නොබෙල් සාම ත්‍යාගලාභී හිටපු කොස්ටරිකා රාජ්‍යයේ ජනාධිපතිවරයකු වන ඔස්කාර් ඇරියස්ගේ ඇමෙරිකානු වීසා බලපත්‍රය අවලංගු කිරීමට ඇමෙරිකානු රජය විසින් පියවර ගෙන ඇති බව විදෙස් මාධ්‍ය පවසයි. මෙම පියවර ගෙන ඇත්තේ හිටපු කොස්ටරිකානු ජනාධිපති ඇරියස් විසින් ඇමෙරිකානු ජනාධිපති ට්‍රම්ප්ව විවේචනය කිරීමෙන් අනතුරුව බව වාර්තා වී තිබේ.
ඇරියස් විසින් සති කිහිපයකට පෙර ඇමෙරිකානු ජනාධිපතිවරයාව ප්‍රසිද්ධියේ විවේචනය කර ඇත්තේ ඔහුව හිටපු රෝම අධිරාජ්‍යවරයකුට සමාන කරමිනි. ‘84 හැවිරිදි හිටපු කොස්ටරිකානු ජනාධිපති ඇරියස් හට නොබෙල් සාම ත්‍යාගය පිරිනමා ඇත්තේ මධ්‍යම ඇමෙරිකාවේ පවතින අර්බුදයන් නිම කිරීම සඳහා ඔහු විසින් ගනු ලැබූ ක්‍රියාමාර්ග ඇගයීම සඳහාය. ‘කෙසේ වුවද ඔහුගේ ඇමෙරිකානු වීසා බලපත්‍රය අහෝසි කිරීම සම්බන්ධයෙන් ඇමෙරිකානු බලධාරීන් විසින් කිසිදු පැහැදිලි කිරීමක් කර නොමැති බව විදෙස් මාධ්‍ය පවසයි.
