සැත්කම් තවත් මාස ගණනාවකින් පසුපසට
අක්ෂි රෝග විශේෂඥ වෛද්‍යවරුන් සහ අක්ෂි රෝග පිළිබඳ ලේඛකාධිකාරිවරුන් රැසකගේ හදිසි විදේශ සංචාරයක් හේතුවෙන් රට පුරා අක්ෂි සැත්කම් රැසක් ඇනහිට ඇති බව ‘දිවයින ඉරිදා සංග්‍රහය’ට වාර්තා වෙයි.
පෞද්ගලික වෛද්‍ය උපකරණ සැපයුම් ආයතනයක් විසින් සිදුකරන අනුග්‍රහයක් මත ඔවුන් එසේ සංචාරයට එක්ව ඇත. එසේ ගිය පිරිස හතළිස් දෙනකු පමණ වන බව සඳහන් වේ. එම ප්‍රමාණය සමස්ත අක්ෂි රෝග විශේෂඥ වෛද්‍යවරුන්ගෙන් සියයට අසූවක් බව පැවසෙයි.
ඔවුන් එසේ එක්ව ඇත්තේ ඉන්දීය සංචාරයකට වන බව සෞඛ්‍ය අංශ ආරංචි මාර්ග කියා සිටියි.
කොළඹ අක්ෂි රෝහලේ කටයුතු කරන විශේෂඥ අක්ෂි වෛද්‍යවරුන් දහතුන් දෙනාගෙන් 11 දෙනකු මෙම සංචාරය සඳහා එක්ව තිබෙන බවත් ඉතිරි වෛද්‍යවරුන් දෙදෙනා සහ ස්නායු පටක විශේෂඥ වෛද්‍යවරුන් තිදෙනා පශ්චාත් උපාධි වෛද්‍යවරුන්ගේ විභාග කටයුත්තක් වෙනුවෙන් රෝහලින් බැහැර වී ඇති බවත් එම ආරංචි මාර්ග කියයි.
වෛද්‍යවරුන්ගේ මෙම සංචාර හේතුවෙන් රට පුරා අක්ෂි රෝහලවල වසරකට වැඩි කාලයක් පොරොත්තු ලේඛනයේ සිටි අක්ෂි රෝගීන්ගේ සැත්කම් තවත් මාස ගණනාවකින් පසුපසට ගොස් ඇත.
මේ සම්බන්ධයෙන් කොළඹ අක්ෂි රෝහලේ නියෝජ්‍ය අධ්‍යක්ෂ වෛද්‍ය ජයරුවන් බණ්ඩාර මහතාගෙන් කළ විමසීමේදී හෙතෙම සඳහන් කළේ විශේෂඥ වෛද්‍යවරුන් විදේශගත වන්නේ සෞඛ්‍ය අමාත්‍යාංශයේ නිසි අවසරයක් අනුව බවත්, සැත්කම් කටයුතු නියමිත පරිදි කරගෙන යෑම සඳහා ආදේශක වෛද්‍යවරුන් යොදා ඇති බවත් ය. රෝහල් කටයුතු ගැටලුවකින් තොරව පවත්වාගෙන යන බව ද ඔහු කීය.
සිරිමන්ත රත්නසේකර
