සබරගමු පළාත් මාර්ග අමාත්‍යාංශයට අයත් ව්‍යාපෘති හැත්තෑ හතකට (77) අදාළව රුපියල් හත්කෝටි දාසය ලක්ෂ හතළිස් පන්දහස් දෙසිය විසිහයයි ශත තිස් දෙකක (71645226.32) මුදලක් සාවද්‍ය පරිහරණය සම්බන්ධයෙන් චෝදනා ලැබූ ඇඹිලිපිටිය ප්‍රාදේශීය සභාවේ හිටපු තාක්ෂණ නිලධාරියකු, විෂය ලිපිකරුවකු, සහ ලේකම්වරයකු මේ මස 08 වැනිදා දක්වා රක්‍ෂිත බන්ධනාගාරගත කර තබන ලෙස ඇඹිලිපිටිය ප්‍රධාන මහෙස්ත්‍රාත් තිලිණ මහේෂ් පීරිස් මහතා 01 දා නියෝග කළේය.
මෙසේ රක්‍ෂිත බන්ධනාගාරගත කෙරුණේ වයි.එම්.පී බණ්ඩාර හිටපු තාක්ෂණ නිලධාරියා සහ සිංගප්පුලි ආරච්චිගේ චින්තක කුමාර හිටපු ලේකම්වරයා මෙන්ම අමල් තුෂාර විතාරණගේ යන හිටපු විෂය ලිපිකරුය. තාක්ෂණ නිලධාරියා සහ ලේකම්වරයා බන්ධනාගාර නිලධාරීන් මගින් අධිකරණ ඉදිරිපත් කළ අතර හිටපු හිටපු විෂය ලිපිකරුවා අපරාධ පරීක්ෂණ දෙපාර්තමේන්තු නිලධාරීන් විසින් අධිකරණයට ඉදිරිපත් කරනු ලැබිණි. 2017 සහ 2016 වර්ෂවල ඇඹිලිපිටිය ප්‍රාදේශීය සභාවේ ව්‍යාපෘති හැත්ත හතකට අදාළව හත් කෝටි දාසය ලක්ෂ හතළිස් පන්දහස් දෙසිය විසි හයයි ශත තිස් දෙකක සාවද්‍ය පරිහරනය කිරීම සම්බන්ධයෙන් 2023 වර්ෂයේදී එවකට සබරගමු පළාත් සභාවේ පළාත් මාර්ග සංවර්ධන ග්‍රාමීය යටිතල පහසුකම් සංචාරක ක්‍රීඩා යෞවන කටයුතු අමාත්‍යංශයේ ලේකම් බමුණු ආරච්චිගේ චාමර ප්‍රේමණාත් යන අය විසින් අපරාධ පරීක්ෂණ දෙපාර්තමේන්තුවේ මූල්‍ය හා වාණිජ අපරාධ දෙපාර්තමේන්තුවට පැමිණිලි කර තිබිණි. ව්‍යාපෘති හැත්ත හතෙන් පහළොවක් සිදු කර නොමැති බව ද අධිකරණය හමුවේ හෙළි විය.
මාර්ග හා ක්‍රීඩාපිටි ඉදිකිරීම් සම්බන්ධයෙන් මෙම වංචාවන් සිදුව ඇති බවත් අපරාධ සම්බන්ධ විමර්ශන තවදුරටත් සිදුකරන බවත් පැමිණිල්ල වෙනුවෙන් කරුණු දක්වමින් අපරාධ පරීක්ෂණ දෙපාර්තමේන්තුව අධිකරණ හමුවේ පවසා සිටියේය.
ඕමල්පේ – ප්‍රගීත් ජනක
