රුසියානු ඉතිහාසයේ මෑතකදී සිදු කළ විශාලතම හමුදා සාමාජිකයන් බඳවාගැනීම සනිටුහන් කරමින් රුසියානු ජනාධිපති ව්ලැදිමීර් පුටින් විසින් එරට හමුදාවට අවුරුදු 18-30 වයස් කාණ්ඩයේ තරුණයන් එක් ලක්ෂ හැටදහසක පිරිසක් බඳවා ගැනීමට තීරණය කර තිබේ. මේ අනුව, අදාළ වයස් කාණ්ඩයට අයත් තරුණයන්ගෙන් රුසියානු හමුදාවට බැඳෙන ලෙස ජනාධිපති පුටින් ඉල්ලීමක් කර තිබේ. මෙය 2011 වසරෙන් පසු රුසියානු හමුදාවට බඳවා ගැනීමට යන විශාලතම කණ්ඩායම සේ සැලකේ.
රුසියානු හමුදා ප්‍රමාණයෙන් විශාල කිරීමේ අරමුණින් මෙම නව හමුදා සාමාජිකයන් පිරිස බඳවා ගැනීමට සැලසුම් කර ඇති අතර රුසියානු හමුදාවේ සාමාජිකත්වය මිලියන 2.39ක් දක්වාත් හමුදාවේ ක්‍රියාකාරී භටයන්ගේ සංඛ්‍යාව මිලියන 1.5ක් දක්වාත් වර්ධනය කළ යුතු බව රුසියානු ජනාධිපතිවරයා විසින් මෙයට මාස කිහිපයකට පෙර පවසා තිබිණි. මෙසේ බඳවා ගනු ලබන නව හමුදා සාමාජිකයන් යුක්රේන හමුදා සමග පවතින සටන් සඳහා නොයවන බව රුසියානු උප අද්මිරාල් ව්ලැදීමීර් ට්සිම්ලයන්ස්කි පවසා තිබේ. කෙසේ වුවද රුසියානු දේශසීමාවේ යුක්රේන හමුදාවන් සමග පවතින සටන්වලදී නවක රුසියානු හමුදා භටයන් පසුගිය කාලයේදී මියගොස් ඇති බව විදෙස් මාධ්‍ය විසින් වාර්තා කර තිබිණි.
