ඉකුත් සිකුරාදා (28) මියන්මාරයේ සිදු වූ ප්‍රබල භූමිකම්පාව හේතුවන් ලක්ෂ සංඛ්‍යාත මියන්මාර් වැසියන් පිරිසක් නිවාස අහිමි වී හා ආහාර හා ජලය ලබා ගැනීමට නොහැකි වී සිටින බව ලෝක ආහාර වැඩසටහනේ ආසියාතික කලාපීය අධ්‍යක්ෂක සමීර් වන්මාලි පවසා තිබේ. ලොවම කම්පාවට පත් කළ මියන්මාර් වැසියන් 2700කට අධික සංඛ්‍යාවකට හා තායිලන්ත වැසියන් 20කට පමණ දිවි අහිමි කළ මියන්මාර් භූමිකම්පාවෙන් සිදුව ඇති විනාශය අතිමහත් බවත් තවමත් එහි සැබෑ බලපෑම තීරණය කිරීමට කල් වැඩි බව ලෝක ආහාර වැඩසටහනේ ආසියාතික කලාපීය අධ්‍යක්ෂකවරයා සඳහන් කර තිබේ. පවතින තත්ත්වය මත ඉදිරි සතිවලදී හා මාසවලදී මියන්මාරයට හදිසි හා මානුෂීය ආධාර සැපයීම ඉතාමත් අත්‍යවශ්‍ය කරුණක් වනු ඇති බවද ඔහු සඳහන් කර තිබේ. බීබීසී ප්‍රවෘත්ති සේවය හා සම්මුඛ සාකච්ඡාවකට එක්වෙමින් කලාපීය අධ්‍යක්ෂ වන්මාලි පවසා ඇත්තේ ලෝක ආහාර වැඩසටහනේ නිලධාරීන්ට භූමිකම්පාවෙන් විපතට පත් ප්‍රදේශවල මාර්ග හා පාලම් විනාශ වීම හා ජංගම දුරකථන හා අන්තර්ජාල සේවාවන් බිඳ වැටී තිබීම හේතුවෙන් එම ප්‍රදේශවලට යෑම අභියෝගයක්ව පවතින බවයි. මේ අතර භූමිකම්පාව හේතුවෙන් අතුරුදන්ව සිටින පිරිස් සොයා සිදු කෙරෙන මෙහෙයුම් තවදුරටත් සාර්ථක වනු ඇතැයි අනුමාන කළ නොහැකි බව එම මෙහෙයුම්වල නිරතව සිටින පිරිස් පවසා තිබේ. භූමිකම්පාව සිදු වී පැය 72 කාලයක් ඉක්මවා ගොස් තිබීම මෙයට හේතු වී තිබේ. මේ අතර මියන්මාරයේ භූමිකම්පාවෙන් විපතට පත් වූවන් සිහි කරමින් ඊයේ රටවැසියන් විසින් විනාඩියක නිශ්ශබ්දතාවයක් පවත්වා තිබේ.
