මංමුලා වී සිටි වලස් පැටියකු හොරොව්පොතාන, කිව්ලේකඩ පාහිටා ඇති හුරුළු රක්ෂිතයේ සිටියදී කහටගස්දිගිලිය වනජීවී නිලධාරීන් පිරිසක් සොයා ගෙන ඇත.
මෙලෙස හමුව ඇති වලස් පැටවා මාස එකහමාරක් පමණ වන බවත් උස අගල් 18 ක් පමණ වන බවත් වනජීවි නිලධාරීහු පවසති.
මෙම වනජීවී නිලධාරීන් පිරිස සිය රාජකාරී කටයුත්තක් සඳහා හුරුළු රක්ෂිතයේ ගමන් කරමින් සිට ඇත. මවගෙන් මඟ හැරුණු මෙම වලස් පැටියා එහිදී අතරමංවී සිට ඇති බව වනජීවි නිලධාරීන්ට නිරීක්ෂණය වී ඇත. ඒ අනුව එම නිලධාරීන් මෙම වලස් පැටවා ආරක්ෂිතව රැගෙනැවිත් ඇත.
අනතුරුව වලස් පැටවා අනුරාධපුර පණ්ඩුලගම වනජීවී පශු වෛද්‍ය නිලධාරීන්ගේ පරීක්ෂාවට යොමු කිරීමට මෙම නිලධාරීන් කටයුතු කර ඇත. එහිදී වලස් පැටවාගේ සෞඛ්‍ය තත්ත්වය පිළිබඳව පරීක්ෂා කිරීමට නියමිත බව කහටගස්දිගිලිය ස්ථාන භාර වනජීවී නිලධාරී එම්.ඒ.කේ.එස්. දිසානායක මහතා පැවසුවේය.
මැදවච්චිය-ගයාන්
