නිල පිළිගැනීමේ උළෙල හෙට නිදහස් චතුරස්‍රයේදී
අතීතයේ පටන් අප රට හා බැඳුණු මිතුදම තවත් සවිමත් කරමින් ඉන්දීය අගමැති නරේන්ද්‍ර මෝදි සිය දෙදින නිල සංචාරය අරඹමින් අද (04දා) ‘දිවයින’ ට සැපත් වන්නේය. මෙරටට පැමිණෙන ඉන්දීය අග්‍රාමාත්‍යවරයා රාජ්‍ය ගෞරව සහිතව පිළිගැනීමට ජනාධිපති අනුර කුමාර දිසානායක මහතාගේ උපදෙස් මත සියලු කටයුතු යොදා තිබේ.
එතුමන් පිළිගැනීමේ නිල රාජ්‍ය උත්සවය හෙට (5දා) පෙරවරුවේ කොළඹ නිදහස් චතුරස්‍රයේ දී පැවැත්වෙයි. එහිදී හමුදා උත්තමාචාර ද භාරත අගමැතිතුමන් වෙත පිරිනැමේ. නිල පිළිගැනීමේ උත්සවයෙන් පසුව සාම්පූර් සුළං විදුලි බලාගාර ව්‍යාපෘතිය ආරම්භ කිරීම ඇතුළු වැඩසටහන් කිහිපයකට ඉන්දීය අග්‍රාමාත්‍යවරයා ඩිජිටල් තාක්‍ෂණය ඔස්සේ කොළඹ සිට එක්වීමට නියමිතය.
ඉන් අනතුරුව අනුරාධපුර ජය ශ්‍රී මහා බෝධීන් වහන්සේ වැඳ පුදා ගැනීම ඇතුළු තවත් ආගමික වැඩසටහන් කිහිපයකට ද අගමැති මෝදි සහභාගි වීමට නියමිතය.
ඉන්දීය අග්‍රාමාත්‍යවරයා පිළිගැනීම සඳහා ගුවන්තොටුපළ හා කොළඹ නගරය ආශ්‍රිතව ශ්‍රී ලංකා හා ඉන්දීය ධජ ඔසවා සරසා තිබුණි. ඉන්දීය අග්‍රාමාත්‍යවරයා ගමන් ගන්නා මාර්ග හා ප්‍රදේශවල දැඩි ආරක්‍ෂක විධිවිධාන යොදා ඇති අතර විශේෂ රථවාහන සැලැස්මක් ක්‍රියාත්මක වෙයි.
ඉන්දීය අග්‍රාමාත්‍යවරයා මේ වන විට බිම්ස්ටෙක් සමුළුවට සහභාගි වීම සඳහා තායිලන්තයට ගොස් සිටී. එම සංචාරය සඳහා ඉන්දියාවෙන් පිටත් වීමට පෙර හෙතෙම විශේෂ .ඞ. සටහනක් තබා තිබේ.
“මගේ ශ්‍රී ලංකා සංචාරය අප්‍රේල්”
“මා තායිලන්තයේ සිට අප්‍රේල් 4 සිට 6 දක්වා දෙදින සංචාරයක් සඳහා ශ්‍රී ලංකාවට පිටත් වෙනවා. මෙම සංචාරය ජනාධිපති අනුර කුමාර දිසානායක මහතා විසින් පසුගිය දෙසැම්බර් මාසයේ සිදු කළ අතිසාර්ථක ඉන්දියන් සංචාරයෙන් අනතුරුව සිදුවෙයි. අපි බහුවිධ ඉන්දියා ශ්‍රී ලංකා මිත්‍රත්ව සමාලෝචනය කර සහයෝගිතාවේ නව මාර්ග සාකච්ඡා කිරීමට බලාපොරොත්තු වෙනවා. ඒ වෙනුවෙන් ඇති විවිධ සාකච්ඡා සඳහා ද මම එක්වීමට තීරණය කර තිබෙනවා” යනුවෙන් එහි සටහන් කර තිබේ.
