රනිල් වික්‍රමසිංහ ජනාධිපතිවරයාගේ ජනාධිපතිවරණ ජයග්‍රහණය වෙනුවෙන් උතුරු-නැගෙනහිර ජනතාව පෙළගස්වන බවත්, ඔහු වෙනුවෙන් තම සහාය නිරන්තරයෙන්ම ලබාදෙමින් දිරිගන්වන බවත් හිටපු නියෝජ්‍ය ඇමැති විනයාගමූර්ති මුරලිදරන් හෙවත් කරුණා අම්මාන් “දිවයින”ට පැවැසීය.
දැනටමත් තමන් උතුරු-නැගෙනහිර ජනතාව දැනුවත් කරමින් සිටින බවත්, පානදුර ප්‍රදේශයේ තමන් කාර්යාලයක් ආරම්භ කළ බවත් හිටපු නියෝජ්‍ය ඇමැතිවරයා කීය.
රනිල් වික්‍රමසිංහ ජනාධිපතිවරයා උතුරු-නැගෙනහිර පළාත්වල සංචාරය කරමින් ජනතාවගේ හඬට ඇහුම්කන් දෙමින් කටයුතු කරන බවත් ඒ හේතුවෙන් ජනතාවට ඔහු ගැන පැහැදීමක් ඇති බවත් හිටපු නියෝජ්‍ය ඇමැතිවරයා කියා සිටියේය.
සිය මැතිවරණ ව්‍යාපාරය හරහා උතුරු නැගෙනහිරින් ජනාධිපතිවරයාට උපරිම ඡන්ද ප්‍රමාණයක් ලබාදීමට ක්‍රියාකරන බව ද හෙතෙම කීය.
ප්‍රදීප් ප්‍රසන්න සමරකෝන්
