යූටියුබ් නාළිකාවක් පවත්වාගෙන යමින් අසභ්‍ය ප්‍රකාශ සිදුකිරීමේ චෝදනාවට ලක්ව සිටි රාජාංගනය සද්ධාරතන හිමි සංඝභාවයෙන් නෙරපා හැරීමට ශ්‍රී ලංකා රාමඤ්ඤ මහා නිකාය තීරණය කර තිබේ.
මෙම භික්ෂුවට එරෙහි චෝදනා පත්‍ර විද්වත් මහා සංඝයා වහන්සේ සිව් නමකගෙන් යුත් කමිටුවක් හමුවේ සලකා බැලීමෙන් පසුව වරදකරු බවට තීරණය කිරීම හේතුවෙන් මෙම තීරණය ගෙන ඇතැයි ජනාධිපති නීතිඥ අනුර මැද්දෙගොඩ මහතා ඊයේ (02දා) කොළඹ කොටුව මහෙස්ත්‍රාත් අධිකරණයට දැනුම් දුන්නේය.
සංඝභාවයෙන් නෙරපා හැරීමේ නියෝගය ලිඛිතව, ආරක්ෂක හා බුද්ධශාසන අමාත්‍යාංශවලට දැනුම් දී ඇති බව ද නීතිඥවරයා අධිකරණය හමුවේ ප්‍රකාශ කළේය. මීට ඉහත දී ද අසභ්‍ය ප්‍රකාශ කිරීමේ චෝදනාවට ලක්ව රක්ෂිත බන්ධනාගාරගත කර සිටි මෙම හිමිනම දැඩි ඇප කොන්දේසි මත මුදාහැර තිබිණි.
