සේවක අර්ථසාධක අරමුදලේ මෙතෙක් පැවති සියයට 9 ක පොලී අනුපාතය සියයට 13 දක්වා ඉහළ නැංවීමට රජය පියවර ගෙන ඇති බව මුදල් රාජ්‍ය අමාත්‍ය ආචාර්ය රංජිත් සියඹලාපිටිය මහතා පැවසීය.
පසුගිය කාලවකවානුව තුළ සේවක අර්ථසාධක අරමුදල විනාශ වෙමින් යන බවට ඇතැම් පාර්ශ්වකරුවන් විසින් නැගූ චෝදනාව අර්ථ විරහිත බවත් 2023 වර්ෂය සඳහා පාර්ලිමේන්තුවේ සම්මතව පැවැති පොලී අනුපාතය ද ඉක්මවමින් එම මුදල සියයට 9 සිට සියයට 13 දක්වා ඉහළ නැංවීමට රජය තීරණය කර ඇති බවත් අමාත්‍යවරයා වැඩිදුරටත් පැහැදිලි කළේය.
රටේ ඇති දැවැන්තම අරමුදල සේවක අර්ථසාධක අරමුදල බවත් මේ වන විට ක්‍රියාකාරී සාමාජිකයින් ලක්ෂ විසි හතක පිරිසක් එහි සිටින බවත් ණය ප්‍රතිව්‍යුහගතකරණයේදී විශාලතම අභියෝගය එල්ල වූයේ සේවක අර්ථසාධක අරමුදලත් සමග පැවති ණය සම්බන්ධව බවත් පාර්ලිමේන්තුවේ මෙන්ම මාධ්‍ය හරහා ද සමාජයේ ද බොහෝ දෙනා චෝදනා කළේ ණය ප්‍රතිව්‍යුහගතකරණයේදී සේවක අර්ථසාධක අරමුදලට විශාල අලාභයක් සිදුවන බව සඳහන් කරමින් බවත් පෙන්වා දුන් අමාත්‍යවරයා රජය මේ සඳහා ඉතාමත් සාධාරණ විසඳුමක් ලබා දී ඇති බව පැවසීය.
එම චෝදනා නැගූ බොහෝ දෙනා මේ වන විට නිහඬව සිටින බවත් 2023 වර්ෂය සඳහා සේවක අර්ථ සාධක අරමුදලෙහි ආයෝජනය කර උපයාගත් මුදල්වලින් සියයට 13 ක පොලී ප්‍රතිශතයක් ගෙවීමට රජය ගෙන ඇති මෙම තීරණය සාමාජිකභවතුන්ට සුබ පණිවුඩයක් වනු ඇති බවත් අමාත්‍යවරයා වැඩිදුරටත් ප්‍රකාශ කළේය.
ශ්‍යාම් නුවන් ගනේවත්ත
