පළාත් පාලන මැතිවරණයට අදාළව ඊයේ (02දා) සවස් වන විට දිස්ත්‍රික්ක 9ක පමණ නිල ඡන්ද පත්‍රිකා මුද්‍රණය කර අවසන් බව රජයේ මුද්‍රණාලයාධිපති ප්‍රදීප් පුෂ්පකුමාර මහතා “දිවයින” ට පැවැසීය.
එසේම, පළාත් පාලන ආයතන 109ක තැපැල් ඡන්ද පත්‍රිකා මුද්‍රණය සම්පූර්ණයෙන්ම අවසන් කර ඇතැයි ද මුද්‍රණය කරන ලද එම ඡන්ද පත්‍රිකා මැතිවරණ කොමිෂන් සභාව වෙත භාරදී ඇතැයි ද ඒ මහතා කියා සිටියේය. මේවා රැගෙන යෑමට පොලිසියේ හා පොලිස් විශේෂ කාර්ය බළකායේ ආරක්‍ෂාව ලැබෙන බවද හෙතෙම පැවැසීය. ඡන්ද පත්‍රිකා මිලියන 18ක් මුද්‍රණය සඳහා ඇණවුම් ලැබී ඇති බවත් මේ වන විට රුපියල් මිලියන 30කට අධික ඡන්ද පත්‍රිකා මුද්‍රණය කර අවසන් බවත් පවසන රජයේ මුද්‍රණාලයාධිපතිවරයා තවත් දින දෙක තුනකින් සියලුම ඡන්ද පත්‍රිකා මුද්‍රණය කර අවසන් කරන බවද වැඩිදුරටත් කියා සිටියේය.
ප්‍රදීප් ප්‍රසන්න සමරකෝන් සහ චමින්ද සිල්වා
