චීන ජනාධිපති ෂී ජින්පිං මහතාගේ ආරාධනාවකට අනුව චීනයේ
සිව් දින රාජ්‍ය සංචාරයක නිරත ජනාධිපති අනුර කුමාර දිසානායක මහතා තෙවැනි
දිනය ආරම්භ කරමින් අද පෙරවරුවේ රාජ්‍ය හා පෞද්ගලික අංශයේ ආයෝජන
සැසියකට සහභාගි වීමට නියමිත බව ජනාධිපති මාධ්‍ය ඒකකය සඳහන් කරයි.
රාජ්‍ය හා පෞද්ගලික සමාගම් එක්ව සංවිධානය කරන මෙම ආයෝජන සැසිය ජනාධිපති
අනුර කුමාර දිසානායක මහතාගේ ප්‍රධානත්වයෙන් පැවැත්වීම විශේෂත්වයකි.
ඉන් අනතුරුව ජනාධිපතිවරයා චීන ජනතාවගේ වීරයන්ගේ
ස්මාරකය වෙත පුෂ්පෝපහාර දැක්වීමට ද නියමිතය.
අද පස්වරුවේ චීන අග්‍රාමාත්‍ය ලී
ච්‍යං හා චීන ජාතික කොංග්‍රසයේ සභාපති ජාඕ ලජී යන මහත්වරු හමුවී
සාකච්ඡා පැවැත්වීමටද සැලසුම් කර ඇත.
විදේශ කටයුතු, විදේශ රැකියා සහ සංචාරක අමාත්‍ය විජිත හේරත් ප්‍රවාහන,
මහා මාර්ග, වරාය හා සිවිල් ගුවන් සේවා අමාත්‍ය බිමල් රත්නායක යන
මහත්වරුද මෙම අවස්ථාවන්ට සහභාගි වීමට නියමිතය.
