අපරාධ පරීක්‍ෂණ දෙපාර්තමේන්තුවේ ජ්‍යෙෂ්ඨ නිලධාරීන් දූෂිත බවට ඔවුන්ට අපහාසයක් වන අයුරින් ප්‍රකාශයක් කළේ යැයි කියන සිද්ධිය සම්බන්ධයෙන් සැකපිට අත්අඩංගුවට ගෙන රක්‍ෂිත බන්ධනාගාර ගතකර සිටි මගෙන් රටට සංවිධානයේ සභාපති සංජය මහවත්ත ඇපමත මුදාහැරීමට කොළඹ ප්‍රධාන මහෙස්ත්‍රාත් තිළිණ ගමගේ මහතා නියෝග කළේය.
පොලිස් නිලධාරීන් හෝ රජයේ නිලධාරීන්ගේ රාජකාරියට බාධාවක් වන පරිදි මින් ඉදිරියට කටයුතු නොකරන ලෙසත් යම්කිසි ගැටලුවක් ඇත්නම් ගත හැකි වෙනත් ක්‍රියාමාර්ග ඇති බැවින් ඒ අනුව කටයුතු කරනු මිස ප්‍රසිද්ධියේ යමෙකුට අපහාස කිරීම සුදුසු නොවන බවත් පැවසූ ප්‍රධාන මහෙස්ත්‍රාත්වරයා රුපියල් 25,000ක මුදල් ඇප හා රුපියල් ලක්‍ෂ පහ බැගින් වූ ශරීර ඇප දෙකක් මත සැකකරු මුදාහැරීමට නියෝග කළේය.
එම සැකකරුගෙන් ඇඟිලි සලකුණු ලබාගෙන වාර්තාවක් කැඳවන ලෙසට පෙර නඩු දිනයේ අධිකරණය විසින් නියෝගයක් ලබාදුන් නමුත් ඇඟිලි සලකුණු ලබාදීම සැකකරු ප්‍රතික්‍ෂේප කර ඇතැයි අපරාධ පරීක්‍ෂණ දෙපාර්තමේන්තුව වෙනුවෙන් පෙනී සිටි පොලිස් අධිකාරි ලසන්ත රත්නායක මහතා අධිකරණයට පැවසීය. තම අධිකරණය විසින් නියෝගයක් නිකුත් කළ පසු ඒ අනුව කටයුතු කිරීම පොලිසියේ වගකීම බැවින් ඒ අනුව කටයුතු කළ යුතුව ඇතැයිද ප්‍රධාන මහෙස්ත්‍රාත් තිළිණ ගමගේ මහතා පෙන්වා දුන්නේය.
සිය සේවාදායකයා මින් ඉදිරියට අධිකරණයේ නියෝගය අනුව කටයුතු කරනු ඇති බවත් අපරාධ පරීක්‍ෂණ දෙපාර්තමේන්තුවද එක් එක් පුද්ගලයන්ගේ වුවමනා එපාකම් අනුව අසාධාරණ අයුරින් කටයුතු නොකරනු ඇතැයි තමන් අපේක්‍ෂා කරන්නේ යැයිද එම සැකකරු වෙනුවෙන් පෙනී සිටි ජ්‍යෙෂ්ඨ නීතිඥ ගුණරත්න වන්නිනායක මහතා පැවසීය.
එම නඩුව ලබන අගෝස්තු 30 වැනිදා දක්වා කල් තැබිණි. නීතිඥ මර්වින්ද සිල්වා, තුසිත ගුණසේකර, ජ්‍යෙෂ්ඨ නීතිඥ ගුණරත්න වන්නිනායක සහ ජනාධිති නීතිඥ මෛත්‍රී ගුණරත්න යන මහත්වරු සැකකරු වෙනුවෙන් පෙනී සිටියහ.
ඒ. ජේ. ඒ. අබේනායක
