ශ්‍රී ලංකා ජාතික හොකී කණ්ඩායමේ නායකත්වයට තරිඳු කුමාර හේන්දෙණිය පත් කර තිබේ.
2014 වසරේ සිට ජාතික කණ්ඩායම නියෝජනය කරමින් ජාත්‍යන්තර හොකී ගාසාහිදී කෙළිබිම තුළ දක්ෂතා ප්‍රදර්ශනය කර ඇති තරිඳු කුමාර හේන්දෙණිය මාතලේ ක්‍රිස්තුදේව විදුහලේ ආදි ශිෂ්‍යයෙකි.
2014 වසරේ චීනයේ දී සහ 2018 වසරේ ඉන්දුනීසියාවේ දී ක්‍රියාත්මක කෙරුණු ආසියානු ක්‍රීඩා උළෙල මෙන්ම 2016 වසරේ ඉන්දියාවේ දී පැවැති දකුණු ආසියාතික ක්‍රීඩා උළෙලට සහභාගි වී ඇති තරිඳු කුමාර හේන්දෙණිය 2018 වසරේ ඕමානයේ දී ක්‍රියාත්මක කෙරුණු ආසියාතික ක්‍රීඩා උළෙලට සුදුස්සන් තෝරා ගැනීමේ තරගාවලියේ දක්ෂතම ගෝල් රකින්නා ලෙස තිළිණ ලබන්නට ද සමත් වීම ඉහළම දක්ෂතා අතර කැපී පෙනෙයි. මීට අමතරව ආසියානු හොකී සම්මේලන කුසලාන තරගාවලිය (2022, 2016 සහ 2014) සහ ලෝක ලීග් ශූරතා තරගාවලිය (2014, 2016 සහ 2017) ක්‍රීඩා කර ඇති තරිඳු කුමාර හේන්දෙණිය මධ්‍යම පළාත් පිල, මාතලේ පිල, ආරක්ෂක සේවා පිල සහ යුද හමුදා පිල නියෝජනය කරන දක්ෂතම ගෝල් රකින්නකු වෙයි.
මේ අතර වාරයේ දී මාතලේ ක්‍රිස්තුදේව විදුහලේ තවත් ආදී ශිෂ්‍යයකු වන ධම්මික ප්‍රභාත් රණසිංහට ජාතික කණ්ඩායමේ උප නායකත්වය හිමිවී තිබේ.
2012 වසරේ පැවැති ලෝක ලීග් ශූරතා හොකී තරගාවලියට මුලින්ම එක්වීමට සමත් වූ ධම්මික ප්‍රභාත් රණසිංහ මෙරට සිටින දක්ෂතම පසු පෙළ ආරක්ෂක ක්‍රීඩකයෙකි. 2014 සහ 2018 ආසියාතික ක්‍රීඩා උළෙල මෙන්ම දක්ෂිණ ආසියාතික ක්‍රීඩා උළෙලට සහභාගි වී ඇති මේ පළපුරුදු ක්‍රීඩකයා ආසියානු හොකී සම්මේලන කුසලාන තරගාවලිය වෙනුවෙන් රට නියෝජනය කර ඇත.
2018 වසරේ ඕමානයේ දී පැවති ආසියාතික ක්‍රීඩා උළෙලට සුදුස්සන් තෝරා ගැනීමේ තරගාවලියේ දී ධම්මික ප්‍රභාත් රණසිංහ ප්‍රදර්ශනය කළ දක්ෂතාව ප්‍රශංසනීය. මධ්‍යම පළාත් පිල, මාතලේ පිල, ආරක්ෂක සේවා පිල සහ යුද හමුදා පිල නියෝජනය කර ඇති ධම්මික ප්‍රභාත් රණසිංහ ජාතික කණ්ඩායමේ උප නායකත්වයට පත් වූ පළමු අවස්ථාව මෙය වෙයි.
අනුරුද්ධ හේරත් බණ්ඩාර
සංස්කරණය – සුසිල් ජයකොඩි
