හිටපු ජනාධිපති රනිල් වික්‍රමසිංහගෙන් විශේෂ ප්‍රකාශයක්
අදානි සමාගම ලංකාවේ සහ ඉන්දියාවේ නීති කඩා ඇති බවට එල්ලවෙන චෝදනා ඉන්දියාවේ අගමැතිතුමා මෙරටට පැමිණෙන අවස්ථාවේ අදින්න හොඳ නැතැයි හිටපු ජනාධිපති රනිල් වික්‍රමසිංහ මහතා ඊයේ (02දා) විශේෂ ප්‍රකාශයක් කරමින් කියා සිටී. එමගින් මෙසේද සඳහන් කර තිබේ.
2023-2024 සමයේදී අපේ ආණ්ඩුව පුනර්ජනනීය බල ශක්තිය පිළිබඳ යෝජනා ගණනාවක් අනුමත කළා. අප ඒ වැඩ කටයුත්ත කළේ මේ රටට එම බලශක්තිය වුවමනා වූ නිසයි. එම විදේශ ආයෝජන සමග රටේ අලුත් ආයෝජන ඇති කිරීමට ඒ බලශක්ති යෝජනා ක්‍රම සඳහා විදේශ ආයෝජන ලැබුණා. ඩොලර් බිලියන දෙකක් හෝ දෙක හමාරක පමණ ව්‍යාපෘති අප ඒ අනුව අනුමත කළා. මෙම ව්‍යාපෘති අනුමත කරන අවස්ථාවේදී එක් එක් ව්‍යාපෘති වෙනුවෙන් කමිටුවලින් මිල නම් කළා. ඊට හේතු ගණනාවක් තිබෙනවා. මේ වැඩ කටයුත්ත කළේ ඒ කාරණා සියල්ල සලකා බැලීමෙන් පසුවයි.
අදානි සමාගම සහ හේලීස් සමාගම සම්බන්ධයෙන්ද මා සඳහන් කරන්න කැමතියි. අප පළමුවෙන්ම මුදල් අමාත්‍යාංශයෙන් ව්‍යාපෘති කොමිටියක් පත් කළා. ඊට පසුව මේ සමාගම් සමග ගනුදෙනු කිරීම සඳහා කැබිනට් මණ්ඩලයෙන් ව්‍යාපෘති පිළිබඳ සාකච්ඡා කොට තීරණ ගැනීමේ කමිටුවක් පත් කළා. අන්තිම මිල තීරණය කළේ ඒ අයගේ වාර්තා අනුවයි.
හේලිස් සමාගමේ ව්‍යාපෘතිය මෙගා වොට් පනහක් වුණා. එහි අදානි ව්‍යාපෘති අතර වෙනසක් තිබෙනවා. ඊට හේතු ගණනාවක් තිබෙනවා. ඒ සියලු හේතු ගැන ලිපි ගොනුවලින් අධ්‍යයනය කරන්නට ආණ්ඩුවට හැකියාව තිබෙනවා. අප සියල්ලම කර ඇත්තේ නිලධාරීන් මාර්ගයෙන්. පළමුවෙන්ම තිබුණේ සංක්‍රමණික පක්ෂීන් පිළිබඳ අධ්‍යයනයයි. පක්ෂීන්ගේ පැමිණීමෙන් පරිසර තත්ත්වයන්ට හානි විය හැකියි. මේ සඳහා මන්නාරමේ තිබෙන හේලීස් ව්‍යාපෘතියට රජයෙන් අධ්‍යයනය කර තිබුණා. අදානි සමාගමට මුදල් ගෙවා එය කරන්නට සිදුවුණා.
දෙවැනිව තිබුණේ භූමිය ලබාගැනීමයි. භූමිය ලබා ගැනීමේදී අප තීරණය කළේ විදුලි බල මණ්ඩලයේම භූමිය මන්නාරමට ලබාදීමයි. එය හේලීස් සමාගමට ලැබුණා. අදානි සමාගමට එම භූමිය මිල දීලා ගන්නට සිදුවුණා. මන්නාරම පිළිබඳ සක්‍යතා අධ්‍යයනයක් විදුලි බල මණ්ඩලයෙන් සිදුකර තිබුණා. නමුත් අදානිට අලු‍තින් ඊට ගෙවන්නට තිබුණා.එමෙන්ම මන්නාරම වෙනුවෙන් බල ශක්ති බලපත්‍රය විදුලි බල මණ්ඩලයෙන් ක්‍රියාත්මක කර තිබුණා. අදානිට මුදල් ගෙවා එම වැඩකටයුත්ත කරන්නට තිබුණා. බෙදා හැරීමේ ජාලයත් අන්තිම සැතැක්ම සමග සම්බන්ධ කිරීම බැලූ විට යටිතල පහසුකම් එකක්වත් අදානි ව්‍යාපෘතියේ තිබුණේ නැහැ.
මේ සියල්ලම මන්නාරම ව්‍යාපෘතියේ ඒ අයට දෙන්න අප සකස් කර තිබුණා. නිලධාරීන් දුන් වාර්තා අනුව පිළිගෙන මේ ව්‍යාපෘති දෙක මෙන්ම අනික් ඒවා අප අනුමත කළා. හැම එකේම මිල වෙනස්. මේ ගැන මුදල් ගත්තා ආදී වශයෙන් නොයෙක් චෝදනා කර තිබුණා. මුදල් අරගන්න වුවමනා නිසා මේ වැඩ කටයුත්ත කළ බවට චෝදනා කර තිබුණා. මේ නිලධාරීන් හොඳ අවංක නිලධාරීන් බව කිව යුතුයි.ඒනිසා මේ වැඩකටයුත්ත සාකච්ඡා කොට දුන් වාර්තා කැබිනට් මණ්ඩලයේදී තීරණය කළා. ව්‍යාපෘති නතර කරනවා නම් ඊට හේතු මොනවාද කියා දැනගත යුතුයි. නැතිනම් චෝදනා හැම පැත්තකටම යනවා. මුදල් දුන්නා, සල්ලිවලට වැඩ කළා කිව්වොත් සල්ලි දෙන්නේ කවුදැයි කිව යුතුයි. සල්ලි දෙන්නේ අදානිද?
මේ කියන්නේ අදානි සමාගම ලංකාවේ සහ ඉන්දියාවේ නීති කඩා තිබෙනවාද? චෝදනා කරන්නේ එයද? මේ ඉන්දියාවේ අගමැතිතුමා එන අවස්ථාව. මේවා දෙන්නෙ නෑ අරවා දෙන්නේ නෑ ආදී කතන්දර මෝදි අගමැතිතුමා එන අවස්ථාවේ අදින්න හොඳ නෑ. මේ පිළිබඳ අපට තියෙන්නේ එකම කාරණයයි. පුළුවන්කම තිබෙන වැඩකටයුතු අවසන් කරන්න. ඉන්දියාව සහ අප අතර තිබෙන සබඳතාවය තවත් ශක්තිමත් කරගන්න. 2023 සහ 2024 වසරවල ඉන්දු ශ්‍රී ලංකා ඒකාබද්ධ නිවේදන අනුව ක්‍රියා කරන්න වුවමනායි.
ඉන්දියාව හා ලංකාව අතර බලශක්ති වැඩසටහන ක්‍රියාත්මක කිරීම සම්බන්ධයෙන් අප ආණ්ඩුවට සහය දෙනවා. අනෙක් වැඩකටයුතු කරන විටත් අප අදාළ සහාය දෙනවා. ඉන්දියාව සමග අප එකට වැඩ කළ යුතුයි. මෝදි අගමැතිතුමා එන අවස්ථාවේ මේවා අදින්න අවශ්‍ය නැහැ.
චමින්ද සිල්වා
