් සහ හතරේ පහර 7ක් සමගින් ලකුණු 60ක් සහ අන්ග්ක්‍රිෂ් රගුවංශි පන්දු 32කින් ලකුණු 50ක් ලබාගැනීමට සමත්විය. ඊට අමතරව ආජින්කෙයා රහානි ලකුණු 38ක් සහ රින්කු සිංග් නොදැවී ලකුණු 32ක් ලැබීය.
පන්දු යැවීමේදී මොහොමඩ් ෂමී, පැට් කමින්ස්, සීෂාන් අන්සාරි, හර්ෂාල් පටෙල් සහ කමිඳු මෙන්ඩිස් 1කඩුල්ල බැගින් දවාලීය. සන්රයිසස් කණ්ඩායම වෙනුවෙන් පන්දුවට පහරදීමේදී හෙන්ද්‍රිච් ක්ලාසන් ලකුණු 33ක්, කමිඳු මෙන්ඩිස් ලකුණු 27ක් සහ නිතිෂ් කුමාර් ලකුණු 19ක් ලැබීය.
පන්දු යැවීමේදී වරුන් චක්‍රවර්ති ලකුණු 22කට කඩුලු 3ක් සහ විභාවි අරෝරා ලකුණු 29කට කඩුලු 3ක් බිඳහෙළීය.
ලකුණු 29කට කඩුලු 3ක් බිඳහෙලූ විභාවි අරෝරා තරගයේ වීරයා ලෙස සම්මාන ලැබීය.
සිසිර ඉන්ද්‍රජිත්
