ඔත්තුව දුන්නේ පිස්තෝලයත් සමග කොටුවුණු තරුණයෙක්
පාතාල කල්ලියක් විසින් රත්ගමදී වෙඩි තබා ඝාතනය කරන ලද හිටපු පොලිස් පරීක්ෂක බාලේන්ද්‍රසිංහ මහතාගේ වැඩිමහල් සොහොයුරිය සහ තවත් තරුණයකු සතුව තිබී ස්වයංක්‍රිය පිස්තෝල දෙකක් පොලිස් විශේෂ කාර්ය බළකාය මගින් පෙරේදා (02දා) රාත්‍රී අත්අඩංගුවට ගෙන ඇත.
මෙම ආයුධ කුමන අරමුණින් සඟවාගෙන සිටියේ ද යන්න මෙතෙක් හෙළි වී නැත. පොලිස් විශේෂ කාර්ය බළකායේ අණදෙන නිලධාරි නියෝජ්‍ය පොලිස්පති සමන් සිල්වා මහතාගේ උපදෙස් මත එම බළකායේ දකුණු පළාත් මෙහෙයුම් ඒකකය
මගින් සිදු කළ මෙහෙයුමකදී රත්ගම බූස්ස ප්‍රදේශයේදී සැකකටයුතු තරුණයකු අත්අඩංගුවට ගෙන තිබිණි.
මෙම තරුණයා සතුව තිබී විදේශ රටක නිෂ්පාදිත පිස්තෝලයක් හමුවී ඇති අතර ඔහුගෙන් ප්‍රශ්න කිරීමේදී තවත් පිස්තෝලයක් පිළිබඳ තොරතුරු අනාවරණය කරගෙන ඇත.
පසුව විශේෂ කාර්ය බළකායේ නිලධාරීන් රත්ගම ප්‍රදේශයේ කළ වැටලීමකදී නිවසක සඟවා ගෙන සිටි තවත් පිස්තෝලයක් අත්අඩංගුවට ගැනීමට හැකි වී තිබේ.
පසුව අනාවරණය වී ඇත්තේ පිස්තෝලය සමග අත්අඩංගුවට ගත් කාන්තාව මීට මාස 06කට පමණ පෙර පාතාල කල්ලියක් විසින් රත්ගමදී වෙඩි තබා ඝාතනය කළ පොලිස් පරීක්ෂක බාලේන්ද්‍රසිංහ ගේ වැඩිමහල් සොහොයුරිය බවයි.
කරන්දෙණියේ සුද්දා නමැති පාතාල නායකයා විසින් කුලී ඝාතකයන් යොදවා බාලේන්ද්‍රසිංහ වෙඩි තබා ඝාතනය කර තිබිණි. අත්අඩංගුවට ගත් සැකකාරිය සහ සැකකරු වැඩිදුර විමර්ශනය සඳහා රත්ගම පොලිසිය වෙත භාරදී ඇත.
හේමන්ත රන්දුණු
